ചേര്ത്തല: റേഷന്സാധനങ്ങള് കയര്സംഘത്തില് സൂക്ഷിക്കാന് നീക്കം, പ്രതിഷേധവുമായി സിഐടിയു. താലൂക്കിലെ വെയര്ഹൗസ് ഗോഡൗണ്, സിവില് സപ്ലൈസ് ഗോഡൗണ്, തിരുമല ഗോഡൗണ് എന്നിവിടങ്ങളില് ശേഖരിച്ചിരുന്ന സാധനങ്ങളാണ് കളവംകോടത്തെ കയര്സംഘത്തിലേക്ക് മാറ്റാനുള്ള നീക്കം നടക്കുന്നത്.
നഗരത്തിലെ ഗോഡൗണുകളില് എഐടിയുസി കയറ്റിയിറക്ക് തൊഴിലാളികള്ക്ക് പ്രാതിനിധ്യം കുറവാണെന്ന കാരണത്താലാണ് സംഭരണം മറ്റൊരു കേന്ദ്രത്തിലേക്ക് മാറ്റുന്നതെന്നാണ് സൂചന. കോടികള് മുടക്കി കയര്മേഖലയുടെ നവീകരണത്തിനായി നിര്മിച്ച ഗോഡൗണ് മറ്റ് കാര്യങ്ങള്ക്കായി വിനിയോഗിക്കുന്നത് പ്രതിഷേധത്തിന് ഇടയാക്കി. ഭക്ഷ്യ സുരക്ഷാ പദ്ധതിയുടെ ഭാഗമായ വാതില്പടി വിതരണം കാര്യക്ഷമമായി നടക്കുന്നതിനിടെ നഗരത്തില് നിന്ന് അകലെയുള്ള കളവംകോടത്തേക്ക് സാധനങ്ങള് മാറ്റാനുള്ള തീരുമാനം അംഗീകരിക്കില്ലെന്നും ശക്തമായ സമരപരിപാടികള് സംഘടിപ്പിക്കാനുമാണ് സിഐടിയു തീരുമാനം.
