കണ്ണൂര്: ഗതാഗതതടസ്സം ഇല്ലാത്തവിധം കണ്ണൂര് നഗരത്തില് സുഗമമായ ട്രാഫിക് സംവിധാനം ഉറപ്പാക്കാന് ബന്ധപ്പെട്ട അധികാരികള് കര്ശന നടപടി സ്വീകരിക്കണമെന്ന് എസ്എടിയു കണ്ണൂര് ജില്ലാകമ്മറ്റിയോഗം ആവശ്യപ്പെട്ടു. സ്കൂള് യുവജനോത്സവത്തിന് കണ്ണൂരിലെത്തുന്നവര്ക്ക് പരാതിക്കിടയില്ലാത്ത വിധം ആവശ്യമായ ഓട്ടോറിക്ഷ സര്വ്വീസ് ഉറപ്പുവരുത്താന് ട്രാഫിക് ക്രമീകരണം കുറ്റമറ്റരീതിയില് നടത്തേണ്ടതുണ്ടെന്നും യൂണിയന് നിര്ദ്ദേശിച്ചു.
കണ്ണൂര് നഗരത്തിലെ പൊട്ടിപ്പൊളിഞ്ഞ് ഗതാഗതയോഗ്യമല്ലാതായ റോഡുകള് മുഴുവന് അറ്റകുറ്റപ്പണി നടത്തി ഗതാഗതയോഗ്യമാക്കണമെന്നും റോഡിനിരുവശവും അനധികൃതമായി വാഹനങ്ങള് പാര്ക്ക് ചെയ്യുന്നത് കര്ശനമായി തടയണമെന്നും ബസ്സുകള് ബസ് സ്റ്റോപ്പില് മാത്രം നിര്ത്തി യാത്രക്കാരെ കയറ്റാനും ഇറക്കാനും തയ്യാറാകണമെന്നും യൂണിയന് ആവശ്യപ്പെട്ടു. ജില്ലക്കകത്ത് നിന്നും പുറത്തുനിന്നും യുവജനോത്സവത്തിനെത്തുന്ന പ്രൈവറ്റ് വാഹനങ്ങള്ക്ക് പ്രത്യേകസ്ഥലങ്ങള് നഗരത്തിന് പുറത്ത് കണ്ടെത്തണമെന്നും യുവജനോത്സവ വേദികള്ക്ക് സമീപം ഓട്ടോറിക്ഷകളിലെത്തുന്ന യാത്രക്കാരെ കയറ്റാനും ഇറക്കാനും താത്കാലിക പാര്ക്ക് കേന്ദ്രങ്ങള് ഒരുക്കണമെന്നും യൂനിയന് ആവശ്യപ്പെട്ടു. യുവജനോത്സവത്തിന്റെ ഭാഗമായി ഓട്ടോറികളുടെ ചാര്ജ്ജ് ഒരു രൂപ കുറക്കണമെന്ന നിര്ദ്ദേശം പ്രായോഗികമെല്ലെന്നും യൂണിയന് ചൂണ്ടിക്കാട്ടി. യോഗത്തില് എം.ശശിധരന് അധ്യക്ഷത വഹിച്ചു. കസ്തൂരിദേവന്, എം.ലക്ഷ്മണന്, എന്.സീതാറാം, എം.രവീന്ദ്രന്, എ.ബഷീര്, സി.കെ.ജയരാജന്, പി.സുരേന്ദ്രന്, പി.ഗണേശന്, സി.പി.രാജീഷ്, കെ.വി.രാജേഷ് തുടങ്ങിയവര് സംസാരിച്ചു.
