ഹരിപ്പാട്: ഏക മകന് ഉപേക്ഷിച്ച വൃദ്ധ മാതാവിന്റെ മൃതദേഹം ചെങ്ങന്നൂര് ആര് ഡിഒയുടെ നിര്ദ്ദേശ പ്രകാരം പോലീസ് സംരക്ഷണത്തില് വീട്ടുവളപ്പില് സംസ്ക്കരിച്ചു. ഏഴിന് ആണ് പള്ളിപ്പാട് നീണ്ടൂര് കുറ്റുവിളയില് ലക്ഷ്മി(82)യെ സംരക്ഷിക്കാന് ആരുമില്ലാത്തതിനാല് ഹ്യൂമന് റൈറ്റ്സ് മിഷന് ഓഫ് ഇന്ത്യ ആലപ്പുഴ ജില്ലാ കമ്മറ്റിയ്ക്ക് കിട്ടിയ പരാതി പ്രകാരം ഏറ്റെടുത്തത്.
സ്വന്തം പേരിലുള്ള 10 സെന്റ് സ്ഥലം എഴുതി വാങ്ങിയ ശേഷം മകന് സുരേഷും ഭാര്യ ശശികലയും ചേര്ന്ന് ലക്ഷ്മിയെ വീട്ടില് നിന്ന് പുറത്താക്കുകയായിരുന്നു. തുടര്ന്ന് മകള് പൊന്നമ്മയുടെ സംരക്ഷണത്തില് വാടക വീട്ടിലായിരുന്നു കഴിഞ്ഞു വന്നത്. പ്രമേഹ രോഗംമൂലം അവശയായ പൊന്നമ്മയ്ക്ക് ലക്ഷ്മിയുടെ സംരക്ഷണം സാദ്ധ്യമല്ലാതായ അവസ്ഥയിലാണ് ഹ്യൂമന് റൈറ്റ്സ് പ്രവര്ത്തകരെ സമീപിച്ചത്.
തുടര്ന്ന് ഇവരുടെ അഭ്യര്ത്ഥന പ്രകാരം കൊട്ടാരക്കര ആശ്രയ ചാരിറ്റബിള് ട്രസ്റ്റ് പ്രായാധിക്യം മൂലം അവശായ ലക്ഷ്മിയുടേയും മകളുടേയും സംരക്ഷണം ഏറ്റെടുത്ത് തിരുവനന്തപുരം മെഡിക്കല് കോളേജ് ആശുപത്രിയില് പ്രവേശിപ്പിച്ചത്. ചികിത്സയിലിരിക്കെ വെള്ളിയാഴ്ച മരണമടഞ്ഞ ലക്ഷ്മിയുടെ മൃതദേഹം സംസ്ക്കരിക്കുന്നതിന് പള്ളിപ്പാട് കുറ്റുവിളയില് കൊണ്ടുവന്നെങ്കിലും മകനും മരുമകളും തടസ്സപ്പെടുത്തിയതിനാല് ചെങ്ങന്നുര് ആര്ഡിഒയ്ക്ക് ഹ്യൂമന് റൈറ്റ്സ് പ്രവര്ത്തകര് പരാതി നല്കുകി.
പോലീസ് സംരക്ഷണത്തില് മൃതദേഹം സംസ്ക്കരിക്കാന് കാര്ത്തികപ്പള്ളി തഹസീല്ദാര് മുരളീധര കുറുപ്പിന് നിര്ദ്ദേശം നല്കുകയായിരുന്നു. തഹസീല്ദാരുടെ നേതൃത്വത്തില് ശനിയാഴ്ച മൂന്നിന് പോലീസ് സംരക്ഷണത്തില് മൃതദേഹം വീട്ടുവളപ്പില് സംസ്ക്കരിച്ചു. പള്ളിപ്പാട് ഗ്രാമപഞ്ചായത്ത് പ്രസിഡന്റ് എസ്. രാജേന്ദ്രകുറുപ്പ്, വില്ലേജ് ഓഫീസര് അശോകന്, ബ്ലോക്ക് പഞ്ചായത്തംഗം മിനി കൃഷ്ണകുമാര്, ആശ്രയ ജില്ലാ കോര്ഡിനേറ്റര് സനല്, ഹ്യൂമന് റൈറ്റ്സ് ജില്ലാ സെക്രട്ടറി കെ.മോഹനന്, ട്രഷറര് ഷീലു, ഹരിപ്പാട് മണ്ഡലം പ്രസിഡന്റ് എസ്.ദേവരത്നന്, സെക്രട്ടറി വി.കെ.ഗംഗാധരന്, ട്രഷറര് മുരളീധരന് പിള്ള, എസ്എന്ഡിപി 1745 നീണ്ടൂര് ശാഖ പ്രസിഡന്റ് പി. അനില്, സെക്രട്ടറി എന്. മോഹനന് ഉള്പ്പടെ വന്ജനാവലി പങ്കെടുത്തു.
