മട്ടന്നൂര്‍: ദേശീയ പാലിയേറ്റീവ് ദിനാചരണത്തിന്റെ ഭാഗമായി മിനി സ്‌പോര്‍ട്‌സ് ആന്റ് ആര്‍ട്‌സ് ക്ലബ്ബിനു കീഴില്‍ പ്രവര്‍ത്തിക്കുന്ന സാന്ത്വന പരിചരണ വിഭാഗമായ അമ്മ പെയിന്‍ ആന്റ് പാലിയേറ്റീവ് കെയര്‍ യൂണിറ്റിന്റെ ആഭിമുഖ്യത്തില്‍ സാന്ത്വന പരിചരണത്തിന്റെ സന്ദേശവും പ്രാധാന്യവും സമൂഹത്തെ ബോധ്യപ്പെടുത്തുന്നതിനായി ഇന്ന് മുതല്‍ 15 വരെ വ്യത്യസ്തമായ പരിപാടികളോടെ നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
ഇന്ന് വൈകുന്നേരം 5 മണിക്ക് മട്ടന്നൂര്‍ ബസ്സ്റ്റാന്റ് പരിസരത്ത് അമ്മയ്‌ക്കൊരുമ്മ എന്ന പേരില്‍ വയോജന സംരക്ഷണവും ബോധവല്‍ക്കരണ ക്ലാസ്സും വീഡിയോ പ്രദര്‍ശനവും നടക്കും. റാഫി പാറയില്‍ ഉദ്ഘാടനം ചെയ്യും. സി.കെ. രജിഷ ക്ലാസെടുക്കും.
നാളെ രാവിലെ 8 മണി മുതല്‍ പാലിയേറ്റീവ് സന്ദേശ പ്രചരണ ക്യാമ്പയിന്‍ സംഘടിപ്പിക്കും. ക്യാമ്പയിനിന്റെ ഭാഗമായി ബോധി’എന്ന പേരില്‍ മട്ടന്നൂര്‍ ഹയര്‍സെക്കന്ററി സ്‌കൂള്‍, യൂനിവേഴ്‌സല്‍ കോളേജ് മട്ടന്നൂര്‍ എന്നിവിടങ്ങളിലെ സ്റ്റുഡന്റ് പാലിയേറ്റീവ് വളണ്ടിയര്‍മാര്‍, സന്നദ്ധ പ്രവര്‍ത്തകര്‍ എന്നിവര്‍ അണിനിരക്കുന്ന ബോധവല്‍ക്കരണ റാലി നടക്കും. മട്ടന്നൂര്‍ നഗരസഭ സെക്രട്ടറി എം. സുരേശന്‍ ഉദ്ഘാടനം ചെയ്യും. കെ.പി.ഷിബു അധ്യക്ഷത വഹിക്കും. ഞായറാഴ്ച രാവിലെ 10 മണിക്ക് മട്ടന്നൂര്‍ ഗവ. യു.പി സ്‌കൂളില്‍ ദീര്‍ഘകാലം കിടപ്പിലായവര്‍, അരയ്‌ക്കു താഴെ തളര്‍ന്ന് വീല്‍ച്ചെയറില്‍ കഴിയുന്നവര്‍, സന്നദ്ധസംഘടനാ പ്രവര്‍ത്തകര്‍, പാലിയേറ്റീവ് വളണ്ടിയര്‍മാര്‍ എന്നിവരുടെ കുടുംബസംഗമം ഒപ്പരം’എന്ന പേരില്‍ നടക്കും.
വാര്‍ത്താസമ്മേളനത്തില്‍ ഡോ.ജി.കുമാരന്‍ നായര്‍, കെ.പി.ഷിബു, പി.അരുണ്‍കുമാര്‍ എന്നിവര്‍ സംസാരിച്ചു.
