എരുമേലി: പ്രധാനമന്ത്രി പാര്പ്പിട പദ്ധതിയായ പിഎംഎവൈ (പ്രധാനമന്ത്രി ആവാസ് യോജന) പദ്ധതി പ്രകാരം ലഭിച്ച ഗുണഭോക്തൃ ലിസ്റ്റുകള് യഥാസമയം നല്കാത്ത എരുമേലി ഗ്രാമപഞ്ചായത്തിന്റെ നിരുത്തരവാദപരമായ നടപടിക്കെതിരെ പ്രതിഷേധം ശക്തമാകുന്നു.
പദ്ധതി പ്രകാരം ആയിരത്തിലധികം അപേക്ഷകളാണ് ലഭിച്ചിട്ടുള്ളത്. ജനറല്, എസ്/സി, എസ്/റ്റി എന്നീ വിഭാഗങ്ങളിലായി ഗ്രാമസഭകളുടെ അംഗീകാരത്തോടെ പഞ്ചായത്തംഗങ്ങള് നല്കിയ ലിസ്റ്റാണ് യഥാസമയം ബ്ലോക്കിലേക്ക് നല്കുന്നതില് വീഴ്ചയുണ്ടായിരിക്കുന്നത്. കേന്ദ്രപാര്പ്പിട പദ്ധതി പ്രകാരം ലിസ്റ്റ് നല്കാന് ബിഡിഒ കെ.എസ്. ബാബു എരുമേലി പഞ്ചായത്തിന് നോട്ടീസ് നല്കിയിട്ടുണ്ട്. കഴിഞ്ഞവര്ഷത്തെ പദ്ധതി പ്രകാരം 70 വീടുകള് ലഭിച്ചുവെങ്കിലും 48 വീടുകള് മാത്രമാണ് നല്കിയതെന്നും ബിഡിഒ പറഞ്ഞു.
ഈ ലിസ്റ്റ് കൂടി കണക്കിലെടുത്ത് പഴയ ലിസ്റ്റ് പുതുക്കി പുതിയ ലിസ്റ്റാക്കി നല്കണമെന്ന നിര്ദ്ദേശമാണ് ഗ്രാമപഞ്ചായത്ത് അധികൃതര് അവഗണിച്ചിരിക്കുന്നത്. ജില്ലയിലെ മറ്റെല്ലാ പഞ്ചായത്തുകളും ലിസ്റ്റ് നല്കി കഴിഞ്ഞു.
എന്നാല് പഞ്ചായത്തില് ലഭിച്ച ലിസ്റ്റ് പരിശോധിക്കുകയാണെന്നും 21 നകം ലിസ്റ്റ് ബ്ലോക്ക് പഞ്ചായത്തില് നല്കുമെന്നും സെക്രട്ടറി വിജയന് പറഞ്ഞു.
പഞ്ചായത്തില് നിന്നും ലിസ്റ്റുകള് തരാത്തതുകൊണ്ടാണ് ബ്ലോക്കില് ലിസ്റ്റ് കൊടുക്കാന് വൈകുന്നതെന്ന് വി.ഇ.ഒ സജി പറഞ്ഞു. എന്നാല് കേന്ദ്ര സര്ക്കാരിന്റെ പദ്ധതിയുടെ മറവില് സംസ്ഥാന സര്ക്കാരിന്റെ ലൈഫ് പാര്പ്പിട പദ്ധതി കൂട്ടി ചേര്ക്കാനുള്ള നീക്കമാണിതെന്നും ഇതിനെ ശക്തമായി നേരിടുമെന്നും ബിജെപി പൂഞ്ഞാര് നിയോജക മണ്ഡലം കമ്മറ്റി പ്രസിഡന്റ് വി.സി. അജി പറഞ്ഞു.
17/18 സാമ്പത്തിക വര്ഷത്തേക്കുള്ള വീടുകളുടെ ലിസ്റ്റാണ് ഇപ്പോള് തയ്യാറാക്കുന്നതെന്ന അറിയിപ്പ് ജനങ്ങളെ തെറ്റിദ്ധരിപ്പിക്കാണെന്നും കേന്ദ്ര പാര്പ്പിട പദ്ധതി പ്രകാരം പഞ്ചായത്തംഗങ്ങള് നല്കിയ ലിസ്റ്റ് എന്തു ചെയ്തെന്നു വ്യക്തമാക്കണമെന്ന് അദ്ദേഹം ആവശ്യപ്പെട്ടു.
ലിസ്റ്റ് യഥാസമയം നല്കാതെ കടുത്ത അനാസ്ഥയാണ് ഭരണസമിതി കാട്ടിയതെന്ന് ബിജെപി പഞ്ചായത്തംഗം രജനി ചന്ദ്രശേഖരന് പറഞ്ഞു.
