കണ്ണൂര്: ഭിന്നലിംഗക്കാരും പരിഗണന അര്ഹിക്കുന്നവരാണെന്ന ബോധം പൊതുസമൂഹത്തിന് ഉണ്ടാവണമെന്ന് സ്പീക്കര് പി.ശ്രീരാമകൃഷ്ണന്. ജില്ലാപഞ്ചായത്ത് ഹാളില് നടന്ന ട്രാന്സ്ജെന്റര് പദവി ഏകദിന പഠന ശില്പ്പശാല ഉദ്ഘാടനം ചെയ്യുകയായിരുന്നു സ്പീക്കര്. സംസ്ഥാനത്ത് ആദ്യമായാണ് ഒരു ജില്ലാപഞ്ചായത്ത് പദ്ധതിവിഹിതം ഭിന്നലിംഗക്കാരുടെ ഉന്നമനത്തിനായി മാറ്റിവയ്ക്കുന്നത്. ആസൂത്രണം എന്നാല് റോഡും പാലവും മാത്രമല്ലെന്ന ജനകീയ കാഴ്ചപ്പാടിനെ സമഗ്രതയോടെ സമീപിക്കുന്ന ഈ വലിയ മുന്നേറ്റം ജനാധിപത്യത്തിന്റെ വികാസമാണ് തെളിയിക്കുന്നതെന്നും സ്പീക്കര് പറഞ്ഞു.
ട്രാന്സ്ജെന്റേഴ്സിന്റെ പ്രശ്നങ്ങള് ഒരുപാട് തവണ ചര്ച്ച ചെയ്യപ്പെട്ടതാണെങ്കിലും ഇതുവരെ പരിഹരിക്കപ്പെട്ടിട്ടില്ല. നമുക്കുള്ളത് പോലെതന്ന നികുതിപണത്തില് അവകാശം ഇവര്ക്കുമുണ്ട്. മുഖ്യധാരയില് നിന്ന് മാറ്റി നിര്ത്തി ഇവരുടെ പ്രവര്ത്തനങ്ങളെ സംശയത്തോ ടെ നോക്കിക്കണ്ട ബുദ്ധിജീവി സമൂഹമാണ് നമ്മുടേത്. സമൂഹത്തില് നമ്മുടേതായ ഇടങ്ങള് ഉള്ളത് പോലെ ഭിന്നശേഷിക്കാര്ക്കും ഭിന്നലിംഗക്കാര്ക്കും അവരുടേതായ ഇടങ്ങള് ഒരുക്കാന് നമുക്ക് കഴിയണം. ഇത്തരത്തില് ഒരു പദ്ധതി നടപ്പാക്കാന് തയ്യാറായ ജില്ലപഞ്ചായത്ത് അഭിനന്ദനം അര്ഹിക്കുന്നതായും അദ്ദേഹം പറഞ്ഞു. മനുഷ്യാവകാശം ഉയര്ത്തിപ്പിടിച്ച് ഭിന്നലിംഗക്കാര്ക്കും സമൂഹത്തില് സ്ഥാനം നല്കുന്നതിനായാണ് ജില്ലാപഞ്ചായത്ത് ഇത്തരമൊരു പദ്ധതി ആവിഷ്ക്കരിച്ചതെന്ന് അധ്യക്ഷത വഹിച്ച ജില്ലാപഞ്ചായത്ത് പ്രസിഡന്റ് കെ.വി സുമേഷ് പറഞ്ഞു. ജില്ലാ ഗവ പ്ലീഡര് ബി.പി ശശീന്ദ്രന്, ജില്ലാപഞ്ചായത്ത് വൈസ് പ്രസിഡന്റ് പി.പി ദിവ്യ, സ്റ്റാന്റിംഗ് കമ്മറ്റി ചെയര്മാന്മാരായ കെ.പി ജയബാലന് മാസ്റ്റര്, വി.കെ സുരേഷ് ബാബു, ടി.ടി.റംല, ജില്ലാപഞ്ചായത്ത് അംഗങ്ങളായ അജിത് മാട്ടൂല്, അന്സാരി തില്ലങ്കേരി, ജോയ് കൊന്നക്കല്, ഹെല്ത്ത് ലൈന് ഡയറക്ടര് മോഹന് മാങ്ങാട് തുടങ്ങിയവര് സംസാരിച്ചു. ട്രാന്സ്ജെന്റര് പദവി-പ്രശ്നങ്ങള് എന്ന വിഷയത്തില് ഇഷ കിഷോര് സംസാരിച്ചു.
