ചെന്നൈ: സ്ത്രീകള്ക്കെതിരായ മോശം പരാമര്ശങ്ങള് നടത്തുന്നതിന് പ്രതികളുടെ പ്രശസ്തിയോ, യോഗ്യതയോ ഒന്നും ഇളവായി കണക്കാക്കാനാവില്ലെന്ന് മദ്രാസ് ഹൈക്കോടതി.
സമൂഹത്തില് സ്ഥാനമുള്ള വ്യക്തികള് പരസ്യ പ്രസ്താവനകള് നടത്തുമ്പോള് കൂടുതല് സംയമനം പാലിക്കുകയാണ് വേണ്ടതെന്ന് ജസ്റ്റിസ് ജി കെ ഇളന്തിരയ്യന് പറഞ്ഞു. ടിവികെ വനിതാ അംഗങ്ങള്ക്കെതിരെ ശാസ്ത്രജ്ഞനും രാഷ്ട്രീയ നിരീക്ഷകനുമായ ഡോ. പൊന്രാജ് നടത്തിയ പരാമര്ശങ്ങളുടെ പേരില് അദ്ദേഹത്തിനെതിരെ രജിസ്റ്റര് ചെയ്ത രണ്ട് എഫ്ഐആറുകള് റദ്ദാക്കാന് വിസമ്മതിച്ചുകൊണ്ടാണ് കോടതി ഈ നിരീക്ഷണം നടത്തിയത്.
ഒരു യൂട്യൂബ് ചാനലില് സംപ്രേഷണം ചെയ്ത അഭിമുഖത്തില് ടിവികെയിലെ വനിതാ അംഗങ്ങളെ ‘വേശ്യകള്’, ‘നിരക്ഷരര്’ എന്നിങ്ങനെ പൊന്രാജ് വിശേഷിപ്പിച്ചുവെന്നാണ് കേസ്.
താന് ഒരു രാഷ്ട്രീയ നിരീക്ഷകനാണെന്നും തമിഴ്നാട് രാഷ്ട്രീയത്തിലെ പൊതുശബ്ദമാണെന്നും പൊന്രാജ് വാദിച്ചു. ഒരു ശാസ്ത്രജ്ഞന് എന്ന നിലയില് ഡോ. എ.പി.ജെ. അബ്ദുള് കലാമുമായുള്ള ബന്ധത്തെയും അദ്ദേഹം ചൂണ്ടിക്കാട്ടി. അപ്പോഴാണ് കോടതി പ്രതികൂല പരാമര്ശങ്ങള് നടത്തിയത്.
