കാക്കനാട്: നഗരത്തില് ഹോസ്റ്റല് ഇല്ലാത്തത് വനവാസി വിദ്യാര്ഥികളുടെ ഉപരിപഠനം അനിശ്ചിതത്തില്. 50 കോടി മുടക്കി കൊച്ചിയില് വനവാസി ഹെറിറ്റേജ് നിര്മിക്കുന്ന സര്ക്കാര് കൊച്ചി ഉള്പ്പെടെ പ്രധാന നഗരങ്ങളില് വനവാസകള്ക്ക് ഉപരിപഠനത്തിന് ഒരിടത്തും ഹോസ്റ്റല് സൗകര്യമില്ല. വംശഹത്യ നേരിടുന്ന ആദിവാസികളുടെ ശേഷിപ്പുകളെ കാഴ്ചവസ്തുവാക്കാനുള്ള സ്ഥാപനമാണ് കൊച്ചിയില് നിര്മാണം പുരോഗമിക്കുന്ന ഹെറിറ്റേജ്. കോടികള് മുടക്കി ഹെറിറ്റേജ് നിര്മിക്കുന്നിടത്താണ് വനവാസി വിദ്യാര്ഥികള്ക്ക് ഹോസ്റ്റല് സൗരക്യമില്ലാത്തത്.
പട്ടികജാതി വികസനവകുപ്പിന്റെ നിയന്ത്രണത്തില് എറണാകുളം, തിരുവനന്തപുരം, കോഴിക്കോട് ജില്ലകളില് നിലവിലുള്ള ഈ മൂന്ന് ഹോസ്റ്റലുകള് നാല് ദശകം മുമ്പ് സ്ഥാപിച്ചതും ഇവയെല്ലാം കാലഹരണപ്പെട്ടതുമാണ്. വികസനവകുപ്പിന്റെ ഹോസ്റ്റലുകളിലാവട്ടെ ആദിവാസി വിദ്യാര്ത്ഥികള്ക്ക് പരിമിതമായ താമസസൗകര്യങ്ങള് മാത്രമേ ലഭിക്കുന്നുള്ളു. എറണാകുളം മഹാരാജാസ് സര്ക്കാര് ഉടമസ്ഥതയിലുള്ള കേരളത്തിലെ സ്വയംഭരണസ്ഥാപനമാണെങ്കിലും വനവാസി വിദ്യാര്ത്ഥികള്ക്ക് ഹോസ്റ്റല് സൗകര്യമില്ല. ലോ കോളേജ് തുടങ്ങിയ സ്ഥാപനങ്ങളിലാകട്ടെ വളരെ പരിമിതമായ സീറ്റുകള് മാത്രമുള്ളതിനാല് വനവാസികള് ഉള്പ്പെടെ ദുര്ബലവിഭാഗം വിദ്യാര്ത്ഥികള്ക്ക് ഹോസ്റ്റല് പ്രവേശനം ലഭിക്കാറില്ല. ഉപരിപഠനത്തിന് ഹോസ്റ്റല് സൗകര്യ ഇല്ലാത്തതിനാല് നിരവധി വനവാസി, ദലിത് വിദ്യാര്ത്ഥികള് ഇതിനോടകം പഠനം ഉപേക്ഷിച്ചു.
ഇടമലക്കുടി, അട്ടപ്പാടി പ്രദേശങ്ങളില് നിന്നും കൊച്ചി നഗരത്തിലെ കലാലയങ്ങളില് പഠിക്കാനെത്തിയ നിരവധി വിദ്യാര്ത്ഥികള്ക്ക് പഠനം മുന്നോട്ടുകൊണ്ടുപോകാന് കഴിയാത്ത സ്ഥിതിയിലാണിപ്പോള്. മഹാരാജാസില് പ്രവേശനം ലഭിച്ച അഞ്ച് വിദ്യാര്ഥികളാണ് താമസത്തിനും, ഭക്ഷണത്തിനും വകയില്ലാതെ തിരിച്ചുപോയത്. കാരുണ്യത്തിനായി നിരവധിപേരുടെ കതകില് മുട്ടിയിട്ടും പട്ടികവര്ഗ ക്ഷേമ വകുപ്പ് പോലും കണ്ണ് തുറന്നില്ല. സംസ്ഥാന മനുഷ്യാവകാശകമ്മീഷന് ഇടപെട്ട് അധികാരികള്ക്ക് നോട്ടീസ് അയച്ചതിനെ തുടര്ന്ന് അട്ടപ്പാടിയിലെ മൂന്ന് വിദ്യാര്ത്ഥികള്ക്ക് എറണാകുളം പോസ്റ്റ് മെട്രിക് ഹോസ്റ്റലില് പ്രവേശനം നല്കിയിട്ടുണ്ടെങ്കിലും വനവാസി, ദലിത് വിദ്യാര്ത്ഥികള്ക്ക് ഉന്നതപഠനം നിഷേധിക്കുന്ന സാഹചര്യമാണ് ഇപ്പോഴും.
ഹെറിറ്റേജ് കെട്ടിടം വനവാസി വിദ്യാര്ത്ഥികള്ക്കുള്ള ഹോസ്റ്റല്, ഉന്നതപഠന സംവിധാനങ്ങളാക്കി മാറ്റണമെന്നാവശ്യപ്പെട്ടു പ്രക്ഷോഭം സംഘടിപ്പിക്കാനുള്ള തയ്യാറെടുപ്പിലാണ് സംഘടനകള്. കാക്കനാട് യൂത്ത് ഹോസ്റ്റല് ഞായറാഴ്ച കൂടുന്ന പ്രക്ഷോഭ കണ്വെന്ഷനില് വിദ്യാര്ഥികളുടെ ഹോസ്റ്റല് അടക്കമുള്ള പ്രശ്നങ്ങളുന്നയിച്ച് സമരം സംഘടിപ്പിക്കാന് തീരുമാനിച്ചിട്ടുണ്ട്.
