അഴീക്കല് പാമ്പാടി ആലിന്കീഴില് ക്ഷേത്രത്തെ അപവാദപ്രചാരണം എന്ന പേരില് പി.ജയരാജനും എം.വി.ജയരാജനും ക്ഷേത്രദര്ശനം നടത്തുകയും ഭഗവതിയുടെ തിരുമുമ്പില് വെച്ച് ആചാരസ്ഥാനികരുമായി സംസാരിച്ചുവെന്നും കണ്ടു. തീയ്യ സമുദായത്തിന്റെ ഭഗവതി ക്ഷേത്രമാണെങ്കിലും മുഴുവന് ഹിന്ദുക്കളുടെയും ക്ഷേത്രവും ഭഗവതിയുമാണിത്. വിശ്വാസമില്ലാത്ത ജയരാജന്മാര്ക്ക് രാഷ്ട്രീയം കളിക്കാനുള്ള ഇടമാക്കി കാവുകളെയും ക്ഷേത്രങ്ങളെയും തങ്ങളുടെ വരുതിയില് നിര്ത്താമെന്ന ചിന്ത ശുദ്ധ ഭോഷ്ക്കാണ്. പണ്ട് ഗുരുവായൂര് ക്ഷേത്ര പ്രവേശനവും വൈക്കം ക്ഷേത്ര സത്യഗ്രഹവുമൊക്കെ നടന്നത് ഹിന്ദുക്കള്ക്കിടയിലുള്ള യാഥാസ്ഥിതിക വരേണ്യവര്ഗ്ഗത്തെ ചൊടിപ്പിച്ചെങ്കില് ഇന്ന് അവരുടെ പിന്തലമുറക്കാരായി മാറുകയാണോ പി.കൃഷ്ണപിള്ളയുടെയും എകെജിയുടെയും പേരില് അറിയപ്പെടുന്ന കമ്മ്യൂണിസ്റ്റുകാര്. സാമുദായികമായി വൈവിധ്യങ്ങളുണ്ടെങ്കില് അതിന് ഹിന്ദുക്കളുടെ ഇടയില്ത്തന്നെ പരിഹാരം കാണാന് ഹൈന്ദവ സന്യാസിശ്രേഷ്ഠന്മാര്ക്കും മറ്റ് ഉല്പ്പതിഷ്ണുക്കളായ ഹിന്ദു സംഘടനാ നേതൃത്വവും തയ്യാറാവണം. എല്ലാ വിഷയങ്ങളും ഞങ്ങളില്ക്കൂടി മാത്രം നടത്തിയാല് മതി എന്ന ധാര്ഷ്ട്യം കളഞ്ഞ് സമൂഹത്തില് ഒരുമയും രഞ്ജിപ്പും ഉണ്ടാക്കാന് ശ്രമിക്കാതെ വിഷയം പറയുന്നവരെ കൊച്ചാക്കുന്ന പ്രവണത ജയരാജന്മാര് ഒഴിവാക്കുന്നതല്ലേ നല്ലത്.
ഹരിജന് ഹിന്ദു, തീയ്യഹിന്ദു, നായര്ഹിന്ദു, നമ്പൂതിരി ഹിന്ദു എന്ന വേലിക്കെട്ടില് നിര്ത്താതെ സമസ്ത ഹിന്ദുക്കളും ആരാധിക്കുന്ന ഇടമായി ക്ഷേത്രങ്ങളും കാവുകളും മാറണം. മാറാന് കഴിയാത്ത ഇത്തരം കേന്ദ്രങ്ങള് കമ്മ്യൂണിസ്റ്റുകാരന്റെ ഭാഷയില് പൊളിച്ച് കപ്പ നടണം. അല്ലാതെ കമ്മറ്റിയില് കടന്നുകൂടി തന്റെ രാഷ്ട്രീയ ആഭാസങ്ങള് പ്രകടിപ്പിക്കാന് ഒരിടമാക്കരുത്. കാവുകളിലെയും ക്ഷേത്രങ്ങളിലെയും ആചാരങ്ങളില് യോജിപ്പിക്കാന് ശ്രമിക്കാതെ ഏതെങ്കിലും പിന്നോക്ക സമുദായത്തെ ഹിന്ദു സമാജത്തില് നിന്നും അകറ്റി നിര്ത്താന് ഉതകുന്ന പ്രസ്താവനകളും പ്രവര്ത്തനങ്ങളും ദൈവവിശ്വാസികളായ ഹിന്ദുക്കള് തിരിച്ചറിയണം.
രാഷ്ട്രീയക്കാരായ നേതാക്കള് രാഷ്ട്രീയം പറഞ്ഞുകൊള്ളട്ടെ. സാമൂഹ്യ-വിശ്വാസ പ്രമാണങ്ങള് പണ്ട് ചെയ്തുവരുന്നതാണെന്ന ഒരൊറ്റ കാരണത്താല് മാറ്റുവാന് സാധിക്കില്ലെന്ന കാഴ്ചപ്പാട് വികസിത സമൂഹത്തിന് ഭൂഷണമല്ല. ഹിന്ദുക്കള് ജാതിക്കും രാഷ്ട്രീയത്തിനും അതീതമായി ചിന്തിക്കുവാന് തുടങ്ങിയാല് ഈ രാഷ്ട്രീയക്കാരുടെ പണിപോകുമെന്ന് അവര്ക്കറിയാമെന്നതു കൊണ്ടാണ് ഇത്തരം പ്രശ്നങ്ങളെ സങ്കീര്ണമാക്കുവാന് ഇവര് മുന്കയ്യെടുക്കുന്നത് എന്ന് പാവങ്ങളായ ഹിന്ദു സഹോദരങ്ങള് മനസ്സിലാക്കിയാല് നിങ്ങള്ക്കും നിങ്ങളുടെ ഭാവി തലമുറക്കും നല്ലത്. മാറ്റുവിന് ചട്ടങ്ങളെ എന്ന കവിഭാഷ്യം ഇവിടെ സ്മരണീയം.
കെ.വി.ജയരാജന് മാസ്റ്റര്
കണ്ണൂര്
