ഗാന്ധിനഗര്: സേവന ജീവിതവ്രതമാക്കി സേവാഭാരതി കോട്ടയം മെഡിക്കല് കോളേജില് നടത്തിവരുന്ന പ്രവര്ത്തനങ്ങള് മാതൃകാപരം. മണ്ഡല-മകരവിളക്ക് വ്രതകാലത്ത് കോട്ടയം മെഡിക്കല് കോളേജിലെത്തുന്ന ശബരിമല തീര്ത്ഥാടകര്ക്ക് എല്ലാവിധ സഹായങ്ങളും നല്കി 24 മണിക്കൂറും സേവാഭാരതി പ്രവര്ത്തിക്കുന്നു.
ശബരിമലയില് ദര്ശനത്തിനായി എത്തിച്ചേരുന്ന അന്യസംസ്ഥാനങ്ങളില്നിന്നുള്ള ഭക്തജനങ്ങള്ക്കാണ് ഈ പ്രവര്ത്തനം കൂടുതല് സഹായകമാകുന്നത്. കന്നടയും തെലുങ്കും തമിഴിലുമെല്ലാം സംസാരിക്കുന്നവര് ഇവിടെയെത്തിയാല് അവര്ക്കു വേണ്ട മുഴുവന് സഹായങ്ങളും ചെയ്തുകൊടുത്ത് പ്രവര്ത്തകര് സദാസമയവും രംഗത്തുണ്ട്. മെഡിക്കല് കോളേജിലെത്തിയാല് നിരാലംബരായ രോഗികള്ക്കു ആശ്രയകേന്ദ്രമാണ് സേവാഭാരതി.
വൃശ്ചികം ഒന്നു മുതല് ധനു 11 വരെയുള്ള മണ്ഡലകാല ദിവസങ്ങളില് അപകടത്തില്പ്പെട്ടും ഹൃദയസംബന്ധമായ അസുഖങ്ങളാലും കോട്ടയം മെഡിക്കല് കോളേജില് 230 തീര്ത്ഥാടകരെയാണ് പ്രവേശിപ്പിച്ചത്. ഇതില് 9 പേര് മരിച്ചു. 6 പേര് ഹൃദയസംബന്ധമായ രോഗങ്ങളാലും മൂന്നു പേര് അപകടത്തില്പ്പെട്ടുമാണ് മരിച്ചത്. മരിച്ചവരടെ മൃതദേഹം പോസ്റ്റ്മോര്ട്ടം ചെയ്യുന്നതിനുവേണ്ട നടപടികളില് സഹായിച്ചതും മൃതദേഹം സേവാഭാരതിയുടെ തന്നെ ആംബുലന്സുകളില് സൗജന്യ നിരക്കില് സ്വദേശത്തെത്തിച്ചതുമെല്ലാം സേവനരംഗത്തുള്ള പ്രവര്ത്തകരാണ്.
ഇതുവരെ 480 പ്രവര്ത്തകരാണ് ഇവിടെ സേവനത്തിനെത്തിയത്. ഇതില് വിദ്യാര്ത്ഥികളും തൊഴിലാളികളും ഉദ്യോഗസ്ഥരും മുതല് ജോലിയില്നിന്നും വിരമിച്ചവര്വരെയുണ്ട്. ഇവര്ക്കുവേണ്ട ഭക്ഷണം സമീപപ്രദശങ്ങളായ ഗാന്ധിനഗര്, ആര്പ്പൂക്കര, കുടമാളൂര്, കുമാരനല്ലൂര് പ്രദേശങ്ങളിലുള്ള ഭവനങ്ങളില്നിന്നും അമ്മമാര് സ്നേഹപൂര്വ്വം കൊടുത്തയക്കുന്ന പൊതിച്ചോറുകളാണ്. അവരത് ഭക്ത്യാദരപൂര്വ്വം അയ്യപ്പസ്വാമിക്കു മുമ്പില് സമര്പ്പിക്കുന്ന നിവേദ്യമായി കരുതുന്നു.
അയ്യപ്പന്മാരെ കൂടാതെ ആശുപത്രിയിലെത്തുന്ന മറ്റു രോഗികള്ക്കും കഴിയുന്നത്ര സഹായവും മരുന്നുകളും മറ്റും നല്കുവാനും സേവാഭാരതി പരിശ്രമിച്ചുവരുന്നു. ദിവസേന നൂറുകണക്കിനു രോഗികളും സഹായികളും കൂട്ടിരുപ്പുകാരും സഹായങ്ങള്ക്കും അന്വേഷണങ്ങള്ക്കുമായി സേവാഭാരതിയെ സമീപിക്കാറുണ്ട്. അവര്ക്കെല്ലാം ആശ്വാസമായി സേവാഭാരതിയുടെ പ്രവര്ത്തനം മുമ്പോട്ടു പോകുന്നു.
