ഒരു കാലത്ത് ചെറു കാറെന്നാല് മാരുതിയായിരുന്നു. മറ്റൊന്നും ആരുടേയും ചിന്തയിലേ ഉണ്ടായിരുന്നില്ല. മാരുതി 800 ഉം ഓള്ട്ടോയുമൊക്കെ റെക്കോര്ഡ് വില്പന നടത്തിയതും ആളുകളുടെ ആ കടുംപിടിത്തത്തില് നിന്നാണ്. പക്ഷേ, ഇന്ന് കഥ മാറി. ചെറു കാര് വാങ്ങാനാഗ്രഹിക്കുന്നവര് രണ്ടാമതൊന്ന് ആലോചിക്കും. കാര് പ്രേമികളുടെ ആലോചനയുടെ ആ ഗ്യാപ്പിലേക്കാണ് ഫ്രഞ്ച് കമ്പനിയായ റെനോ ക്വിഡിനെ ഓടിച്ചു കയറ്റിയത്. അരങ്ങേറി രണ്ടരവര്ഷത്തിനകം 1.30ലക്ഷം കാറുകള് നിരത്തില് നിറയണമെങ്കില്, ക്വിഡിനെ കിടിലന് എന്നല്ലാതെ എന്തു വിളിക്കും?
ആകാര ഭംഗിയും ഫീച്ചറുകളും ഒരുപോലെ ഒത്തിണങ്ങിയ ബജറ്റ് കാര് ക്വിഡ് അല്ലാതെ ഇന്ന് മറ്റൊന്നില്ല. എല്ലാ ഫീച്ചറുകളുമുള്ള ഫുള് ഓപ്ഷന് ക്വിഡ് നിരത്തിലിറക്കാന് പരമാവധി അഞ്ചുലക്ഷം രൂപ മതി. കുറഞ്ഞ വിലയ്ക്ക് കൂടുതല് ആഡംബരം, അതാണ് ക്വിഡിന്റെ പ്രത്യേകത. സ്പോര്ട്ട് യൂട്ടിലിറ്റി വെഹിക്കിള് (എസ്.യു.വി)എന്ന ലേബലും ക്വിഡിന് സ്വന്തം. ഡ്രൈവിങ് പൊസിഷന് ഉയര്ന്ന തലത്തിലാണ്. അതിനാല്, റോഡിലുള്ള എല്ലാ വാഹനങ്ങളും കണ്ടു തന്നെ ഡ്രൈവ് ചെയ്യാം. ഇത് അപകട സാധ്യതകള് ഇല്ലാതാക്കും. ചുരുക്കിപ്പറഞ്ഞാല് നഗരയാത്രയ്ക്ക് മിടുക്കനാണ് ക്വിഡ്.
ആദ്യമായി നിരത്തിലെത്തുമ്പോള് ക്വിഡിന്റെ എന്ജിന് കരുത്ത് 799 സിസിയായിരുന്നു. സ്റ്റാന്ഡേര്ഡ്, ആര്എക്സ്ഇ, ആര്എക്സ് എല്, വേരിയന്റുകള്ക്കെല്ലാം കുറഞ്ഞ കരുത്തായിരുന്നു. അതുകൊണ്ടുതന്നെ മൈലേജ് ചാമ്പ്യനായിരുന്നു ക്വിഡ്. ഒരു ലിറ്റര് പെട്രോളില് 25.2 കിലോ മീറ്ററായിരുന്നു മൈലേജ്. ഒരു ചെറുകാറിന് നല്കാവുന്ന മികച്ച മൈലേജായിരുന്നു അത്.
പക്ഷേ, മൈലേജ് ഇഷ്ടപ്പെടുന്നവരേക്കാള് എന്ജിന് കരുത്ത് ആഗ്രഹിച്ചവര് ഏറെയായിരുന്നു. 1.0ആര്എക്സ്എല് ഇറക്കി എന്ജിന് ശേഷി 999 സിസിയായി ക്വിഡ് ഉയര്ത്തി. ഒപ്പം, 23 കിലോമീറ്റര് മൈലേജ് ഉറപ്പിക്കാനും കഴിഞ്ഞു.
എഎംടി ആര്എക്സ്എല് വേരിയന്റിലേക്കെത്തിയപ്പോള് ഓട്ടോമാറ്റിക് ഗിയര് ഷിഫ്റ്റില് 24 കിലോമീറ്റര് മൈലേജ് നല്കാന് ക്വിഡിനായി. എന്ജിന് ശേഷി 999 സിസിയില് നിലനിര്ത്തിക്കൊണ്ടായിരുന്നു ഇത്. ഒടുവിലെത്തിയ ക്ലൈംബര് 1.0എഎംടി ഓട്ടോമാറ്റിക്കിലും 24.04 കിലോ മീറ്റര് മൈലേജ് നിലനിര്ത്താന് ക്വിഡിന് കഴിഞ്ഞു.
മൈലേജ് ചാമ്പ്യനെന്ന പേരിനൊപ്പം അകവുംപുറവും ഭംഗിയുള്ളതാണ് ക്വിഡ്. ഏഴിഞ്ച് ടച്ച് സ്ക്രീന്, നാവിഗേഷന്, ബ്ലൂടൂത്ത് കണക്ടിവിറ്റി, കീലെസ് എന്ട്രി എന്നിവ എടുത്തുപറയണം. നല്ല ലെഗ് സ്പെയ്സുള്ളതിനാല് നീണ്ടയാത്രയില് ഇരുന്ന് മുഷിയില്ല. 2.89 ലക്ഷം രൂപ മുതല് 4.72 ലക്ഷം രൂപവരെയാണ് ക്വിഡിന്റെ വിവിധ വേരിയന്റുകളുടെ എക്സ് ഷോറൂം വില. ക്വിഡിന്റെ ജനപ്രിയത കൂടി വന്നപ്പോള്, ശക്തനായ എതിരാളിയെക്കണ്ടത്താന് പല കാര് കമ്പനികളും തലപുകച്ചു തുടങ്ങി.
