ആലപ്പുഴ: ശ്രീനാരായണ ഗുരുവിനെ ഈഴവരുടെ നേതാവാക്കി പഠിപ്പിക്കുന്ന എന്സിഇആര്ടി ചരിത്രപാഠഭാഗം പിന്വലിക്കണമെന്ന് ഹിന്ദുഐക്യവേദി സം സ്ഥാ ന സഹ സംഘടനാ സെക്രട്ടറി വി. സുശികുമാര്. ഹിന്ദുഐക്യവേദി ജില്ലാ സമിതി യോഗം ഉദ്ഘാടനം ചെയ്യുകയായിരുന്നു അദ്ദേഹം.
ഭ്രാന്താലയ തുല്യമായിരുന്ന കേരളത്തെ ലോകത്തിന്റെ നെറുകയിലെത്തിച്ചതില് ശ്രീനാരായണ ഗുരുവിന്റെ പങ്ക് അതുല്യമാണ്. ഋഷിയും കവിയും ഗുരുവും നവോത്ഥാന നായകനും തത്ത്വചിന്തകനും ഒക്കെയായ വ്യക്തിത്വങ്ങളുടെ സമന്വയമാണ് ഗുരുവില് ദര്ശിക്കാനാവുന്നത്. എന്നാല് ശ്രീനാരായണ ഗുരുവിനെ ഈഴവ സന്യാസിയായി മാത്രം അടയാളപ്പെടുത്തുന്ന ഇഎംഎസ്സിന്റെയും അനുയായികളുടെയും രചനകളെ ആധാരമാക്കുമ്പോഴാണ് ഇത്തരം അബദ്ധങ്ങള് പാഠപുസ്തകങ്ങളില് പോലും കടന്നുകൂടുന്നതെന്ന് അദ്ദേഹം പറഞ്ഞു.
ജില്ലാ പ്രസിഡന്റ് എസ്. ശ്രീധരന് അദ്ധ്യക്ഷത വഹിച്ചു. അഡ്വ. വി.എസ്. രാജന്, കെ. സുദര്ശനന്, വിനോദ് ഉമ്പര്നാട്, സി.എന്. ജിനു, ജി. ശശികുമാര്, എസ്. സുന്ദരേശന് എന്നിവര് സംസാരിച്ചു.
