തിരുവനന്തപുരം: പരീക്ഷാ ക്രമക്കേടുകളുമായി ബന്ധപ്പെട്ട വിഷയത്തില് കോണ്ഗ്രസിന്റെ ഇരട്ടത്താപ്പ് ജനങ്ങള് തിരിച്ചറിയണമെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് എം എല് എ.
നരേന്ദ്ര മോദി സര്ക്കാര് വിദ്യാര്ത്ഥികളുടെ താല്പര്യവും പരീക്ഷാ സംവിധാനത്തിന്റെ വിശ്വാസ്യതയും സംരക്ഷിക്കുന്നതിനായി ആവശ്യമായ ഇടപെടലുകള് നടത്തി പുനഃപരീക്ഷ നടത്തിയപ്പോള് കോണ്ഗ്രസ് ഒരു നിലപാടും പറഞ്ഞില്ല. വിദ്യാര്ത്ഥികള് സമരത്തിലായിരുന്ന സമയത്തും രാഹുല് ഗാന്ധിയോ പ്രിയങ്ക ഗാന്ധിയോ അവരുടെ ഇടയിലേക്ക് പോയില്ലെന്നും അദ്ദേഹം പറഞ്ഞു.
പാര്ലമെന്റ് സമ്മേളനം ആരംഭിക്കുന്നതിന് തൊട്ടുമുമ്പ് കോണ്ഗ്രസ് നടത്തുന്ന രാഷ്ട്രീയ നാടകത്തിന്റെ ലക്ഷ്യം എന്താണെന്ന് രാജീവ് ചന്ദ്രശേഖര് ചോദിച്ചു. ജമ്മു-കശ്മീര്, ഹിമാചല് പ്രദേശ്, കേരളം തുടങ്ങിയ സംസ്ഥാനങ്ങളിലും ചോദ്യപേപ്പര് ചോര്ച്ചയുമായി ബന്ധപ്പെട്ട സംഭവങ്ങള് ഉണ്ടായിട്ടും അവിടങ്ങളിലെ വിഷയങ്ങളില് കോണ്ഗ്രസ് സമാനമായ നിലപാട് സ്വീകരിക്കാത്തത് എന്തുകൊണ്ടാണെന്നും അദ്ദേഹം ചോദിച്ചു.
കോണ്ഗ്രസിന്റെ നിലപാടിനെക്കുറിച്ച് ഗൗരവമായ പരിശോധന നടത്തേണ്ടതുണ്ട്. ജനാധിപത്യത്തിലെ ഏറ്റവും പ്രധാനപ്പെട്ട വേദിയായ പാര്ലമെന്റില് ഈ വിഷയങ്ങള് ചര്ച്ച ചെയ്യാന് കോണ്ഗ്രസ് തയാറാകുന്നില്ല. രാജ്യത്തെ ബാധിക്കുന്ന വിഷയങ്ങള് പാര്ലമെന്റില് അവതരിപ്പിച്ച് ചര്ച്ച ചെയ്യുകയാണ് ജനാധിപത്യപരമായ മാര്ഗം. അത്തരമൊരു ചര്ച്ചയെ കോണ്ഗ്രസ് എന്തിനാണ് ഭയക്കുന്നതെന്ന് വ്യക്തമാക്കണമെന്നും അദ്ദേഹം പറഞ്ഞു
ഇത് യഥാര്ത്ഥത്തില് വിദ്യാര്ത്ഥികളുടെ താല്പര്യത്തിനുവേണ്ടിയുള്ള സമരമാണോ, അതോ കോണ്ഗ്രസിന്റെ രാഷ്ട്രീയ അജണ്ടയ്ക്കുവേണ്ടിയുള്ള സമരമാണോ എന്നും രാജീവ് ചന്ദ്രശേഖര് ചോദിച്ചു. ജനാധിപത്യ സംവിധാനത്തെ അട്ടിമറിക്കാനുള്ള ശ്രമങ്ങള് അംഗീകരിക്കാനാകില്ല. ഭരണഘടനയില് കൈവച്ച് സത്യപ്രതിജ്ഞ ചെയ്ത കേരളത്തിന്റെ മുഖ്യമന്ത്രി പ്രധാനമന്ത്രിയുടെ വസതിക്ക് മുന്നില് സമരം ചെയ്യാന് പോയത് എന്തിനുവേണ്ടിയാണെന്നും അദ്ദേഹം ചോദിച്ചു.
നീറ്റ് പരീക്ഷയിലുണ്ടായ ക്രമക്കേടുകള് ഏറ്റവും കൂടുതല് വേദനയോടെയും ഗൗരവത്തോടെയും കണ്ടത് പ്രധാനമന്ത്രി നരേന്ദ്ര മോദിയാണ്. കുറ്റക്കാര്ക്ക് കഠിന ശിക്ഷ നല്കാന് ആവശ്യമായ നടപടികള് കേന്ദ്ര സര്ക്കാര് സ്വീകരിച്ചു. വിദ്യാര്ത്ഥി സമൂഹത്തിന്റെ ആശങ്കകളെ ഗൗരവത്തോടെയും ഉത്തരവാദിത്വത്തോടെയും സമീപിക്കുമെന്നും രാജീവ് ചന്ദ്രശേഖര് കൂട്ടിച്ചേര്ത്തു. ലോകം മുഴുവന് യുദ്ധങ്ങളുടെയും ഊര്ജ്ജ സുരക്ഷയുടെയും പ്രതിസന്ധിയിലൂടെ കടന്നുപോകുമ്പോഴും, കുട്ടികളുടെ പ്രശ്നം പരിഹരിക്കാന് പ്രധാനമന്ത്രി നരേന്ദ്രമോദി മുഴുവന് സമയവും മാറ്റിവെച്ചതായി കാലിക്കറ്റ് സര്വകലാശാല മുന് വൈസ് ചാന്സിലറും ബിജെപി സംസ്ഥാന വൈസ് പ്രസിഡന്റുമായ ഡോ. എം അബ്ദുല്സലാം പറഞ്ഞു. പി കെ കൃഷ്ണദാസ്, അഡ്വ ജെ ആര് പദ്മകുമാര് എന്നിവരും പങ്കെടുത്തു.
