കണ്ണൂര്: പ്രവര്ത്തന മികവിനുള്ള അംഗീകാരമായി നാലാമതും വേങ്ങാട് സാന്ത്വനത്തിന് യൂത്ത് അവാര്ഡ്. 2015 -16 പ്രവര്ത്തന വര്ഷത്തെ പരിപാടികള് വിലയിരുത്തിയാണ് കേന്ദ്ര യുവജനകാര്യ-സ്പോര്ട്സ് മന്ത്രാലയം നെഹ്റു യുവകേന്ദ്രയുടെ ജില്ലയിലെ മികച്ച സംഘടനക്കുള്ള യൂത്ത് അവാര്ഡ് സാന്ത്വനത്തിന് ലഭിച്ചത്. ജില്ലാ കലക്ടര് ചെയര്മാനായ കമ്മറ്റിയാണ് അവാര്ഡ് നിര്ണയം നടത്തിയത്. കഴിഞ്ഞ ദിവസം കണ്ണൂര് കലക്ടറേറ്റ് കോണ്ഫറന്സ് ഹാളില് നടന്ന ചടങ്ങില് മന്ത്രി രാമചന്ദ്രന് കടന്നപ്പള്ളിയില് നിന്നും സാന്ത്വനം ഭാരവാഹികള് അവാര്ഡ് ഏറ്റുവാങ്ങി.
2005ലാണ് സാന്ത്വനം പ്രവര്ത്തനമാരംഭിച്ചത്. 2009 -10 പ്രവര്ത്തന വര്ഷം ജില്ലയിലെ മികച്ച സംഘടനക്കുള്ള അവാര്ഡും സംസ്ഥാനത്തെ മികച്ച സംഘടനക്കുള്ള അവാര്ഡും നെഹ്റു യുവകേന്ദ്രയില് നിന്നും ലഭിച്ചിരുന്നു. 2014-15 വര്ഷം സംസ്ഥാന യുവജന ക്ഷേമബോര്ഡിന്റെ ജില്ലയിലെ മികച്ച സംഘടനക്കുള്ള അവാര്ഡും സാന്ത്വനത്തിനാണ് ലഭിച്ചത്. സാന്ത്വനം ചെയര്മാന് പ്രദീപന് തൈക്കണ്ടിക്കും സെക്രട്ടറി സനോജ് നെല്യാടനും സംസ്ഥാന യുവജന ക്ഷേമബോര്ഡിന്റെയും നെഹ്റു യുവകേന്ദ്രയുടെയും മികച്ച യുവജന പ്രവര്ത്തകര്ക്കുള്ള യൂത്ത് അവാര്ഡ് ലഭിച്ചിരുന്നു.
സാമ്പ്രദായിക പരിപാടികളില് നി്നനും വിഭിന്നമായി സമൂഹം ആവശ്യപ്പെടുന്ന പ്രശ്നങ്ങളില് ഇടപെട്ട് പ്രവര്ത്തനങ്ങള് സംഘടിപ്പിക്കുകയാണ് സാന്ത്വനത്തിന്റെ രീതി. കൊടുവള്ളിയില് നിര്ധനരായ കുടുംബത്തിന് നാട്ടുകാര് വീട് നിര്മ്മിച്ച് നല്കിയപ്പോള് വയറിംഗ് പ്രവൃത്തി പൂര്ണമായും ഏറ്റെടുത്ത് നടത്തി വൈദ്യുതി കണക്്ഷന് വാങ്ങി നല്കിയത് സാന്ത്വനമായിരുന്നു. ചാലയില് ടാങ്കര് ദുരന്തത്തിന് ശേഷം ഒരാഴ്ച നടന്ന ശുചീകരണ പ്രവൃത്തിയില് സാന്ത്വനത്തിന്റെ വളണ്ടിയര്മാര് ഉണ്ടായിരുന്നു. കാശ്മീരില് ദുരിതമുണ്ടായപ്പോള് കമ്പിളി പുതപ്പുകളും ചെന്നൈ പ്രളയ ദുരിതമുണ്ടായപ്പോള് 20 പെട്ടി വസ്ത്രങ്ങളും ഭക്ഷണ സാധനങ്ങളും ജില്ലാ കലക്ടര്ക്ക് നല്കിയാണ് സാന്ത്വനം മാതൃകയായത്. സ്പെഷ്യല് ഒളിമ്പിക്സ് മെഡല് ജേതാവ് ഊര്പ്പള്ളിയിലെ മുഹമ്മദ് അജ്മലിന് എന്എസ്എസ് യൂനിറ്റ് വീട് നിര്മ്മിച്ച് നല്കുമ്പോഴും സാന്ത്വനം സഹായ ഹസ്തവുമായി രംഗത്തുണ്ടായിരുന്നു. ചാലാട് ഡ്രീംസ്, പാലാപറമ്പ്് സ്നേഹനികേതന്, തലശ്ശേരി സമരിറ്റന് ഹോം തുടങ്ങിയ അഗതി മന്ദിരങ്ങളിലെ അന്തേവാസികള്ക്ക് സാന്ത്വന സദ്യ നല്കാറുണ്ട്. തെരുവുകളില് കഴിയുന്നവര്ക്ക് ഞായറാഴ്ചകളില് സ്നേഹസദ്യയും നല്കിയിരുന്നു.
വിവിധ സ്കൂളുകളിലെ നിര്ധനരായ പഠിക്കാന് മിടുക്കരായ 25 വിദ്യാര്ത്ഥികള്ക്ക് പഠന സ്കോളര്ഷിപ്പ് നല്കാറുണ്ട്്. മൂന്ന് വിദ്യാര്ത്ഥികളെ ദത്തെടുത്ത് അവരുടെ പഠന ചെലവും നല്കിവരുന്നുണ്ട്്. ശാരീരികമായി അവശതയനുഭവിക്കുന്നവര്ക്കായി 1250 ഓളം വീല് ചെയറുകള് സാന്ത്വനം വിതരണം ചെയ്തിരുന്നു. നിരവധി മെഡിക്കല് ക്യാമ്പുകളും പരിസ്ഥിതി സംരക്ഷണപ്രവര്ത്തനങ്ങളുമെല്ലാം സാന്ത്വനം നടത്തിയിട്ടുണ്ട്്.
മാങ്ങാട്ടിടം പഞ്ചായത്തിലെ കിരാച്ചി കേന്ദ്രമാക്കിയാണ് സാന്ത്വനത്തിന്റെ പ്രവര്ത്തനം. എ കൃഷ്ണന് മാസ്റ്റര് രക്ഷാധികാരിയും പ്രദീപന് തൈക്കണ്ടി ചെയര്മാനും സനോജ് നെല്യാടന് സെക്രട്ടറിയുമായ കമ്മറ്റിയാണ് പ്രവര്ത്തനങ്ങള്ക്ക് നേതൃത്വം വഹിക്കുന്നത്.
