അഴീക്കോട്: കൊച്ചിന് മുസിരിസ് ബിനാലെയുടെ ഭാഗമായി ബിനാലെ ആര്ട്ട് ഫൗണ്ടേഷന് മെര്ക്ക് ഫാര്മസ്യൂട്ടിക്കല് കമ്പനിയുമായി സഹകരിച്ചുകൊണ്ട് കേരളത്തിലെ സ്കൂള് വിദ്യാര്ത്ഥികളുടെ ക്രിയാത്മകതയും വ്യക്തിത്വ വികസനവും മുന്നില്ക്കണ്ടുകൊണ്ട് സംഘടിപ്പിച്ച മൂന്നു ദിവസത്തെ ശില്പ്പശാല ഇന്ന് സമാപിക്കും. അഴീക്കോട് ഹയര് സെക്കന്ററി സ്കൂളില് നടക്കുന്ന പരിപാടിയില് സമീപ പ്രദേശങ്ങളിലെ സ്കൂളുകളില് നിന്നടക്കം അറുപതോളം കുട്ടികളാണ് പങ്കെടുക്കുന്നത്.
സ്കൂള് പിടിഎ പ്രസിഡണ്ട് പി.ധര്മ്മന്റെ അധ്യക്ഷതയില് കണ്ണൂര് പാലയാട് ഡയറ്രില് നിന്നും സീനിയര് ലക്ചററായി വിരമിച്ച ആര്ട്ടിസ്റ്റ് എ.രവീന്ദ്രന് ശില്പ്പശാല ഉദ്ഘാടനം ചെയ്തു. ഹെഡ്മാസ്റ്റര് പി.എം.ഗിരീഷ്, എന്.ലസിത, കെ.ശശികുമാര്, രാജീവന് പാറയില് എന്നിവര് സംസാരിച്ചു. ശില്പ്പശാല നയിക്കുന്ന പ്രശസ്ത ചിത്രകാരനും സംഗീതജ്ഞനുമായ ആര്ട്ടിസ്റ്റ് ഒ.സി.മാര്ട്ടിന്, പ്രശസ്ത തീയ്യറ്റര് ആര്ട്ടിസ്റ്റ് ശരത് സാഭാ എന്നിവര് ശില്പ്പശാലയിലെ കുട്ടികളുടെ സൃഷ്ടികള് കൊച്ചിന് മുസിരിസ് ബിനാലെയില് പ്രദര്ശിപ്പിക്കുമെന്ന് അറിയിച്ചു.
