കണ്ണൂര്: സംസ്ഥാനതല പഞ്ചായത്ത് ദിനാഘോഷം ഈ വര്ഷം 18, 19 തീയ്യതികളില് കണ്ണൂര് മസ്കോട്ട് പാരഡൈസ് ഓഡിറ്റോറിയത്തില് വിപുലമായ പരിപാടികളോടെ നടക്കും. 19ന് രാവിലെ 11 മണിക്ക് തദ്ദേശസ്വയംഭരണ മന്ത്രി ഡോ.കെ.ടി.ജലീലിന്റെ അദ്ധ്യക്ഷതയില് ദിനാഘോഷം കേരള ഗവര്ണര് ജസ്റ്റിസ് (റിട്ട) പി.സദാശിവം ഉദ്ഘാടനം ചെയ്യും. ചടങ്ങില് പ്രതിപക്ഷ നേതാവ് രമേശ് ചെന്നിത്തല, മന്ത്രിമാരായ കടന്നപ്പളളി രാമചന്ദ്രന്, കെ.കെ.ശൈലജ എന്നിവര് പങ്കെടുക്കുമെന്നും ജില്ലാ പഞ്ചായത്ത് പ്രസിഡന്റ് കെ.വി.സുമേഷ് വാര്ത്താസമ്മേളനത്തില് അറിയിച്ചു.
17ന് രാവിലെ സ്വഗതസംഘം ചെയര്മാനും ജില്ലാ പഞ്ചായത്ത് പ്രസിഡന്റുമായ കെ.വി.സുമേഷ് എക്സിബിഷന് ഉദ്ഘാടനം ചെയ്യും. സംസ്ഥാനത്തെ 14 ജില്ലകളില് നിന്ന് തെരഞ്ഞെടുക്കപ്പെടുന്ന നൂതന പദ്ധതികളുടെ ആവിഷ്കാരവും കുടുംബശ്രീ, ഐകെഎം, ക്രൂസ്, ശുചിത്വമിഷന്, കില, അനര്ട്ട് തുടങ്ങിയ ഏജന്സികളുടെ സ്റ്റാളുകളും പ്രദര്ശനത്തില് ഉള്പ്പെടുത്തും.
18 ന് രാവിലെ 9.30ന് കേരള ഗ്രാമപഞ്ചായത്ത് അസോസിയേഷന് പ്രസിഡന്റ് അഡ്വ. തുളസീഭായ് പത്മനാഭന് പതാക ഉയര്ത്തുന്നതോടെ ദിനാഘോഷപരിപാടികള്ക്ക് തുടക്കമാവും. തുടര്ന്ന് അധികാരവികേന്ദ്രീകരണവും മാറുന്ന കേരളവും എന്ന വിഷയത്തില് നടക്കുന്ന സെമിനാര് സംസ്ഥാന ആസൂത്രണ ബോര്ഡ് വൈസ് ചെയര്മാന് വി.കെ.രാമചന്ദ്രന് ഉദ്ഘാടനം ചെയ്യും. ആസൂത്രണ ബോര്ഡ് അംഗം ഡോ. കെ.എന്. .ഹരിലാല് അദ്ധ്യക്ഷത വഹിക്കുന്ന ചടങ്ങില് ജെയിംസ് മാത്യു, എംഎല്എ പഞ്ചായത്ത് ഡയറക്ടര് പി.ബാലകിരണ് തുടങ്ങിയവര് പങ്കെടുക്കും.
വൈകുന്നേരം 3 മണിക്ക് കണ്ണൂര് എസ്എന് പാര്ക്കിന് സമീപത്തുനിന്ന് ആരംഭിക്കുന്ന ഘോഷയാത്രയില് ജില്ലയിലെ കുടുംബശ്രീ അംഗങ്ങള്, സാമൂഹ്യ സാംസ്കാരിക രംഗങ്ങളിലെ പ്രമുഖര്, ജനപ്രതിനിധികള്, ഉദ്യോഗസ്ഥര് തുടങ്ങിയവര് പങ്കെടുക്കും. ജില്ലയിലെ 71 ഗ്രാമപഞ്ചായത്തുകളുടെ നേതൃത്വത്തിലുള്ള വിവിധ കലാരൂപങ്ങള് അണിനിരക്കുന്ന ഘോഷയാത്ര മുന്സിപ്പല് ഹയര് സെക്കന്ററി സ്കൂള് ഓഡിറ്റോറിയത്തില് സമാപിക്കും. വൈകിട്ട് 4.30ന് ഇന്ത്യന് സാമ്പത്തിക മേഖലയിലെ പ്രതിസന്ധികള് എന്ന വിഷയത്തില് നടക്കുന്ന സെമിനാര് വിദ്യാഭ്യാസ മന്ത്രി പ്രഫ. സി. രവീന്ദ്രനാഥ് ഉദ്ഘാടനം ചെയ്യും. ഡോ. രാജന്ഗുരുക്കള് മോഡറേറ്ററാവും.
സംസ്ഥാനതല പഞ്ചായത്ത് ദിനാഘോഷത്തിനുളള ഒരുക്കങ്ങള് പൂര്ത്തിയായി വരുന്നതായി കലക്ടറേറ്റ് ചേംബര് ഹാളില് നടന്ന വാര്ത്താ പത്രസമ്മേളനത്തില് ചെയര്മാന് കെ.വി.സുമേഷ്, ജനറല് കണ്വീനര് എം.എസ്.നാരായണന് നമ്പൂതിരി എന്നിവര് അറിയിച്ചു.
