കാലടി: പകല്വീടിന്റെ മറവില് നടത്തിപ്പുകാരായ ശാന്തികേന്ദ്രം ചാരിറ്റബിള് ട്രസ്റ്റ് പണം പിരിവെടുക്കുന്നുവെന്ന പരാതിയില് പഞ്ചായത്തിന്റെ പകല്വീട് അടച്ചുപൂട്ടി. നടത്തിപ്പുകാരന്റെ ബാങ്ക് അക്കൗണ്ടിലേക്കാണ് പിരിവെടുക്കുന്ന പണം സ്വീകരിച്ചിരുന്നതെന്നും ഇയാളുടെ ഭാര്യയും മക്കളും ബന്ധുക്കളും മാത്രമാണ് ട്രസ്റ്റില് അംഗങ്ങളായിരുന്നതെന്നും കണ്ടെത്തിയിരുന്നു. ഇതേത്തുടര്ന്നാണ് ശാന്തി കേന്ദ്രം ചാരിറ്റബിള് ട്രസ്റ്റിനെ പകല്വീട് നടത്തിപ്പ് ചുമതലയില് നിന്ന് പുറത്താക്കി സ്ഥാപനം അടച്ചുപൂട്ടിയത്.
പകല്വീടിന്റെ അടിസ്ഥാന സൗകര്യം, ഭക്ഷണം ഉള്പ്പെടെ സൗകര്യങ്ങള് പഞ്ചായത്താണ് നല്കുന്നത്. നടത്തിപ്പുമാത്രമാണ് ചാരിറ്റബിള് ട്രസ്റ്റിനെ ഏല്പ്പിച്ചിരുന്നത്. ഇക്കാര്യങ്ങള് മറച്ചുവച്ചായിരുന്നു വ്യാപക പണപ്പിരിവ്.
പകല്വീടിന്റെ ഉദ്ഘാടനത്തിന്റെ ചിത്രം അടിച്ചിറക്കിയ നോട്ടീസുമായി ഇത് തങ്ങളുടെ സംരംഭമാണെന്നു പ്രചരിപ്പിച്ചാണ് ചാരിറ്റബിള് ട്രസ്റ്റ് പണം പിരിച്ചത്. പണപ്പിരിവിനെക്കുറിച്ച് പരാതി പറഞ്ഞെങ്കിലും പഞ്ചായത്ത് നടപടികളൊന്നും സ്വീകരിച്ചില്ല. കാലടി പോലീസ് എസ്ഐ ചികിത്സാ സഹായം നല്കുന്ന ചിത്രവും ഇത്തരത്തില് ദുരൂപയോഗം ചെയ്തു. പിരിവ് മറ്റു ജില്ലകളിലേക്ക് മാറ്റി. വിവിധ തുകകള് രേഖപ്പെടുത്തിയ രസീതു നല്കി ഗ്രാമങ്ങളില് നിരവധി വനിതകളെ കമ്മീഷന് വ്യവസ്ഥയില് പണം പിരിക്കാന് നിയോഗിച്ചിരുന്നു. ഇക്കാര്യങ്ങള് ചില മാധ്യമങ്ങളില് വാര്ത്തവന്നതോടെയാണ് പഞ്ചായത്ത് നടപടിയിലേക്ക് കടന്നത്.
കാലടിദേശ സംരക്ഷണ സമിതി പണപ്പിരിവിനെക്കുറിച്ച് അന്വേഷണം ആവശ്യപ്പെട്ടിരുന്നു. പകല്വീടിനെ മറയാക്കി സ്വന്തം അക്കൗണ്ടില് ഇയാള് സ്വീകരിച്ച പണം സാധുജനസേവനത്തിന് വിനിയോഗിക്കണമെന്നും സമിതി ആവശ്യപ്പെട്ടു. പകല്വീട് താത്ക്കാലികമായാണ് നിര്ത്തലാക്കിയതെന്നും സേവന മനോഭാവമുള്ള ട്രസ്റ്റിനെ കണ്ടെത്തി നടത്തിപ്പ് ഏല്പ്പിക്കുമെന്നും പഞ്ചായത്ത് പ്രസിഡന്റ് കെ.തുളസി പറഞ്ഞു.
