വള്ളികുന്നം പഞ്ചായത്തില് തരിശുനിലം കൃഷിക്ക്
അനുയോജ്യമാക്കുന്ന പ്രവൃത്തിയില് തൊഴിലുറപ്പു തൊഴിലാളികള്
ആലപ്പുഴ: ഹരിത കേരളം മിഷനില് ഉള്പ്പെട്ട വിവിധ പദ്ധതികള് നടപ്പാക്കിയതിലൂടെ മഹാത്മാ ഗാന്ധി ഗ്രാമീണ തൊഴിലുറപ്പു പദ്ധതി വഴി ജില്ലയില് സൃഷ്ടിക്കപ്പെട്ടത് 4,58,878 തൊഴില് ദിനങ്ങള്. ഡിസംബര് എട്ടിനു ശേഷം നടപ്പാക്കിയ 2,105 പദ്ധതികളിലൂടെ പന്ത്രണ്ടു ബ്ലോക്ക് പഞ്ചായത്തുകളിലായി ചെലവഴിച്ചത് 18,17,90,422 രൂപ. പച്ചക്കറി കൃഷിക്കുള്ള പ്രവൃത്തികളിലൂടെയാണ് ഏറ്റവുമധികം തൊഴില് ദിനങ്ങള് സൃഷ്ടിക്കപ്പെട്ടത്. പച്ചക്കറി കൃഷിക്കുള്ള നിലമൊരുക്കല് അടക്കമുള്ള 441 ഭൂവികസന പ്രവൃത്തികളിലൂടെ 1,47,609 തൊഴില് ദിനങ്ങളാണ് സൃഷ്ടിച്ചത്.
വൃക്ഷതൈ നടീല് പ്രവൃത്തികള് 69 എണ്ണം പൂര്ത്തീകരിച്ചപ്പോള് സൃഷ്ടിക്കപ്പെട്ട തൊഴില് ദിനങ്ങള് 11,274. ചെലവഴിച്ചത് 27.31 ലക്ഷം രൂപ. ജലസംഭരണത്തിനായി മഴക്കുഴികള് തീര്ക്കുന്ന മൂന്നു പ്രവൃത്തികളിലൂടെ 467 തൊഴില് ദിനം സൃഷ്ടിക്കപ്പെട്ടു. മാലിന്യ നിര്മാര്ജനത്തിനു ശുചിത്വത്തിനുമായി കമ്പോസ്റ്റ് പിറ്റുകള് സ്ഥാപിക്കുന്ന 199 പ്രവൃത്തികള് പൂര്ത്തീകരിച്ചു. 1,851 തൊഴില് ദിനങ്ങള് ലഭിച്ചു. സമ്പൂര്ണ ശുചിത്വം ഉറപ്പാക്കുന്നതിനായി വ്യക്തിഗത കക്കൂസ് നിര്മിക്കുന്ന 339 പ്രവൃത്തികളിലൂടെ 642 തൊഴില്ദിനം സൃഷ്ടിച്ചു. ആര്യാട്, വെളിയനാട്, കഞ്ഞിക്കുഴി ബ്ലോക്കുകളിലാണ് പ്രവൃത്തികള് നടന്നത്. വരും മാസങ്ങളില് മഴവെള്ളസംരക്ഷണത്തിനുള്ള പദ്ധതികളാണ് നടക്കുക.
