കോട്ടയം : പ്ലസ് വണ്‍ പ്രവേശനത്തിനായി ജില്ലയില്‍ വെള്ളിയാഴ്ച വരെ 19,542 പേര്‍ ഓണ്‍ലൈനില്‍ അപേക്ഷിച്ചു. ജില്ലയില്‍ 21,370 വിദ്യാര്‍ഥികളാണ് ഉപരിപഠനത്തിന് യോഗ്യത നേടിയത്. 22 വരെ അപേക്ഷിക്കാം. 29ന് ആദ്യ അലോട്ട് മെന്റ് പ്രസിദ്ധീകരിക്കും.ജൂണ്‍ 5,10 തീയതികളിലാണ് ആദ്യ അലോട്ട്‌മെന്റ്.
ജില്ലയില്‍ 39 സര്‍ക്കാര്‍ സ്‌കൂളുകളിലും 69 എയ്ഡഡ് സ്‌കൂളുകളിലും 23 അണ്‍ എയ്ഡഡ് സ്‌കൂളുകളിലായി 21,336 സീറ്റുകളാണ് പ്ലസ്‌വണ്ണിനുള്ളത്. വോക്കേഷണല്‍ ഹയര്‍ സെക്കന്‍ഡറിക്ക് 1875 സീറ്റും ഐ.ടി.ഐ, പോളി ടെക്‌നിക്ക്, ഫാഷന്‍ ടെക്‌നോളജി തുടങ്ങിയവയ്‌ക്കായി 2500 സീറ്റുകളും ഉണ്ട്. എസ്.എസ്.എല്‍.സി പരീക്ഷ പാസ്സായ എല്ലാവര്‍ക്കും ഉപരിപഠന സാധ്യതയുണ്ട്. എന്നാല്‍ പ്രാദേശികാടിസ്ഥാനത്തില്‍ ഏറ്റക്കുറിച്ചലുകള്‍ ഉണ്ടാകാം. മലയോരമേഖലയില്‍ പ്ലസ് വണ്‍ പ്രവേശനത്തിന് വിദ്യാര്‍ഥികള്‍ ബുദ്ധിമുട്ടുകയാണ്.
പ്ലസ് വണ്‍ പ്രവേശനത്തിന്റെ ഭാഗമായി ഭിന്നശേഷിക്കാരായ കുട്ടികള്‍ക്ക് പ്രത്യേക കൗണ്‍സിലിങ് നടത്തും . ജില്ലയില്‍ ഈ മാസം 17നും 20നും കോട്ടയം മോഡല്‍ ഗവ.എച്ച്.എസ്.എസിലാണ് കൗണ്‍സിലിങ്. കോട്ടയം , പാലാ വിദ്യാഭ്യാസ ജില്ലകളില്‍ നിന്നുള്ളവര്‍ക്ക് 17നും കാഞ്ഞിരപ്പളളി, കടുത്തുരുത്തി വിദ്യാഭ്യാസ ജില്ലകളില്‍ നിന്നുള്ളവര്‍ക്ക് 20നും കൗണ്‍സിലിങ് നടക്കും.
ഭിന്നശേഷിക്കാരായ കുട്ടികള്‍ക്ക് അവര്‍ക്ക് അനുയോജ്യമായ കോഴ്‌സുകള്‍ തെരഞ്ഞെടുക്കുന്നതിന് വേണ്ടിയാണ് പ്രത്യേക കൗണ്‍സിലിങ് നടത്തുന്നത്. ഇതിന് ശേഷം അപേക്ഷ നല്‍കിയാലും മതി. മെഡിക്കല്‍ ബോര്‍ഡിന്റെ സര്‍ട്ടിഫിക്കറ്റും എസ്.എസ്.എല്‍.സി സര്‍ട്ടിഫിക്കറ്റും സഹിതം രക്ഷകര്‍ത്താവിനൊപ്പമാണ് കൗണ്‍സിലിംങിന് ഹാജരകാണ്ടേത്.
പ്ലസ് വണ്‍ പ്രവേശനവുമായി ബന്ധപ്പെട്ട സംശയ നിവാരണങ്ങള്‍ക്ക് താലൂക്കടിസ്ഥാനത്തില്‍ ഫോക്കസ് പോയിന്റുകളുണ്ട്. ചങ്ങനാശേരി എസ്.ബി ഹയര്‍ സെക്കന്‍ഡറി സ്‌കൂള്‍, കോട്ടയം ഗവ.മോഡല്‍ സ്‌കൂള്‍, വൈക്കം എസ്.എം.എസ് എന്‍.എച്ച്.എസ്.എസ്, ഭരണങ്ങാനം സെന്റ്.മേരീസ്, കാഞ്ഞിരപ്പള്ളി സെന്റ്.ഡൊമിനിക് എന്നിവടങ്ങളിലാണ് ഫോക്കസ് പോയിന്റുകള്‍ പ്രവര്‍ത്തിക്കുന്നത്.
