ആര്‍പ്പൂക്കര: ഗാന്ധിനഗര്‍ പോലീസ് സ്‌റ്റേഷന്‍ പരിധിയിലുള്ള ആര്‍പ്പൂക്കര, പനമ്പാലം അങ്ങാടി ഭാഗത്ത് മോഷ്ടാക്കളുടെ ശല്യം വ്യാപകമാകുന്നതായി പരാതി. മോഷ്ടാക്കള്‍ വിലസുന്നതിനാല്‍ രാത്രിയില്‍ ജനങ്ങളാകെ പരിഭ്രാന്തിയിലാണ്. കഴിഞ്ഞ 16ന് രാത്രി 12മണിയോടെ അങ്ങാടിഭാഗത്തുള്ള തൃക്കോവില്‍ പുത്തന്‍മഠത്തില്‍ മതില്‍ചാടിക്കടന്നു തസ്‌ക്കരന്മാര്‍ അകത്തുപ്രവേശിക്കുകയും വൃദ്ധസ്ത്രീയുടെ സമീപത്തേക്ക് നടന്നടുക്കുകയുമായിരുന്നു. അപരിചിതന്‍ ഇവരുടെ അടുത്തേക്ക് വരുന്നതുകണ്ട് മകള്‍ ഭയപ്പെട്ട് നിലവിളിച്ചപ്പോള്‍ മോഷ്ടാവ് മതില്‍ചാടിക്കടന്ന് ഓടിമറഞ്ഞു. 21ന് രാത്രിയിലും സംഭവം ആവര്‍ത്തിക്കുകയും ശബ്ദംകേട്ട്ഉണര്‍ന്ന വീട്ടുകാര്‍ ലൈറ്റിട്ടപ്പോഴേക്കും മോഷ്ടാക്കള്‍ ഓടിമറയുകയും ചെയ്തു. പ്രായമായവര്‍ മാത്രം താമസിക്കുന്ന ഈ വീട്ടില്‍ നടന്ന മോഷണശ്രമം നാട്ടുകാരെ പരിഭ്രാന്തിയിലാക്കിയിരിക്കുകയാണ്.
സംഭവത്തെപ്പറ്റി വീട്ടുകാര്‍ ഗാന്ധിനഗര്‍ പോലീസില്‍ പരാതി നല്‍കി. പനമ്പാലം, അങ്ങാടിഭാഗത്ത് വര്‍ദ്ധിച്ചുവരുന്ന മോഷണശ്രമത്തിനെതിരെ അധികാരികളുടെ ഭാഗത്തുനിന്നും നടപടികള്‍ ഉണ്ടാകണമെന്നും രാത്രികാലങ്ങളില്‍ പോലീസ് പട്രോളിംഗ് ഉള്‍പ്പെടെ നടത്തി ജനങ്ങളുടെ സൈ്വരജീവിതത്തിന് സുരക്ഷ ഉറപ്പാക്കണമെന്നും നാട്ടുകാര്‍ ആവശ്യപ്പെട്ടു.
