വൈത്തിരി : വൈദ്യഗിരി ശ്രീ സുബ്രഹ്മണ്യ സ്വാമീ ക്ഷേത്രത്തില് വന് ഭക്തജനാവലിയുടെ സാന്നിധ്യത്തില് തൈപ്പൂയ മഹോത്സവം നടന്നു. രാവിലെ ആറ് മണിക്ക് മഹാഗണപതി ഹോമത്തോടെ തുടങ്ങിയചടങ്ങുകള് സുബ്രഹ്മണ്യ അഷ്ടോത്തരം, മഹാവിഷ്ണു അഷ്ടോത്തര പാരായണം എന്നിവയ്ക്ക് ശേഷം ശ്രീ സുബ്രഹ്മണ്യ സ്വാമിയുടെ വിഗ്രഹവും തങ്കവേലും വഹിച്ചുള്ള ഘോഷയാത്ര 11 മണിക്ക് വൈത്തിരി മാരിയമ്മന് കോവിലില്നിന്നും പുറപ്പെട്ടു. ഗുരുവായൂര്, ശബരിമല മുന് മേല്ശാന്തി ഏഴിക്കോട് കൃഷ്ണദാസ് നമ്പൂതിരിയുടെ മുഖ്യകാര്മ്മികത്വത്തില് ഭഗവാനെ വൈദ്യഗിരിയിലേക്ക് ആനയിക്കപ്പെട്ടു. നൂറ്കണക്കിന് കാവടികളുടെ അകമ്പടിയോടെ ക്ഷേത്രത്തിലെത്തിയ വൈദ്യഗിരീശ വിഗ്രഹം നിരവധി ഭക്തരാല് പാലഭിഷേകം ചെയ്യപ്പെട്ടു.
കൃഷ്ണദാസ് നമ്പൂതിരിയുടെ നേതൃത്വത്തിലുള്ള ബ്രാഹ്മണ വൃന്ദം ഭക്തിനിര്ഭരമായ പൂജാചടങ്ങുകള് നിര്വ്വഹിച്ചു. ആയിരക്കണക്കിന് ഭക്തരാണ് വൈദ്യഗിരിയില് എത്തിയത്. കുറിച്ച്യാര്മല, തരുവണ, പൂക്കോട്, നെടുങ്കരണ തുടങ്ങി നിരവധി സ്ഥലങ്ങളില് നിന്നും കാവടിയെടുത്ത സംഘങ്ങള് വൈദ്യഗിരിയില് എത്തി. വൈദ്യഗിരി ക്ഷേത്ര ഭാരവാഹികള് കാവടി സംഘത്തെ മേളക്കാരുടെ അകമ്പടിയോടെ സ്വീകരിച്ച് ക്ഷേത്രത്തിലേക്കാനയിച്ചു.
വൈകീട്ട് ഏഴിക്കോട് കൃഷ്ണദാസ് നമ്പൂതിരിയുടെ മുഖ്യകാര്മ്മികത്വത്തില് സുരേഷ് സ്വാമിയും സംഘവും പൂജകള് നടത്തി. പ്രശസ്ത കാഥികന് ചേര്ത്തല രാമചന്ദ്രന്റെ പ്രഭാഷണവും വൈത്തിരി രാഗരഞ്ജിനി ഓര്ഗ്ഗസ്ട്രയുടെ ഗാനമേളയും നടന്നു. ഇന്ന് എടത്തല വിജയന് തന്ത്രികളുടെയും നേതൃത്വത്തി ല് വിദ്യാഗോപാലമന്ത്രജപയജ്ഞവും പഞ്ചഭൂതദോഷ പരിഹാര യജ്ഞവും നടക്കും.
