ഇരിട്ടി : നാട് മുഴുവന് വരള്ച്ചയില് വലയുമ്പോള് ഇതിനെ എങ്ങിനെ പ്രതിരോധിക്കണം എന്നാലോചിച്ചു ഗ്രാമങ്ങളിലെയും നഗരങ്ങളിലെയും ജനങ്ങള് നെട്ടോട്ടമോടുമ്പോള് ഒരു ഗ്രാമത്തിനാകെ മാതൃകയാവുകയാണ് മീത്തലെ പുന്നാട് ഗീതാ ഗ്രാമവും ഇവിടുത്തെ യുവാക്കളുടെ കൂട്ടായ്മയായ ദീപം സ്വയം സഹായ സംഘവും. 15 വര്ഷത്തോളമായി ചെളി നിറഞ്ഞും കാട് മൂടിയും ഉപയോഗ ശൂന്യമായ കുളം ഇവര് ഒരു ദിവസത്തെ പ്രയത്നത്തിനൊടുവില് ശുചീകരിച്ചു പൂര്വ സ്ഥിതിയിലാക്കി.
അമ്പത് വര്ഷത്തിലേറെ പഴക്കമുള്ള സ്വകാര്യ വ്യക്തിയുടെ കുളം ഏതു വേനലിലും ജലസമൃദ്ധമാണെങ്കിലും വര്ഷങ്ങളായി ഉപയോഗ ശൂന്യമായിരുന്നു. പ്രകൃതി സംരക്ഷണത്തിന്റെയും സാമൂഹ്യ ബോധത്തിന്റെയും പാഠമുള്ക്കൊണ്ട് ദീപം സ്വയം സഹായ സംഘം പ്രവര്ത്തകര് കുളം വൃത്തിയാക്കി സംരക്ഷിക്കാന് ഇറങ്ങിപ്പുറപ്പെടുകയായിരുന്നു.
സംഘം പ്രസിഡന്റ് എ.കെ.ഷൈജു, വൈസ് പ്രസിഡന്റ് കെ.ഗോകുല്, എം. ശ്രീരാജ്, എം.വിജില്, എ.കെ. ഷിജു എന്നിവരുടെ നേതൃത്വത്തിലുള്ള പതിനഞ്ചു പേരടങ്ങിയ സംഘം പ്രവര്ത്തകര് ശുചീകരണ ഉദ്യമത്തിനായി ഇറങ്ങിയപ്പോള് ആവേശത്തോടെ നാട്ടുകാരും കൂടെ കൂടി. കുളം പൂര്വ സ്ഥിതിയിലായതോടെ ഇത് രൂക്ഷമായ വരള്ച്ച നേരിടുന്ന പ്രദേശ വാസികളുടെ ജലക്ഷാമത്തിന് പ്രയോജനകരമായി ഭവിക്കും.
ദീപം സ്വയം സഹായ സംഘം ഇതിനു മുന്പും നാട്ടിലെ വിവിധ തരത്തിലുള്ള സാമൂഹ്യ സേവന പ്രവര്ത്തനങ്ങളില് പങ്കാളികളായിട്ടുണ്ട്. കാട് വെട്ടിത്തെളിയിക്കല്. ജൈവ കൃഷി, മരങ്ങള് വെച്ച് പിടിപ്പിക്കല് എന്നീ പ്രവര്ത്തനങ്ങള് നടത്തി വിജയകരമാക്കിയ സംഘം കുളം വൃത്തിയാക്കിയതിലൂടെ മാനവസേവ മാധവസേവ എന്ന മുദ്രാവാക്യം പ്രാവര്ത്തികമാക്കുകയാണ് ചെയ്യുന്നത്.
