കണ്ണൂര്: സിപിഎം നിയന്ത്രണത്തിലുള്ള അഴീക്കല് പാമ്പാടി ആലിന്കീഴില് ക്ഷേത്രത്തില് ഉത്സവത്തോടനുബന്ധിച്ച് പട്ടികജാതി ദളിത് വിഭാഗങ്ങളോട് അയിത്തം കല്പ്പിച്ച സംവത്തില് ക്ഷേത്രഭാരവാഹികള്ക്കെതിരെ വളപട്ടണം പോലീസ് കേസെടുത്തു. ജെആര്എസ് സംസ്ഥാന ജനറല് സെക്രട്ടറി തെക്കന് സുനില് കുമാറിന്റെ പരാതി പ്രകാരം വളപട്ടണം എസ്ഐ ശ്രീജിത്ത് കൊടേരിയാണ് കേസെടുത്തത്. ജില്ലാ കലക്ടര്ക്ക് നല്കിയ പരാതിയുടെ അടിസ്ഥാനത്തില് കലക്ടര് കേസെടുത്താന് എസ്പിക്ക് നിര്ദ്ദേശം നല്കുകയായിരുന്നു. രണ്ടു വര്ഷം മുമ്പ് കണ്ണൂര് ജില്ലാ കലക്ടറായിരുന്ന പി.ബാലകിരണ് ക്ഷേത്രത്തിലെ അയിത്താചരണം നിര്ത്താന് നിര്ദ്ദേശിച്ചുകൊണ്ട് ക്ഷേത്രാധികാരികള്ക്ക് നല്കിയ ഉത്തരവ് ക്ഷേത്ര ഭരണസമിതി ലംഘിക്കാന് നീക്കം നടത്തുന്നുവെന്ന് ചൂണ്ടിക്കാട്ടി കഴിഞ്ഞ ആറാം തീയ്യതിയും ഉത്തരവ് ലംഘിച്ചുവെന്ന് ചൂണ്ടിക്കാട്ടി കഴിഞ്ഞ എട്ടിനും നല്കിയ പരാതിയുടെ അടിസ്ഥാനത്തിലാണ് ക്ഷേത്ര ഭാരവാഹികള്ക്കെതിരെ കേസെടുത്തിരിക്കുന്നത്.
തിരുവായുധം എഴുന്നള്ളത്തില് ദളിത് വിഭാഗക്കാരുടെ വീടുകള് മാത്രം ഒഴിവാക്കി വിവേചനം കാണിച്ചതിനെതിരെയാണ് കേസെടുത്തിട്ടുള്ളത്. പൗരാവകാശ സംരക്ഷണ നിയമപ്രകാരമാണ് കേസ്. 2014 ലും സമാനമായ രീതിയില് സുനില് കുമാര് വളപട്ടണം പോലീസില് പരാതി നല്കിയിരുന്നു.
സിപിഎം നേതൃത്വത്തിലുള്ള കമ്മറ്റി ഭരിക്കുന്ന ആലിന്കീഴില് ക്ഷേത്രത്തിലെ ഉത്സവത്തോടനുബന്ധിച്ച് തിരുവായുധം എഴുന്നള്ളത്ത് പരിപാടിയില് പുലയ സമുദായ വിഭാഗത്തിന് അയിത്തം കല്പ്പിച്ചതില് പ്രതിഷേധിച്ച് ജെആര്എസ് കലക്ടറേറ്റ് പടിക്കല് അനിശ്ചിതകാല സമരം നടത്തിയിരുന്നു. സമരത്തിന് ബിജെപി പിന്തുണ പ്രഖ്യാപിച്ചിരുന്നു. കഴിഞ്ഞദിവസം സിപിഎം കണ്ണൂര് ജില്ലാ സെക്രട്ടറി പി.ജയരാജന് ക്ഷേത്രത്തില് സന്ദര്ശനം നടത്തി അവിടെ യാതൊരുവിധ അയിത്തവും നടക്കുന്നില്ലെന്ന് പ്രഖ്യാപിക്കുകയുണ്ടായി. എന്നാല് ഉത്സവവുമായി ബന്ധപ്പെട്ട് ക്ഷേത്രത്തിലെ സിപിഎം ഭരണസമിതി നടത്തിയ അയിത്താചരണത്തിനെതിരെ പോലീസ് കേസെടുത്തതോടെ ജയരാജന്റെ സകല വാദങ്ങളും പൊളിഞ്ഞിരിക്കുകയാണ്.
