കോട്ടയം: ഓണം എക്സ്പോ 23 മുതല് സെപ്തംബര് 3 വരെ നാഗമ്പടം മൈതാനിയില് നടക്കുമെന്ന് ജില്ലാ വ്യവസായിക ജോയിന്റ് രജിസ്ട്രാര് ജി. രാജീവ് പത്രസമ്മേളനത്തില് അറിയിച്ചു.
കൈത്തറി, കയര്, കരകൗശല വ്യവസായങ്ങളെയും ചെറുകിട വ്യവസായങ്ങളെയും പ്രോത്സാഹിപ്പിക്കുന്നതിനും വിപണനം വര്ദ്ധിപ്പിക്കുന്നതിനും ഉതകുന്ന തരത്തിലാണ് പ്രദര്ശനം സംഘടിപ്പിച്ചിരിക്കുന്നത്. വ്യവസായ വാണിജ്യ വകുപ്പ്, കൈത്തറി ടെക്സ്റ്റയില്സ് വകുപ്പ് എന്നിവരുടെ സംയുക്താഭിമുഖ്യത്തില് ജില്ലാ വ്യവസായ കേന്ദ്രവും സംയുക്തമായിട്ടാണ് പ്രദര്ശനം സംഘടിപ്പിക്കുന്നത്.
കേരളത്തിന്റെ തനതായ തുണിത്തരങ്ങള് മേളയില് ലഭ്യമാണ് പ്രദര്ശനത്തിന്റെ ഉദ്ഘാടനം 23ന് വൈകിട്ട് 5.30ന് തിരുവഞ്ചൂര് രാധാകൃഷ്ണന് എംഎല്എ നിര്വ്വഹിക്കും.
നഗരസഭ അദ്ധ്യക്ഷ ഡോ. പി.ആര്. സോന ആദ്യവില്പ്പന നടത്തും. കളക്ടര് സി.എ. ലത, ജില്ലാപഞ്ചായത്ത് പ്രസിഡന്റ് സഖറിയാസ് കുതിരവേലില് എന്നിവര് സംസാരിക്കും.
ഭക്ഷണസാധനങ്ങള്, തുണിത്തരങ്ങള്, കാര്ഷിക ഉപകരണങ്ങള്, ബാഗുകള്, പരവതാനികള് തുടങ്ങിയവ കമ്പനി വിലയില് ലഭ്യമാണെന്നും അദ്ദേഹം പറഞ്ഞു. സമ്പൂര്ണ്ണമായും ശീതീകരിച്ച സ്റ്റാളുകള് മേളയുടെ പ്രത്യേകതയാണ്.
പത്രസമ്മേളനത്തില് ഡെപ്യൂട്ടി രജിസ്ട്രാര് എ.ജി.സൈറസ്, കണ്സെപറ്റ് ഇവന്മാനേജ്മെന്റ് എംഡി ബിനേഷ്.ജി എന്നിവര് പങ്കെടുത്തു.
