ആലപ്പുഴ: എഐടിയുസിക്കെതിരെ മന്ത്രി ജി. സുധാകരന്റെ രൂക്ഷ വിമര്ശനം, നോക്കുകൂലി വാങ്ങുന്നത് അളിഞ്ഞ സംസ്ക്കാരമാണെന്ന് സുധാകരന് മാധ്യമ പ്രവര്ത്തകരോട് പറഞ്ഞു. എഐടിയുസി ജില്ലാ സെക്രട്ടറി ഇത്തരം പ്രവര്ത്തനങ്ങളെ ന്യായീകരിക്കുകയാണ്. എന്നാല് സിപിഐ ജില്ലാ സെക്രട്ടറി ഇതിനെതിരായ സമീപനം സ്വീകരിച്ചത് സ്വാഗതാര്ഹമാണെന്നും സുധാകരന് പറഞ്ഞു.
കഴിഞ്ഞ ദിവസം നോക്കുകൂലി ചോദിച്ച് ദേശിയ പാതയോരത്ത് ഇന്റര് ലോക്ക് ടൈല് പാകുന്നത് എഐടിയുസി തൊഴിലാളികള് തടഞ്ഞിരുന്നു. ഒരു ടിപ്പര് ടൈല് ഇറക്കുന്നതിന് 2,000 രൂപയാണ് ആവശ്യപ്പെട്ടത്. സംഭവം വിവാദമായതോടെ പോലീസ് സംരക്ഷണയിലാണ് ഇപ്പോള് ജോലി നടക്കുന്നത്.
ഇതു സംബന്ധിച്ച ചോദ്യങ്ങളോടാണ് സുധാകരന് എഐടിയുസിക്കെതിരെ രൂക്ഷമായി പ്രതികരിച്ചത്. ആലപ്പുഴയില് മാത്രം കാണുന്ന അധമ സംസ്ക്കാരമാണിത്. സിഐടിയുക്കാരും നോക്കുകൂലി വാങ്ങുന്നുണ്ട്. ഇതിനെതിരെ പൊതുജനങ്ങളും രാഷ്ട്രീയ പാര്ട്ടികളും, ജനപ്രതിനിധികളും പ്രതികരിക്കണമെന്നും സുധാകരന് ആവശ്യപ്പെട്ടു. വികസന പ്രവര്ത്തനങ്ങള് തടഞ്ഞാല് പിഡബ്ള്യുഡി നിര്മ്മാണ പ്രവര്ത്തനങ്ങള് നിര്ത്തിവയ്ക്കും.
നോക്കുകൂലിയുടെ പേരില് റോഡ്പണി തടഞ്ഞത് സംബന്ധിച്ച് നഗരസഭയും ജില്ലാ പഞ്ചായത്തും എന്തുകൊണ്ട് പ്രതികരിച്ചില്ലെന്നും മന്ത്രി ചോദിച്ചു. നോക്കുകൂലിയെ ന്യായീകരിക്കുന്ന ചില നേതാക്കള് മലര്ന്നുകിടന്നു തുപ്പുകയാണെന്നും സുധാകരന് വിമര്ശിച്ചു.
