കണ്ണൂര്: ഇപിഎഫ്ഒ വഴി നല്കുന്ന സാമൂഹിക സുരക്ഷ ആനുകൂല്യങ്ങള് ലഭ്യമാകാതെ തഴയപ്പെട്ട എല്ലാ തൊഴിലാളികളുടേയും വിവരങ്ങള് സ്വമേധയ നല്കാന് തൊഴിലുടമകള്ക്കായി എംപ്ലോയേഴ്സ് പ്രോഫിഡന് ഫണ്ട് ഓര്ഗനൈസേഷന് രാജ്യവ്യാപകമായി സംഘടിപ്പിക്കുന്ന എംപ്ലോയീസ് എന്റോള്മെന്റ് ക്യാമ്പയിന് 2017 (തൊഴിലാളികളുടെ പ്രവേശന പ്രചാരണം ) എല്ലാവരും പ്രയോജനപ്പെടുത്തണമെന്ന് കണ്ണൂര് റീജണല് പ്രോഫിഡന് ഫണ്ട് കമ്മീഷണര് കെ.ശെല്വരാജ് വാര്ത്താ സമ്മേളനത്തില് അറിയിച്ചു. 2017 ജനുവരി 1 മുതല് മാര്ച്ച് 31 വരേയാണ് ക്യാമ്പയിന് നടക്കുന്നത്. ഈ കാലയളവില് പ്രോവിഡന് ഫണ്ടില് അംഗമാകുന്ന തൊഴിലാളികള്ക്കും അംഗങ്ങളെ ചേര്ക്കുന്ന തൊഴിലുടമകള്ക്കും കേന്ദ്ര സര്ക്കാര് നിരവധി ആനുകൂല്യങ്ങള് പ്രഖ്യാപിച്ചിട്ടുണ്ടെന്നും അദ്ദേഹം പറഞ്ഞു. തൊഴിലാളികളുടെ പഴയകാല വിഹിതം അവരുടെ വേതനത്തില് നിന്നും തൊഴിലുടമ ഈടാക്കിയിട്ടില്ലെങ്കില് പുതുതായി ഇവരെ പിഎഫില് ചേര്ക്കുമ്പോള് തൊഴിലുടമ തൊഴിലാളി വിഹിതം അടയ്ക്കേണ്ടതില്ല. ഈ പദ്ധതി പ്രകാരം പിഎഫില് ചേരുന്ന തൊഴിലാളിക്കായി പ്രോവിഡന്റ് ഫണ്ടില് ഒരു വ്യക്തിക്ക് ഒരു വര്ഷത്തേക്ക് 1 രൂപ മാത്രം പിഴ നല്കിയില് മതി. മാത്രമല്ല ഈ കാലയളവില് ഓഫീസ് സംബന്ധമായ ചാര്ജ്ജുകളൊന്നും ഈടാക്കുന്നതല്ല. തൊഴിലാളികളുടെ വിവരങ്ങള് പ്രഖ്യാപിച്ചതിനു ശേഷം 15 ദിവസത്തിനുളളില് തൊഴിലുടമയുടെ വിഹിതം അടയ്ക്കേണ്ടതാണ്. 2016 ആഗസ്തിനു ശേഷം ചേരുന്ന തൊഴിലാളികളുടെ വിഹിതമായി 8.33 ശതമാനം തുക പ്രധാനമന്ത്രി ജീവന് പ്രമാണ് പത്രം മുഖാന്തിരം കേന്ദ്ര സര്ക്കാര് അടക്കും. ടെക്സറ്റയില്സ് ഇന്ഡസ്ട്രീസിനു കീഴില് പുതുതായി ചേരുന്ന തൊഴിലാളികളുടെ തൊഴിലുടമ നല്കേണ്ട 12 ശതമാനം വിഹിതം മുഴുവനായും ഗവണ്മെന്റ് അടക്കുമെന്നും അദ്ദേഹം പറഞ്ഞു.
കൂടുതല് മെച്ചപ്പെട്ട സേവനം ലഭ്യമാക്കുന്നതിനായി ഇപിഎഫ് അംഗങ്ങളായ തൊഴിലാളികളും പെന്ഷനേഴ്സും അവരുടെ ആധാര് നമ്പര് പിഎഫ് ഓഫീസില് നല്കണമെന്നും അദ്ദേഹം പറഞ്ഞു. വാര്ത്താ സമ്മേളനത്തില് റീജണല് പ്രോഫിഡന് ഫണ്ട് അസിസ്റ്റന്റ് കമ്മീഷണര് സുരേഷ് ബേബി, സീനിയര് സൂപ്രണ്ട് സുരേഷ് കുമാര് എന്നിവര് പങ്കെടുത്തു.
