രാജ്യത്തെ സമ്പദ്വ്യവസ്ഥയെ ശുചീകരിക്കുന്ന പ്രക്രിയയാണ് ഇപ്പോള് നടന്നുകൊണ്ടിരിക്കുന്നത്. 500, 1000 രൂപ നോട്ടുകളുടെ പിന്വലിക്കലിലൂടെ സാധാരണക്കാരന് അല്പം ബുദ്ധിമുട്ടുണ്ടാകും. എന്നാല് അല്പം ബുദ്ധിമുട്ടും വേദനയും ത്യാഗവും കൂടാതെ നല്ലൊരു സമ്പദ് വ്യവസ്ഥ ഉണ്ടാക്കാന് സാദ്ധ്യമല്ല.
ദൂരവ്യാപകമായ ഫലമാണ് ഈ പുതിയ കാല്വയ്പ്പിലൂടെ രാജ്യം നേടുവാന്പോകുന്നത്. നടപ്പിലാക്കുവാന് വളരെ പ്രയാസമാണ്. ചിലപ്പോള് രാജ്യത്തിന്റെ ആഭ്യന്തര വരുമാനം (ജിഡിപി-ഗ്രോസ് ഡൊമസ്റ്റിക് പ്രോഡക്ട്) കുറയും. എന്നാല് രണ്ടോ മൂന്നോ മാസത്തിനുള്ളില് തന്നെ സാധാരണക്കാരന് പോലും സാമ്പത്തിക ഉന്നമനം അനുഭവപ്പെടും. ഇപ്പോഴത്തെ ചുവട് മാത്രംകൊണ്ട് സമ്പദ് വ്യവസ്ഥയെ സ്ഥിരമായ ഉന്നമനത്തിലെത്തിക്കാന് ആകില്ല.
കള്ളപ്പണത്തിന്റെ ഭൂരിഭാഗവും രാജ്യത്തുതന്നെ സ്വര്ണ്ണമായും ഭൂമിയായും മാറ്റിയതിനുപുറമേ സ്റ്റോക്ക് എക്സ്ചേഞ്ചിലും നിക്ഷേപിച്ചിട്ടുണ്ട്. അവയെക്കൂടി കണ്ടെത്തി രാജ്യത്തിന്റെ സമ്പത്താക്കുവാന് ശക്തമായ നടപടികള് ഉണ്ടാകണം. വളരെ ചുരുക്കം നിക്ഷേപം മാത്രമാണ് വിദേശത്തുള്ളത്. വിദേശത്തുള്ളവ നാട്ടിലെത്തിക്കണമെങ്കില് ലോകരാഷ്ട്രങ്ങള് ഒന്നടങ്കം സഹകരിക്കണം. അതിനുള്ള ശ്രമം അന്താരാഷ്ട്ര തലത്തില് നടക്കുന്നുണ്ട്.
ഈ നോട്ടുപിന്വലിക്കലിന്റെ ഗുണത്തെപറ്റി ജനങ്ങള് വ്യക്തമായി മനസ്സിലാക്കണം. ഭീകരവാദ പ്രവര്ത്തനങ്ങള്ക്ക് ഉപയോഗിക്കുന്ന പണം റിയല് എസ്റ്റേറ്റ്, ഗോള്ഡ്, സ്റ്റോക്ക് എക്സ്ചേഞ്ച് എന്നിവയിലൂടെയാണ് നിക്ഷേപിക്കുന്നത്. അതിന്റെ ക്രയവിക്രയം ഒരു പരിധിവരെ തടയാനുള്ള മാര്ഗ്ഗം കൂടിയാണ് നോട്ട് പിന്വലിക്കല്. ഇക്കാര്യം പല ഉന്നതതല ചര്ച്ചകളിലും ഉന്നയിച്ചിട്ടുള്ളതാണ്. ഇപ്പോള് ബാങ്കുകളില് ഏര്പ്പെടുത്തിയിരിക്കുന്ന വിലക്കും അതിലൂടെ ജനങ്ങള്ക്ക് ഉണ്ടാകുന്ന ബുദ്ധിമുട്ടും താത്കാലികമാണ്. ഇപ്പോഴത്തെ ബുദ്ധിമുട്ടുകള് പരിഹരിക്കുവാന് അതിവേഗ നടപടികളും ഉണ്ടാകണം.
നോട്ട് പിന്വലിക്കല് സംബന്ധിച്ച് രാഷ്ട്രീയപാര്ട്ടികള്ക്ക് വ്യത്യസ്ത നിലപാടുകളായിരിക്കാം. അത് രാഷ്ട്രീയം മാത്രമാണ്. ഇനി രാജ്യത്തുള്ള എല്ലാ ധന കൈമാറ്റങ്ങളും ക്രയവിക്രയങ്ങളും നിരീക്ഷിക്കപ്പെടും. അവയ്ക്കെല്ലാം വ്യക്തമായ സാമ്പത്തിക രേഖകള് ഉണ്ടാാകും. അതോടെ ആഭ്യന്തര വരുമാനം വര്ദ്ധിക്കും. രൂപയുടെ മൂല്യം വര്ദ്ധിക്കും. ഇതുവഴി രാജ്യത്തിന്റെയും സാധാരണക്കാരന്റെയും സമ്പത്തിനും സുരക്ഷിതത്വമുണ്ടാകും. എന്തുകൊണ്ടും ധീരമായ കാല്വയ്പ്പാണിത്.
(കോര്പ്പറേഷന് ബാങ്ക് മുന് ചീഫ് മാനേജിംഗ് ഡയറക്ടറാണ് ലേഖകന്)
