തലശ്ശേരി: തലശ്ശേരിയില് നടക്കുന്ന കണ്ണൂര് റവന്യൂ ജില്ലാ സ്കൂള് കലോത്സവത്തില് കണ്ണൂര് നോര്ത്ത് ഉപജില്ല ഒന്നാം സ്ഥാനത്തിനായി കുതിക്കുന്നു. പയ്യന്നൂര്, ഇരിട്ടി ഉപജില്ലകള് ഒപ്പത്തിനൊപ്പമുണ്ട്. യുപി വിഭാഗത്തില് 33 ഇനങ്ങളില് 19 ഇനങ്ങളുടെ ഫലം പുറത്തുവന്നപ്പോള് 89 പോയന്റുമായി കണ്ണൂര് നോര്ത്ത് ഒന്നാം സ്ഥാനത്തും 87 പോയന്റുമായി ഇരിട്ടി രണ്ടാം സ്ഥാനത്തും 83 പോയന്റുമായി മാടായി മൂന്നാംസ്ഥാനത്തുമാണ്. ഹൈസ്കൂള് ജനറല് വിഭാഗത്തില് 89 ഇനങ്ങളില് 44 ഇനങ്ങളിലെ ഫലം പുറത്തുവന്നപ്പോള് 171 പോയന്റുമായി കണ്ണൂര് നോര്ത്ത് ഒന്നാം സ്ഥാനത്തും 152 പോയന്റുമായി പയ്യന്നൂര് രണ്ടാം സ്ഥാനത്തും 151 പോയന്റുമായി പാനൂര് മൂന്നാം സ്ഥാനത്തുമാണ്. ഹയര് സെക്കന്ററി വിഭാഗത്തില് 105 ഇനങ്ങളില് 47 ഇനങ്ങളുടെ ഫലം പുറത്തുവന്നപ്പോള് 186 പോയന്റുകളുമായി കണ്ണൂര് നോര്ത്ത് ഒന്നാം സ്ഥാനത്തും 183 പോയന്റുമായി പയ്യന്നൂര് രണ്ടാം സ്ഥാനത്തും 182 പോയന്റുമായി ഇരിട്ടി മൂന്നാംസ്ഥാനത്തുമാണ്.
തലശ്ശേരിക്ക് നവ്യാനുഭവം സമ്മാനിച്ച കണ്ണൂര് ജില്ലാ റവന്യു ജില്ലാ കലോത്സവത്തിന് നാളെ തിരശ്ശീല വീഴും. തലശ്ശേരി നഗരത്തിലെ 14 വേദികളിലായാണ് വിവിധയിനങ്ങളില് മത്സരങ്ങള് നടന്നത്. ചില വേദികളില് കാഴചക്കാരായി മത്സരാര്ത്ഥികളും വിധികര്ത്താക്കളും മാത്രമായപ്പോള് മോഹിനിയാട്ടം, ഭരത നാട്യം, കുച്ചിപ്പുടി, നാടോടി നൃത്തം, നാടന്പാട്ട് മത്സരം തുടങ്ങിയവ നിറഞ്ഞ സദസ്സിലാണ് അരങ്ങേറിയത്.
വേദി ഒന്നില് നടന്ന നാടന്പാട്ട് മത്സരത്തിന് തുടക്കം മുതല് ഒടുക്കം വരെ നിറഞ്ഞ സദസ്സായിരുന്നു. താളം പിടിച്ചും കൂടെപ്പാടിയും സദസ്സും നാടന് പാട്ടിലലിഞ്ഞു. സാമൂഹ്യ പ്രതിബദ്ധതയും സ്ത്രീസുരക്ഷയും പ്രമേയമാക്കിയ ഏകാഭിനയവും മിമിക്രിയും ഏറെ ശ്രദ്ധേയമായി. നാടകങ്ങളില് പലതും ഉന്നത നിലവാരം പുലര്ത്തി.
