തിരുവനന്തപുരം: ജൂണ്‍ 20ന് നടത്തുന്ന നഗരസഭ മാര്‍ച്ചിനു മുന്നോടിയായി ബിജെപി ജില്ലാ പ്രസിഡന്റ് അഡ്വ. എസ്.സുരേഷ് നയിക്കുന്ന വാഹനപ്രചരണ ജാഥ ഇന്ന് ആരംഭിക്കും. രാവിലെ 9.30ന് കഴക്കൂട്ടം ജംഗ്ഷനില്‍ നിന്ന് ആരംഭിക്കുന്ന ജാഥ ഒ. രാജഗോപാല്‍ എംഎല്‍എ ഉദ്ഘാടനം ചെയ്യും. 19 വരെ നടക്കുന്ന വാഹനപ്രചരണ ജാഥയ്‌ക്ക് നഗരസഭയിലെ 100 വാര്‍ഡുകളിലും സ്വീകരണം നല്‍കും. ജില്ലാ പ്രസിഡന്റിനെ കൂടാതെ ജില്ലാ ജനറല്‍ സെക്രട്ടറി പാപ്പനംകോട് സജി, നഗരസഭ പാര്‍ലമെന്ററി പാര്‍ട്ടി നേതാവ് അഡ്വ. വി.ജി. ഗിരികുമാര്‍, ഉപനേതാവ് എം.ആര്‍. ഗോപന്‍, നികുതി-അപ്പീല്‍കാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ സിമി ജ്യോതിഷ് എന്നിവര്‍ ജാഥാംഗങ്ങളാകും.
പാങ്ങപ്പാറയില്‍ നാല് തൊഴിലാളികളുടെ മരണത്തിനിടയാക്കിയ അനധികൃത നിര്‍മ്മാണത്തിന് പിന്നില്‍ ലക്ഷങ്ങളുടെ അഴിമതിയാണ് നടന്നു. നഗരസഭ ഭരണം സമ്പൂര്‍ണ്ണമായി അഴിമതിവത്കരിക്കപ്പെട്ടിരിക്കുന്നു. പകര്‍ച്ചപ്പനി നിയന്ത്രിക്കുന്നതിന് യാതൊരു നടപടിയും എടുക്കാത്ത കേരളത്തിലെ ഏക നഗരസഭ തിരുവനന്തപുരമാണ്. മാലിന്യ സംസ്‌കരണം നടത്തിയിട്ട് മൂന്ന് വര്‍ഷമായി. കോര്‍പ്പറേഷന്‍ കൗണ്‍സില്‍ യോഗങ്ങള്‍പോലും നടത്തികൊണ്ടുപോകാന്‍ മേയര്‍ക്ക് പ്രാപ്തിയില്ലാത്ത സാഹചര്യമാണ്. ഇതിനെതിരെ ബിജെപി ആരംഭിക്കാന്‍ പോകുന്ന സമരപരിപാടികളുടെ മുന്നോടിയാണ് നാലു ദിവസം നീണ്ടുനില്‍ക്കുന്ന വാഹനപ്രചരണ ജാഥ. 20ന് നടക്കുന്ന നഗരസഭാ മാര്‍ച്ച് കുമ്മനം രാജശേഖരന്‍ ഉദ്ഘാടനം ചെയ്യും.
വിവിധ സ്വീകരണയോഗങ്ങളില്‍ ബിജെപി നേതാക്കളായ പി.കെ. കൃഷ്ണദാസ്, വി. മുരളീധരന്‍, എം.എസ്. കുമാര്‍, ഡോ. പി.പി. വാവ, അഡ്വ. ജെ.ആര്‍. പത്മകുമാര്‍, കരമന ജയന്‍, അഡ്വ. പി. സുധീര്‍, ബിജു ബി. നായര്‍, ചെമ്പഴന്തി ഉദയന്‍, പൂന്തുറ ശ്രീകുമാര്‍, പാങ്ങപ്പാറ രാജീവ്, ആര്‍.സി. ബീന, കരമന അജിത്, ആര്‍. മിനി എന്നിവര്‍ പങ്കെടുക്കും.
