കണ്ണൂര്: ഏപ്രില് മാസത്തോടെ അഴീക്കല് തുറമുഖം വഴി ലക്ഷദ്വീപ് ഉള്പ്പെടെയുള്ള സ്ഥലങ്ങളിലേക്ക് ചരക്കു കപ്പല് സര്വീസ് ആരംഭിക്കുമെന്ന് മന്ത്രി രാമചന്ദ്രന് കടന്നപ്പള്ളി അറിയിച്ചു. മാര്ച്ച് അവസാനത്തോടെ ഡ്രഡ്ജിംഗ് പ്രവൃത്തികള് പൂര്ത്തിയാക്കി തുറമുഖം ഗതാഗതയോഗ്യമാക്കുമെന്നും മന്ത്രി അറിയിച്ചു. തുറമുഖം സന്ദര്ശിച്ച ശേഷം തുറമുഖ വകുപ്പ് പ്രിന്സിപ്പല് സെക്രട്ടറി ജെയിംസ് വര്ഗീസ് ഉള്പ്പെടെയുള്ളരുമായി നടത്തിയ കൂടിയാലോചനാ യോഗത്തില് സംസാരിക്കുകയായിരുന്നു മന്ത്രി. തുറമുഖത്തിന്റെ സമഗ്ര വികസനവുമായി ബന്ധപ്പെട്ട് മാര്ച്ച് ഏഴിന് മുഖ്യമന്ത്രിയുടെ അധ്യക്ഷതയില് തിരുവനന്തപുരത്ത് ഉന്നതതല യോഗം ചേരുമെന്നും മന്ത്രി പറഞ്ഞു.
പ്രദേശത്തെ തൊഴിലാളികള് ഉള്പ്പെടെയുള്ളവരുടെ ന്യായമായ ആവശ്യങ്ങള് സംരക്ഷിക്കുന്ന നിലപാടാണ് സര്ക്കാരിന്റേത്. എന്നാല് തുറമുഖ വികസനത്തിന്റെ മറവില് മണല് മാഫിയകളുടെ പ്രവര്ത്തനം അനുവദിക്കില്ല. മണല് ഖനനത്തിന്റെ കാര്യത്തില് തദ്ദേശ സ്ഥാപനങ്ങള്ക്ക് കൂടുതല് അധികാരം നല്കിക്കൊണ്ടുള്ള സമഗ്ര പദ്ധതി മുഖ്യമന്ത്രിയുടെ നേതൃത്വത്തില് തന്നെ ആവിഷ്ക്കരിച്ചിട്ടുണ്ടെന്നും അതിനനുസരിച്ചുള്ള നിലപാടാണ് അഴീക്കലിലും സ്വീകരിക്കുകയെന്നും മന്ത്രി അറിയിച്ചു.
ഭാവിയിലേക്കുള്ള സാധ്യതകള് കൂടി പരിഗണിച്ച് സമഗ്ര പദ്ധതിയാണ് അഴീക്കലില് സര്ക്കാര് ലക്ഷ്യമിടുന്നതെന്ന് പ്രിന്സിപ്പല് സെക്രട്ടറി അറിയിച്ചു. ഇതിനായി ഒരു ഉന്നതതല സമിതിക്ക് സര്ക്കാര് രൂപം നല്കിയിട്ടുണ്ട്. നിലവില് സീറോ ഫേസ് വികസന പ്രവര്ത്തനങ്ങളാണ് നടന്നുകൊണ്ടിരിക്കുന്നത്. ഒന്നും രണ്ടും ഘട്ടങ്ങളില് കടലിനോട് ചേര്ന്ന ഭാഗങ്ങളില് രണ്ടുവീതം വാര്ഫുകള് കൂടി നിര്മിക്കാനാണ് പദ്ധതി. വലിയ കപ്പലുകള്ക്ക് വരെ വരാവുന്ന രീതിയില് തുറമുഖത്തിന്റെ ആഴം കൂട്ടുന്നതുള്പ്പെടെയുള്ള കാര്യങ്ങളെക്കുറിച്ച് ശാസ്ത്രീയ പഠനം നടത്തി ആറു മാസത്തിനകം സമഗ്രമായ മാസ്റ്റര് പ്ലാന് കിഫ്ബിക്ക് സമര്പ്പിക്കും. കസ്റ്റംസ് സൗകര്യങ്ങളൊരുക്കുന്നതിന് ഇലക്ട്രോണിക് ഡാറ്റ ഇന്റര്ഫെയ്സ് സ്ഥാപിക്കാനുള്ള നടപടികള് ആരംഭിച്ചുകഴിഞ്ഞു. തുറമുഖത്തെത്തുന്ന ചരക്കുകള് സൂക്ഷിക്കുന്നതിനുള്ള വെയര്ഹൗസിന്റെ നിര്മാണം ഉടന് ആരംഭിക്കുമെന്നും അദ്ദേഹം അറിയിച്ചു.
ലക്ഷദ്വീപിലേക്ക് നിലവില് ചരക്കുകള് കൊണ്ടുപോവുന്നത് മംഗലാപുരം തുറമുഖത്ത് നിന്നാണെന്നും അഴീക്കല് തുറമുഖം സജ്ജമായാല് വ്യാപാരം ഇവിടേക്ക് മാറുമെന്നും നോര്ത്ത് മലബാര് ചേംബര് ഓഫ് കൊമേഴ്സ് പ്രസിഡന്റ് പി.വി ദീപക് അഭിപ്രായപ്പെട്ടു. ലക്ഷദ്വീപുമായുള്ള വ്യാപാരം ശക്തിപ്പെടുത്തുന്നതിന് തുറമുഖത്ത് ലക്ഷദ്വീപ് കോ-ഓപ്പറേറ്റീവ് ഫെഡറേഷന് ഓഫീസ് ആരംഭിക്കാന് അനുവാദം നല്കണം. തുറമുഖം പ്രവര്ത്തന സജ്ജമാവുന്നതോടെ പ്രദേശത്തെ ടൂറിസം വികസനവും ശക്തിപ്പെടുമെന്നും അദ്ദേഹം അഭിപ്രായപ്പെട്ടു.
പോര്ട്ട് ഓഫീസില് നടന്ന യോഗത്തില് തുറമുഖ ഓഫീസര് ക്യാപ്റ്റന് അശ്വിനി പ്രതാപ്, സീനിയര് പോര്ട്ട് കണ്സര്വേറ്റര് എം സുധീര് കുമാര്, ബ്ലോക്ക് പഞ്ചായത് പ്രസിഡന്റ് കുടുവന് പത്മനാഭന്, അഴീക്കോട് പഞ്ചായത്ത് പ്രസിഡന്റ് പ്രസന്ന കുമാരി, നോര്ത്ത് മലബാര് ചേംബര് ഓഫ് കൊമേഴ്സ് വൈസ് പ്രസിഡന്റ് മാത്യു സാമുവല്, സെക്രട്ടറി സച്ചിന് സൂര്യകാന്ത്, ദിശ പ്രതിനിധി റിയര് അഡ്മിറല് മോഹന് തുടങ്ങിയവരും സംബന്ധിച്ചു.
