കോഴിക്കോട്: നഗരത്തിലെ കെഎസ്ഇബി ട്രാന്സ്ഫോര്മറുകള്ക്കും കെഎസ്ഇബിയുടെ ഭൂഗര്ഭ കേബിളുകളുകള്ക്കും തീവെച്ച സം ഭവങ്ങള് നേരത്തെ ഉണ്ടായിട്ടും അന്വേഷണം കാര്യമായെടുത്തില്ല. കേസെടുത്തെങ്കിലും കൂടുതല് മുന്നോട്ട് പോകാന് പോലീസിനായില്ല. മൂന്നിടങ്ങളില് നേരത്തെ സമാന സംഭവങ്ങളു ണ്ടായിട്ടുണ്ട്. നടക്കാവ്, ചേവായൂര് സ്റ്റേഷന് പരിധികള്ക്കുള്ളിലാണ് സമാനസംഭ വങ്ങള് ഉണ്ടായത്. ഇവിടങ്ങളിലും ട്രാന്സ്ഫോര് മറുകള്ക്കോ കെ എസ്ഇബിയുടെ ഭൂഗര്ഭ കേബിളു കളുകള്ക്കോ ആണ് തീവെച്ചത്.
ചൊവ്വാഴ്ച പുലര്ച്ചെ കെഎസ്ഇബി ട്രാന്സ്ഫോര്മറുകളും വൈദ്യുതി കേബിളുകളും കത്തിച്ച സംഭവം അട്ടിമറിയാണെന്ന് പ്രാഥമിക നിഗമനത്തിലെത്തുമ്പോഴും കൂടുതല് വിവരങ്ങള് ലഭിക്കാതെ കുഴങ്ങുകയാണ് പോലീസ്. പുലര്ച്ചെ നടന്ന സംഭവമായതിനാല് അക്രമികളെക്കുറിച്ച് കൃത്യമായ സൂചനകള് പോലീസിന് ലഭിച്ചിട്ടില്ല. നോട്ടു അസാധുവാക്കലുമായി ബന്ധപ്പെട്ട് ബാങ്കുകളില് നടക്കുന്ന നോട്ടുകൈമാറ്റം തടസ്സപ്പെടുത്തുന്നതിന്റെ ഭാഗമായാണോ കത്തിക്കല് എന്ന സംശയമുണ്ട്. ബാങ്കുകളുടെ പ്രവര്ത്തനം തടപ്പെടുത്താനുള്ള ശ്രമമാകാനുള്ള സാധ്യത തള്ളിക്കളയാന് പോലീസ് തയ്യാറല്ല.
നഗരത്തില് നേരത്തെ ഉണ്ടായ സ്ഫോടനങ്ങള്ക്ക് പിന്നിലെ അന്വേഷണവും കൂടുതല് മുന്നോട്ടു പോകാനാവാത്തതും ഇപ്പോള് ചര്ച്ചയാവുകയാണ്.
2005ല് ബേപ്പൂരില് മത്സ്യബന്ധന ബോട്ടിലുണ്ടായ സ്ഫോടനത്തെക്കുറിച്ചും അന്വേഷണം കൂടുതല് മുന്നോട്ടുപോയില്ല. സപ്തംബര് 17നായിരുന്നു മത്സ്യബന്ധന ബോ ട്ടില് സ്ഫോടനം ഉണ്ടായത്. മാറാട് കേസുമായി ബന്ധപ്പെട്ടവരുടെ കൂട്ടായ ഉടമസ്ഥതയിലുള്ള ബോട്ടായിരുന്നു സ്ഫോടനത്തില് നശിച്ചത്.
2006 മാര്ച്ച് മാസത്തില് കോഴിക്കോട്ട് ഇരട്ട സ്ഫോടനങ്ങള് ഉണ്ടായി. കെഎസ്ആര്ടിസി ബസ്സ്റ്റാന്റിലും പുതിയ ബസ്സ്റ്റാന്റ് പരിസരത്തുമാണ് അന്ന് സ്ഫോടനങ്ങള് ഉണ്ടായത്. മിനിട്ടുകള്ക്കുള്ളിലായിരുന്നു സ്ഫോടനങ്ങള്. സ്ഫോടനത്തിന് മുമ്പ് എഡിഎമ്മിനും ഒരു പത്രസ്ഥാപനത്തിലേക്കും അജ്ഞാത ഫോണ് സന്ദേശം ലഭിച്ചിരുന്നു. തുടര്ന്നാണ് സ്ഫോടനങ്ങള് നടന്നത്.
2007 ഏപ്രില് അഞ്ചിനാണ് മിഠായിത്തെരുവിലെ പടക്കക്കടയില് ഉഗ്രസ്ഫോടനമുണ്ടായത്. സ്ഫോടനത്തിന് കാരണമായത് പൊട്ടാസ്യം ക്ലോറൈഡാണ് അന്വേഷണത്തില് തെളിഞ്ഞിരുന്നു. എന്നാല് കണക്കില് പെടാതെ സൂക്ഷിച്ച പടക്കമാണ് പൊട്ടിയതെന്നായിരുന്നു പോലീസ് നിഗമനം. സ്ഫോടനത്തിന്റെ ആഘാതത്തില് അര ടണ്ണോളം ഭാരമുള്ള കോണ്ക്രീറ്റ് ബീം മീറ്ററുകള് അകലത്തിലേക്ക് തെറിച്ചുപോയിരുന്നു. സംഭവത്തെക്കുറിച്ച് അന്വേഷിക്കാന് കര്ണ്ണാടക പോലീസ് എത്തിയിരുന്നെങ്കിലും കൂടുതല് വിവരങ്ങള് ശേഖരിക്കാന് അവര്ക്കായില്ല. പടക്കങ്ങള് പൊട്ടിത്തെറിച്ചതാണെന്ന് നിഗമനത്തിലെത്താനായിരുന്നു കേരള പോലീസിന് താല്പര്യം. സംഭവസ്ഥലത്തുനിന്ന് തെളിവുകള് ശേഖരിക്കാനാവാത്തത് കര്ണ്ണാടക പോലീസിന്റെ അന്വേഷണത്തെ തടസ്സപ്പെടുത്തുകയും ചെയ്തു.
ഈ സ്ഫോടനങ്ങളുടെയെല്ലാം പിന്നിലുള്ള ശക്തികളിലേക്ക് എത്തുന്നതില് അന്വേഷണസംഘങ്ങള് പരാജയപ്പെടുകയായിരുന്നു. കൊല്ലം കലക്ട്രേറ്റിലും ഈയിടെ മലപ്പുറം കലക്ട്രേറ്റ് പരിസരത്തുമുണ്ടായ സ്ഫോടനങ്ങള്ക്ക് പിന്നിലുള്ളവരെ കണ്ടെത്താന് പോലീസിനായിട്ടില്ല. മലപ്പുറം കലക്ട്രേറ്റില് സ്ഫോടനം നടന്ന് പോലീസ് ജാഗ്രത നിര്ദ്ദേശം നല്കി പരിശോധന കര്ശനമാക്കിയതിനിടെയാണ് കോഴിക്കോട് സംഭവം.
