കോഴിക്കോട്: കോഴിക്കോട് ജില്ലാ ലൈബ്രറി കൗണ്സില് പതിമൂന്നാമത് പുസ്തകോത്സവത്തിന് തുടക്കം. കണ്ടംകളം ജൂബിലി ഹാളില് ടി.എ. റസാക്ക് നഗറില് പുസ്തകോത്സവത്തിന്റെ ഉദ്ഘാടനം മേയര് തോട്ടത്തില് രവീന്ദ്രന് നിര്വഹിച്ചു. വായനശീലം കുറയുന്ന യുവസമൂഹത്തെ വായനയിലേക്ക് തിരിച്ചെത്തിക്കാന് പുസ്തകോത്സവങ്ങള്ക്ക് പ്രധാന പങ്ക് വഹിക്കാന് കഴിയുമെന്ന് അദ്ദേഹം പറഞ്ഞു. എഴുത്തുകാരെയും പ്രസാധകരെയും നില നിര്ത്തേണ്ടതുണ്ട്. പുസ്തക വില്പ്പനയ്ക്ക് അവസരമൊരുക്കുന്നതില് ലൈബ്രറി കൗണ്സിലിന് ഏറെ ചെയ്യാനുണ്ടെന്ന് അദ്ദേഹം കൂട്ടിച്ചേര്ത്തു.
എന്. ശങ്കരന് അദ്ധ്യക്ഷത വഹിച്ചു. സ്റ്റേറ്റ് ലൈബ്രറി കൗണ്സില് അംഗം എ. ഗംഗാധരന് നായര്, കെ. ചന്ദ്രന്, കെ. ദാമോദരന് എന്നിവര് സംസാരിച്ചു. 103 സ്റ്റാളുകളില് നിന്നായി 56 പ്രസാധകര് പുസ്തക മേളയില് പങ്കെടുക്കുന്നുണ്ട്. ലൈബ്രറികള്ക്ക് ആകര്ഷകമായ കിഴിവിലാണ് പുസ്തകം വില്ക്കുന്നത്.
വയലാര് അവാര്ഡ് നേടിയ യു.കെ കുമാരനെ ഇന്ന് വൈകിട്ട് 4ന് നടക്കുന്ന ചടങ്ങില് അനുമോദിക്കും. പുസ്തകോത്സവത്തോടനുബന്ധിച്ച് സെമിനാറുകളും കലാപരിപാടികളും നടക്കും. 18ന് പുസ്തകോത്സവം സമാപിക്കും.
