ബ്യൂണസ് ഐറെസ്: അര്‍ജന്റീനയുടെ പരിചയസമ്പന്നനായ പ്രതിരോധതാരം നികോളാസ് ഒട്ടാമെന്‍ഡി അന്താരാഷ്ട്ര ഫുട്‌ബോളില്‍ നിന്ന് വിരമിക്കല്‍ പ്രഖ്യാപിച്ചു.
17 വര്‍ഷം നീണ്ട മിന്നുന്ന കരിയറിനാണ് 38കാരനായ ഈ സെന്റര്‍ ബാക്ക് താരം വിരാമമിട്ടത്. സ്‌പെയിനിനെതിരായ ലോകകപ്പ് ഫൈനലിലെ തോല്‍വിക്ക് പിന്നാലെയാണ് ഒട്ടാമെന്‍ഡി തന്റെ വിരമിക്കല്‍ തീരുമാനം ഇന്‍സ്റ്റാഗ്രാമിലൂടെ ആരാധകരെ അറിയിച്ചത്. ‘ഒരുപക്ഷേ വിധിയായിരിക്കാം, എന്റെ കരിയറിലെ അവസാന മത്സരം ഒരു ലോകകപ്പ് ഫൈനലായിരുന്നു. ഞങ്ങള്‍ ആഗ്രഹിച്ച ഫലമല്ല ലഭിച്ചതെങ്കിലും, അവസാന സെക്കന്‍ഡ് വരെ പൊരുതി തന്നെയാണ് ഞങ്ങള്‍ മടങ്ങുന്നത്. ലോക ചാമ്പ്യനാവുക എന്ന എന്റെ ഏറ്റവും വലിയ സ്വപ്നം സാക്ഷാത്കരിക്കാന്‍ അവസരം നല്‍കിയ അര്‍ജന്റീനയ്‌ക്ക് നന്ദി,’ എന്ന് ഒട്ടാമെന്‍ഡി വൈകാരികമായ കുറിപ്പില്‍ വ്യക്തമാക്കി. 2022ലെ ഫിഫ ലോകകപ്പ് കിരീടവും രണ്ട് കോപ്പ അമേരിക്ക കിരീടങ്ങളും അര്‍ജന്റീനയ്‌ക്ക് നേടിക്കൊടുക്കുന്നതില്‍ നിര്‍ണായക പങ്കുവഹിച്ച ഒട്ടാമെന്‍ഡി, ദേശീയ കുപ്പായത്തില്‍ 139 മത്സരങ്ങള്‍ കളിച്ചിട്ടുണ്ട്.
അര്‍ജന്റീനയ്‌ക്കായി നാല് ലോകകപ്പുകളില്‍ പങ്കെടുത്ത താരം, പോര്‍ട്ടോ, വലെന്‍സിയ, മാഞ്ചസ്റ്റര്‍ സിറ്റി, ബെന്‍ഫിക്ക തുടങ്ങിയ പ്രമുഖ യൂറോപ്യന്‍ ക്ലബ്ബുകളിലെ വിജയകരമായ കരിയറിന് ശേഷം അടുത്തിടെ സ്വന്തം ക്ലബ്ബായ റിവര്‍ പ്ലേറ്റില്‍ തിരിച്ചെത്തിയിരുന്നു.
