ചാരുംമൂട്: ടെറസിനു മുകളില് കിടന്നുറങ്ങുമ്പോള് കെട്ടിടങ്ങള്ക്കിടയില് വീണ യുവാവിനെ അഗ്നിശമന സേന ഉദ്യോഗസ്ഥര് രക്ഷപെടുത്തി.
നൂറനാട് പടനിലം പരബ്രഹ്മക്ഷേത്രത്തിന്റെ കിഴക്കുള്ള ശബരി ബില്ഡിങ്ങില് വാടകയ്ക്കു താമസിക്കുന്ന പത്തനംതിട്ട മലയാലപ്പുഴ മേപ്രാത്ത് രാമചന്ദ്രന് നായരുടെ മകന് അനു (25) ആണ് അബദ്ധത്തില് കെട്ടിടങ്ങള് തമ്മില് വേര്തിരിക്കുന്ന ഇടുങ്ങിയ സ്ഥലത്ത് വീണത്. വിവരമറിഞ്ഞെത്തിയ കായംകുളം ഫയര്ഫോഴ്സ് ഉദ്യോഗസ്ഥര് മണിക്കൂറുകള് നീണ്ട പ്രയത്നത്തില് രക്ഷപ്പെടുത്തി.
ഇവര് കുടുംബസമേതം നൂറനാട് താമസമാക്കിയിട്ട് രണ്ടു മാസം മാത്രമേ ആയിട്ടുള്ളു. രാമചന്ദ്രന്നായരുടെ മൂത്തമകന് മനു സ്വകാര്യബസ്സ് ജീവനക്കാരനാണ്. ഇയാള് വെളുപ്പിനു ജോലിക്കുപോകാന് ഒരുങ്ങുന്നതിനിടയില് ടെറസിനു മുകളില് കയറി നോക്കിയപ്പോള് അനുവിനെ കണ്ടില്ല.
തിരച്ചിലിനൊടുവല് ഭിത്തികള്ക്കു നടുവിലുള്ള ഇടുങ്ങിയ സ്ഥലത്ത് അനുവിനെ ബോധം നഷ്ടപ്പെട്ട നിലയില് കണ്ടെത്തി. ഉടന് വിവരം നൂറനാട് പോലീസിലും അഗ്നിശമനസേനയേയും അറിയിച്ചു. ആറരയോടെ ഇയാളെ രക്ഷപ്പെടുത്തി കായംകുളം താലൂക്ക് ആശുപത്രിയില് പ്രവേശിപ്പിച്ചു. അനു ടൈല്സിന്റെ പണി ചെയ്തു വരികയാണ്.
