കോട്ടയം: സംസ്ഥാന ചലച്ചിത്ര അക്കാദമിയും ആത്മയുമായി ചേര്‍ന്ന് സംഘടിപ്പിക്കുന്ന മൂന്നാമത് രാജ്യാന്തര പ്രാദേശിക ചലച്ചിത്രോത്സവത്തിന് ഇന്ന് തിരിതെളിയും. കോട്ടയം അനശ്വര തിയേറ്ററില്‍ രാവിലെ 10ന് സംവിധായകന്‍ ജയരാജ് ഭദ്രദീപം തെളിക്കും. തുടര്‍ന്ന് ചലച്ചിത്രങ്ങളുടെ പ്രദര്‍ശനം ആരംഭിക്കും.
മേളയോട് അനുബന്ധിച്ച് പ്രത്യേകം തയ്യാറാക്കിയ പന്തലില്‍ ചിത്രാ കൃഷ്ണന്‍കുട്ടി, ഷാഹുല്‍ കാരാപ്പുഴ എന്നിവരുടെ ഫോട്ടോപ്രദര്‍ശനം, സ്റ്റേറ്റ് ബാങ്ക് ഡെപ്യൂട്ടി ജനറല്‍ മാനേജര്‍ വിനായക് കൈസറേ ഉദ്ഘാടനം ചെയ്യും. മേളയിലുടനീളം അനില്‍ കട്ടച്ചിറ ലൈവ് ചിത്രരചന നടത്തും.
വൈകിട്ട് 4ന് നടക്കുന്ന സമ്മേളനം ചലച്ചിത്ര അക്കാദമി ചെയര്‍മാന്‍ കമല്‍ ഉദ്ഘാടനം ചെയ്യും. മാക്ട ചെയര്‍മാന്‍ ലാല്‍ജോസ്, എംഎല്‍എമാരായ തിരുവഞ്ചൂര്‍ രാധാകൃഷ്ണന്‍, സുരേഷ് കുറുപ്പ്, ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, മുനിസിപ്പല്‍ ചെയര്‍പേഴ്‌സണ്‍ ഡോ.പി.ആര്‍.സോന, ഡോ.ബി.ഇക്ബാല്‍ തുടങ്ങിയവര്‍ പങ്കെടുക്കും. ഉദ്ഘാടനചിത്രമായി മാന്‍ഹോള്‍ പ്രദര്‍ശിപ്പിക്കും.
കഴിഞ്ഞ ഐഎഫ്എഫ്‌കെയിലും കാന്‍, ബെര്‍ലിന്‍ തുടങ്ങിയ വിദേശമേളകളിലും പ്രദര്‍ശിപ്പിച്ച ഇരുപതോളം, വിദേശ, ഇന്ത്യന്‍ സിനിമകള്‍ അഞ്ചുദിവസങ്ങളിലായി പ്രദര്‍ശിപ്പിക്കും.
ഇറാന്‍, ചൈന, മെക്‌സിക്കോ, ശ്രീലങ്ക, യു.കെ.ഫ്രാന്‍സ്, അഡര്‍ബജാന്‍, സൗത്താഫ്രിക്ക എന്നീ രാജ്യങ്ങളില്‍ നിന്നുള്ള ചിത്രങ്ങളും, ഹിന്ദി, മറാത്തി, കന്നഡ, തമിഴ്, ബംഗാളി എന്നീ ഭാഷകളില്‍ നിന്നുള്ള ചിത്രങ്ങളും മലയാളത്തില്‍ നിന്ന് അന്തര്‍ദേശീയ-ദേശീയ പുരസ്‌കാരങ്ങള്‍ നേടിയ ചിത്രങ്ങളുമാണ് മേളയില്‍ ഉള്‍പ്പെടുത്തിയിരിക്കുന്നത്. എല്ലാദിവസവും 4.30മുതല്‍ ഓപ്പണ്‍ഫോറം ഉണ്ടായിരിക്കും. സംവിധായകന്‍ പ്രദീപ് നായര്‍ ഓപ്പണ്‍ഫോറം നയിക്കും.
മേളയില്‍ 18വയസ്സ് കഴിഞ്ഞവര്‍ക്ക് മാത്രമാണ് പ്രവേശനം അനുവദിക്കൂ എന്ന് ഭാരവാഹികള്‍ അറിയിച്ചു.
