ദേശീയ വിരവിമുക്ത ദിനാചരണം
ജില്ലാതല ഉദ്ഘാടനം ഇന്ന് മയ്യില് സ്കൂളില്
കണ്ണൂര്: ദേശീയ വിരവിമുക്ത ദിനാചരണത്തിന്റെ ജില്ലാതല ഉദ്ഘാടനം ഇന്ന് (ആഗസ്ത് 10) രാവിലെ 9.30 ന് മയ്യില് ഐഎംഎന്എസ് ഗവ:ഹയര്സെക്കണ്ടറി സ്കൂളില് ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് നിര്വ്വഹിക്കും. ജില്ലാ കലക്ടര് മീര് മുഹമ്മദലി ചടങ്ങില് മുഖ്യാതിഥിയാവും. ജില്ലാ മെഡിക്കല് ഓഫീസര് ഡോ.കെനാരായണ നായ്ക്ക് ദിനാചരണ സന്ദേശം നല്കും.
കഴിഞ്ഞ ഫെബ്രുവരി 10ന് വിരമരുന്ന് കഴിച്ചവര് ഉള്പ്പെടെ 1 വയസ്സു മുതല് 19 വയസ്സ് വരെയുള്ള ജില്ലയിലെ 6,37,352 കുട്ടികള്ക്കാണ് ദിനാചരണത്തിന്റെ ഭാഗമായി ഇന്ന് ആല്ബന്ഡസോള് ഗുളികകള് വിതരണം ചെയ്യുന്നത്.
ആരോഗ്യവകുപ്പിനൊപ്പം തദ്ദേശസ്വയംഭരണ വകുപ്പും വിദ്യാഭ്യാസ സാമൂഹ്യ നീതി വകുപ്പുകളും ജില്ലാ ഭരണകൂടവും സംയുക്തമായാണ് പരിപാടി സംഘടിപ്പിക്കുന്നത്. ഡോക്ടര്മാര്, ആരോഗ്യപ്രവര്ത്തകര് എന്നിവരുടെ മേല്നോട്ടത്തില് അധ്യാപകര്, അംഗന്വാടി വര്ക്കര്മാര് എന്നിവരാണ് ഗുളിക നല്കുന്നത്. 1 മുതല് 5 വയസ് വരെ അംഗന്വാടിയിലും 6 മുതല് 19 വയസുവരെയുള്ളവര്ക്ക് സ്കൂളുകളിലുമാണ്് ഗുളിക വിതരണം ചെയ്യുക. 2 വയസ്സുവരെയുള്ള കുട്ടികള്ക്ക് പകുതി ഗുളിക (200 മില്ലി ഗ്രാം) തിളപ്പിച്ചാറ്റിയ വെള്ളത്തില് അലിയിച്ച് കൊടുക്കണം. 2 മുതല് 19 വയസ് വരെ ഒരു ഗുളിക (400 മില്ലിഗ്രാം) ഉച്ച ഭക്ഷണത്തിന് ശേഷം ഒരു ഗ്ലാസ് തിളപ്പിച്ചാറ്റിയ വെള്ളത്തോടൊപ്പം ചവച്ചരച്ച് കഴിക്കണം. സ്കൂളുകളിലും അംഗന്വാടികളിലും രജിസ്റ്റര് ചെയ്യാത്തവര്ക്കും അംഗന്വാടികളില് ഗുളിക നല്കും.
മാലിന്യത്തില് നിന്നും സ്വാതന്ത്ര്യം;
ഗൃഹതലസന്ദര്ശനം ഊര്ജിതം
കണ്ണൂര്: സംസ്ഥാനം സമ്പൂര്ണ്ണ മാലിന്യരഹിതമാക്കുകയെന്ന ലക്ഷ്യം കൈവരിക്കുന്നതിന് ആഗസ്ത് 15 ന് മാലിന്യത്തില് നിന്നും സ്വാതന്ത്ര്യം എന്ന പ്രഖ്യാപനം നടത്തി ശുചിത്വ-മാലിന്യ സംസ്ക്കരണ യത്നം ആരംഭിക്കും.
ഇതിന്റെ ഭാഗമായി മുഴുവന് വീടുകളിലും അവസ്ഥാ നിര്ണ്ണയ പഠനത്തിനും പരിപാടിയുടെ അവബോധം സൃഷ്ടിക്കുന്നതിനുമായി ജില്ലയില് നടക്കുന്ന ഗൃഹസന്ദര്ശനം 30 ശതമാനം പൂര്ത്തിയായി. 50 വീടുകള്ക്ക് 2 പേര് എന്ന നിലയിലാണ് ഗൃഹസന്ദര്ശനം. ജൈവ മാലിന്യ സംസ്ക്കരണത്തിന് ഓരോ വീടിനും ഏത് തരം സംവിധാനമാണ് ഉചിതമെന്നും അജൈവമാലിന്യം കഴുകി വൃത്തിയാക്കി തരംതിരിച്ച് സൂക്ഷിച്ചുവെക്കുന്നതിനുള്ള നിര്ദ്ദേശങ്ങളും ഗൃഹസന്ദര്ശനത്തില് വളണ്ടിയര്മാര് നല്കും. തദ്ദേശസ്വയം ഭരണസ്ഥാപന പ്രതിനിധികളുടേയും കുടുംബശ്രീയുടേയും നേതൃത്വത്തിലാണ് പരിപാടി നടക്കുന്നത്. ആഗസ്ത് 13-നകം മുഴുവന് വീടുകളിലും ഗൃഹസന്ദര്ശനം പൂര്ത്തീകരിക്കുന്ന വിധത്തിലാണ് ആസൂത്രണംചെയ്തിട്ടുള്ളത്.
മട്ടന്നൂര് നഗരസഭ തെരഞ്ഞെടുപ്പ്
വോട്ടെണ്ണല് ഇന്ന്
കണ്ണൂര്: ചൊവ്വാഴ്ച പൊതു തെരഞ്ഞെടുപ്പ് നടന്ന മട്ടന്നൂര് നഗരസഭയിലെ 35 വാര്ഡുകളിലെയും വോട്ടെണ്ണല് ഇന്ന് രാവിലെ 10 മണിക്ക് ആരംഭിക്കും. തെരഞ്ഞെടുപ്പ് സാധനങ്ങള് വിതരണം ചെയ്ത മട്ടന്നൂര് ഹയര്സെക്കണ്ടറി സ്കൂളാണ് വോട്ടെണ്ണല് കേന്ദ്രം. കൗണ്ടിംഗിന് 6 ടേബിളുകളാണ് ക്രമീകരിച്ചിട്ടുള്ളത്. വരണാധികാരികളുടെ ടേബിളില് പോസ്റ്റല് വോട്ടുകളാണ് ആദ്യം എണ്ണുക. രാവിലെ 10.30 ഓടെ ആദ്യ ഫലങ്ങള് ലഭ്യമാകും.
