മാരാരിക്കുളം: കേസ് അന്വേഷണത്തില് വീഴ്ച വരുത്തിയതിന് മണ്ണഞ്ചേരി പോലീസിന് പോലീസ് കംപ്ലയന്റ് അതോറിറ്റിയുടെ വിമര്ശനം. കേസ് പുനരന്വേഷിക്കാനും സംസ്ഥാന പോലീസ് കംപ്ലയന്റ് അതോററ്റി ചെയര്മാന് കെ. നാരായണകുറുപ്പ് ഉത്തരവിട്ടു. മണ്ണഞ്ചേരി കുന്നേല്വെളി രജിമോന്, മണ്ണഞ്ചേരി പോലീസ് സ്റ്റേഷനിലെ എസ്ഐയായിരുന്ന ഔസേപ്പച്ചന്, സീനിയര് പോലീസ് ഓഫീസറായിരുന്ന ബാബുരാജ് എന്നിവര്ക്കെതിരെ നല്കിയ കേസിലാണ് പോലീസ് കംപ്ലയന്റ് അതോറിറ്റിയുടെ വിധി. 2014 ആഗസ്റ്റ് അഞ്ചിന് രജിമോനും അയല്വാസി കുന്നേല് വീട്ടില് പി.എസ്. പുരുഷോത്തമനുമായി ഉണ്ടായ അതിര്ത്തിത്തര്ക്കം സംഘര്ഷത്തില് കലാശിച്ചപ്പോള് കേസ് രജിസ്റ്റര് ചെയ്ത പോലീസിന് ഗുരുതരമായ തെറ്റ് വരുത്തിയെന്നാണ് പോലീസ് കംപ്ലയന്റ് അതോറിറ്റിയുടെ കണ്ടെത്തല്.
പുരുഷേത്തമന് നല്കിയ കേസില് പോലീസ് ജാമ്യമില്ലാ കുറ്റങ്ങള് ചുമത്തി രജിമോനെ റിമാന്റ് ചെയ്തു. അതേസമയം രജിമോന് നല്കിയ കേസില് നിസ്സാരമായ വകുപ്പുകള് പ്രകാരം കേസ് രജിസ്റ്റര് ചെയ്ത് പ്രതികളെ സ്റ്റേഷനില് നിന്ന് ജാമ്യം നല്കി വിട്ടയച്ചെന്നാണ് പരാതി. സംഭവത്തില് രജിമോന്റെ കണ്ണിന് പരിക്ക് പറ്റി. കേള്വിശക്തിക്കും തകരാര് സംഭവിച്ചു. ഭാര്യ അനിമോള്ക്കും മകന് വിനയനും പരിക്ക് പറ്റിയിരുന്നു. ഇവരുടെ മെഡിക്കല് സര്ട്ടിഫിക്കറ്റുകള് പരിശോധിച്ച് ജാമ്യമില്ലാ വകുപ്പുകള് ചേര്ത്ത് കേസ് പുനരന്വേഷിക്കണമെന്നാണ് സംസ്ഥാന പോലീസ് കംപ്ലയന്റ് അതോറിറ്റി ചെയര്മാന് കെ. നാരായണകുറുപ്പ് ഉത്തരവിട്ടിരിക്കുന്നത്. ഗുരുതരമായ മുറിവ് പറ്റിയതിന് ഇന്ത്യന് ശിക്ഷാ നിയമം 326 വകുപ്പ് പ്രകാരവും സ്ത്രീയെ അപമാനിച്ചതിന് 354 വകുപ്പ് പ്രകാരവും കേസെടുക്കണമെന്നാണ് ഉത്തരവ്.
