പയ്യന്നൂര്‍: ഉത്തര മലബാര്‍ സ്‌കൂള്‍ കലോത്സവം 25 ന് എടാട്ട് എസ്എന്‍ ഇംഗ്ലീഷ് സ്‌കൂളില്‍ നടക്കും. മലബാര്‍ മേഖല അണ് എയ്ഡഡ് സ്‌കൂള്‍ അസോസിയേഷന്റെ ആഭ്യമുഖ്യത്തില്‍ ഒരുക്കുന്ന കലോത്സവത്തിന്റെ ഒരുക്കങ്ങള്‍ പൂര്‍ത്തിയായതായി സംഘാടക സമിതി ഭാരവാഹികള്‍ പത്രസമ്മേളനത്തില്‍ പറഞ്ഞു.
കണ്ണൂര്‍, കാസര്‍കോട്, കോഴിക്കോട് ജില്ലകളിലെ വിവിധ സ്‌കൂളുകളില്‍ നിന്നായി 58 ഇനങ്ങളിലായി 800 ഓളം കലാകാരന്മാരും കലാകാരികളും കലോത്സവത്തില്‍ പങ്കെടുക്കും. കെജി, എല്‍പി, യുപി എന്നീ മൂന്ന് വിഭാഗങ്ങളായി തിരിച്ചാണ് കുട്ടികളുടെ മത്സരം നടക്കുന്നത്. കെ.ജി വിഭാഗത്തില്‍ ഏഴ് ഇനങ്ങളിലും എല്‍.പിയില്‍ 27 ഇനങ്ങളിലും യു.പി.വിഭാഗത്തില്‍ 24 ഇനങ്ങളിലുമാണ് മത്സരം ഉണ്ടാവുക. കലോത്സവ നഗരിയില്‍ പ്രത്യേകം തയ്യാറാക്കിയ ഗംഗ, യമുന, കാവേരി എന്നീ മൂന്ന് വേദികളിലായാണ് മത്സരങ്ങള്‍ അരങ്ങേറുക. 25 ന് രാവിലെ ഒമ്പത് മണിക്ക് രജിസ്‌ട്രേഷന്‍ ആരംഭിക്കും. 9.30 ന് കലോത്സവം തുടങ്ങും. നാടോടിനൃത്തം ( സിംഗിള്‍), സംഘനൃത്തം, ഒപ്പന, തിരുവാതിര തുടങ്ങിയ ഇനങ്ങള്‍ പ്രധാന വേദിയില്‍ ഉച്ചക്ക് രണ്ടിന് ആരംഭിക്കും. കലോത്സവത്തിന്റെയും സാംസ്‌ക്കാരിക സമ്മേളനത്തിന്റെയും ഉദ്ഘാടനം വൈകുന്നേരം അഞ്ചിന് കില ഡയറക്ടര്‍ ഡോ.പി.പി.ബാലന്‍ നിര്‍വ്വഹിക്കും. കുഞ്ഞിമംഗലം ഗ്രാമപഞ്ചായത്ത് വൈസ് പ്രസിഡണ്ട് രാഗിണി അധ്യക്ഷത വഹിക്കും. സിനിമ സീരിയല്‍ താരം ഷാലു കുര്യന്‍ മുഖ്യാതിഥിയാകും. ഗ്രാമ പഞ്ചായത്ത് അംഗം യു ഭാസ്‌ക്കരന്‍, എം പ്രദീപ്കുമാര്‍, സാമൂഹ്യ, രാഷ്‌ട്രീയ രംഗത്തെ മറ്റു പ്രമുഖരും സംബന്ധിക്കും.
സ്‌കൂള്‍ തലങ്ങളിലാണ് കുട്ടികള്‍ മത്സരത്തില്‍ പങ്കെടുക്കുക. വിജയികള്‍ക്ക് സര്‍ട്ടിഫിക്കറ്റും ട്രോഫിയും സ്‌കൂള്‍ തലത്തില്‍ ഏറ്റവും കൂടുതല്‍ പോയിന്റ് നേടുന്ന സ്‌കൂളുകള്‍ക്ക് റോളിംഗ് ട്രോഫിയും സമ്മാനിക്കും. ഇതാദ്യമായാണ് അണ് എയ്ഡഡ് സ്‌കൂളുകളെ പങ്കെടുപ്പിച്ചുകൊണ്ട് മലബാര്‍ മേഖലയില്‍ ഒരു കലോത്സവം നടക്കുന്നത്. ജില്ലാതലങ്ങളിലും സബ് ജില്ലാ തലങ്ങളിലും നടക്കുന്ന സ്‌കൂള്‍ കലോത്സവങ്ങളില്‍ ആയിര കണക്കിന് കുട്ടികള്‍ പഠിക്കുന്ന ആന്‍ എയ്ഡഡ് സ്ഥാപനങ്ങളിലെ കുട്ടികള്‍ക്ക് പങ്കെടുക്കാന്‍ അവസരം ലഭിക്കാത്ത സാഹചര്യത്തിലാണ് അടുത്തിടെ രൂപീകൃതമായ അസോസിയേഷന്‍ സ്വന്തം നിലയില്‍ കലോത്സവം ഏറ്റെടുത്തു നടത്താന്‍ നേതൃത്വം നല്‍കുന്നത്. കലാപരമായും സാഹിത്യപരമായും നല്ല നിലവാരമുള്ള നൂറുകണക്കിന് പ്രതിഭകള്‍ ഇത്തരം സ്ഥാപനങ്ങളില്‍ പഠിക്കുന്നുണ്ട്. അവര്‍ക്കും തങ്ങളുടെ കഴിവുകള്‍ പ്രകടിപ്പിക്കാന്‍ അവസരം ഉണ്ടാകണമെന്നും ഭാരവാഹികള്‍ പറഞ്ഞു.
പത്രസമ്മേളനത്തില്‍ സ്‌കൂള്‍ അസോസിയേഷന്‍ ചെയര്‍മാന്‍ ഉദിനൂര്‍ സുകുമാരന്‍, ജനറല്‍ കണ്‍വീനര്‍ പി.പി.കരുണാകരന്‍ മാസ്റ്റര്‍, ട്രഷറര്‍പി. വിജയന്‍,കണ്‍വീനര്‍ എം. കെ. രാജീവന്‍, പ്രിന്‍സിപ്പാള്‍ വി കെ നാരായണന്‍ മാസ്റ്റര്‍, സി. ഭാസ്‌ക്കരന്‍ എന്നിവര്‍ പങ്കെടുത്തു
