കുടമാളൂര്: അനശ്വര കഥകളി ആചാര്യന് കുടമാളൂര് കരുണാകരന്നായരുടെ നാലാം തലമുറ കഥകളി രംഗത്തെത്തി. കേരള കലാമണ്ഡലത്തിന്റെ നേതൃത്വത്തില് നടന്നുവരുന്ന പഠനകളരിയില് പഠിച്ചിറങ്ങിയ നീരജ് കൃഷ്ണനാണ് കൃഷ്ണവേഷമിട്ട് രംഗത്തെത്തിയത്.
കുടമാളൂര് കരുണാകരന്നായരുടെ മകള് ലക്ഷ്മിക്കുട്ടിയമ്മയുടെയും കഥകളി രംഗത്തെ പ്രശസ്തനായ മാത്തൂര് ഗോവിന്ദന്കുട്ടിയുടെയും കൊച്ചുമകനാണ് നീരജ് കൃഷ്ണന്. പിതാവ് ഉണ്ണികൃഷ്ണന്നായര് കഥകളിചെണ്ട അഭ്യസിപ്പിച്ചിട്ടുണ്ട്. നീരജ് കൃഷ്ണനോടൊപ്പം മറ്റു 11 കുട്ടികളും ഇവിടെ പഠിച്ച് അരങ്ങേറ്റം നടത്തി.
എന്എസ്എസ് കരയോഗം ഹാളില് നടന്ന സമ്മേളനം സുരേഷ് കുറുപ്പ് എംഎല്എ ഉത്ഘാടനം ചെയ്തു. കേരള കലാമണ്ഡലം രജിസ്ട്രാര് കെ.കെ. സന്ദരേശന് അദ്ധ്യക്ഷനായി. കലാമണ്ഡലം എക്സിക്യൂട്ടീവ് കമ്മറ്റി അംഗം എന്.ആര്. ഗ്രാമപ്രകാശ്, മാത്തൂര് ഗോവിന്ദന്കുട്ടി, മാടവന ബാലകൃഷ്ണപിള്ള, ഇ.എന്. കേരളവര്മ്മ, എം.എസ്. ഗോപകുമാര്, ഉഷാ ബാലചന്ദ്രന്, എം.എസ്. ജയകുമാര്, ബിന്ദു ഹരികുമാര് തുടങ്ങിയവര് പ്രസംഗിച്ചു.
കലാമണ്ഡലം ഭാഗ്യനാഥിന്റെ ശിക്ഷണത്തിലാണ് കുട്ടികള് കഥകളി പഠനം നടത്തുന്നത്. ചടങ്ങിനുശേഷം ദുര്യോധനവധം, ലവണാസുരവധം കഥകളിയും നടന്നു.
