കോട്ടയം: കണ്ണൂര് ഗ്രാമങ്ങളിലെ വിധവകളുടെ ഭവനങ്ങളിലേക്ക് സ്നേഹസ്പര്ശവുമായി മരങ്ങാട്ടുപള്ളി ലേബര് ഇന്ത്യ സ്കൂള് കോളേജ് വിദ്യാര്ത്ഥിനികള്. കണ്ണൂരിലെ ഉള്ഗ്രാമങ്ങളിലെ അനാഥമാക്കപ്പെട്ട ഭവനങ്ങള് സന്ദര്ശിച്ചു.
ബിജെപി സംസ്ഥാന അധ്യക്ഷന് കുമ്മനം രാജശേഖരന്, സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് തുടങ്ങിയവരുടെ അനുഗ്രഹത്തോടെയാണ് വിദ്യാര്ത്ഥികള് ഗ്രാമങ്ങള് സന്ദര്ശിച്ചത്. ലേബര് ഇന്ത്യ കോളേജ് സൈക്കോളജി വിഭാഗം വിദ്യാര്ത്ഥികള് തങ്ങളുടെ പഠനത്തിന്റെയും സാമൂഹിക പ്രതിബദ്ധതയുടെയും ഭാഗമായിട്ടാണ് സന്ദര്ശനം നടത്തിയത്. വീടുകളിലെത്തി അമ്മമാരെയും കുഞ്ഞുങ്ങളെയും കാണുകയും തങ്ങളും അവരോടൊത്തുണ്ട് എന്ന സന്ദേശം വിദ്യാര്ത്ഥികള് നല്കി. ഇങ്ങനെ ഒരു സംരംഭം കേരളത്തിലെ സ്കൂള് കോളേജുകളില് നിന്ന് ആദ്യമാണ്.
പിണറായില് കൊല്ലപ്പെട്ട ഉത്തമന്റെ ഭാര്യയും, രമിത്തിന്റെ അമ്മയുമായ നാരായണിയേയും, പൂര്ണ്ണ ഗര്ഭിണിയായ സഹോദരി രമിഷായേയും സന്ദര്ശിച്ചു. അഞ്ചരക്കണ്ടി പടുവിലായില് കൊല്ലപ്പെട്ട കെ മോഹനന്റെ വിധവ സുചിത്രയെയും മകന് മിഥുനിനെയും സന്ദര്ശിച്ചു. അമ്മമാര്ക്ക് വിദ്യാര്ത്ഥികള് സ്നേഹോപഹാരമായി മുണ്ടും നല്കി. സ്നേഹസ്പര്ശ പരിപാടിയിലേക്ക് ലേബര് ഇന്ത്യ ഗ്രൂപ്പ് ചെയര്മാനും, വേള്ഡ് മലയാളീ കേരള കൗണ്സില് ചെയര്മാന് ജോര്ജ് കുളങ്ങര, പ്രൊഫ: ലാലി ജോര്ജ്, ഗ്രിഗറി ജോണ്, സജിമോന് തുടങ്ങിയവര് നേതൃത്വം നല്കി.
