ആലപ്പുഴ: വരള്ച്ച ദുരിതാശ്വാസവുമായി ബന്ധപ്പെട്ട് കുടിവെള്ളമെത്തിക്കുന്നതിനുള്ള പദ്ധതികള് ഈമാസം 30നകം തദ്ദേശഭരണസ്ഥാപനങ്ങള് ജില്ലകളക്ടര്ക്ക് സമര്പ്പിക്കണമെന്ന മന്ത്രി ജി. സുധാകരന്. മണ്ഡലകാലം പ്രമാണിച്ച് ചെങ്ങന്നൂര് മണ്ഡലത്തിലേയും പ്രത്യേക സാഹചര്യം കണക്കിലെടുത്ത് കുട്ടനാട് മണ്ഡലത്തിലേയും പ്രത്യേക അവലോകനയോഗം അടിയന്തരമായി വിളിക്കും. ഡിസംബര് 31നകം ജില്ലയിലെ മുഴുവന് സര്ക്കാര് സ്ഥാപനങ്ങളിലും മഴവെള്ള സംഭരണികള് സ്ഥാപിച്ചിരിക്കണമെന്നും അദ്ദേഹം അറിയിച്ചു. വരള്ച്ചക്കെടുതി മുന്നൊരുക്കങ്ങളുടെ ഭാഗമായി വിളിച്ചുചേര്ത്ത ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് നിര്ദേശം.
ടാങ്കറുകളിലും മറ്റും വെള്ളം നല്കാന് നടപടിയുണ്ടാകണം. ഇതിന് അനുമതി നല്കുന്നതില് കാലതാമസമുണ്ടാകില്ല. എല്ലാ പഞ്ചായത്തിലും കുടിവെള്ള കിയോസ്കുകള് സ്ഥാപിക്കണം. സ്കൂള് അസംബ്ലികള് പ്രത്യേകം വിളിച്ചുചേര്ത്ത് വരാനിരിക്കുന്ന വരള്ച്ച, സൂര്യതാപം, കുടിവെള്ളക്ഷാമം എന്നിവയെക്കുറിച്ച് വിദ്യാര്ത്ഥികളില് ബോധവല്ക്കരണം നടത്താന് വിദ്യാഭ്യാസ ഓഫീസര്മാരെ ചുമതലപ്പെടുത്തി. മൃഗങ്ങള്ക്കായുള്ള പ്രത്യേക ജലസ്രോതസുകള് കണ്ടെത്താനും നിര്ദ്ദേശമുണ്ട്.
നീരേറ്റുപുറം പദ്ധതി ലക്ഷ്യമിട്ടത് കുട്ടനാടിനു വേണ്ടിയാണെന്നും അത് ഫലവത്തായില്ലെന്നും പറഞ്ഞ മന്ത്രി വെള്ളത്തിന്റെ സന്തുലിതമായ വിതരണം ഉറപ്പാക്കിയില്ലെങ്കില് ഉദ്യോഗസ്ഥര്ക്കെതിരെ നടപടിയുണ്ടാകുമെന്ന് താക്കീത് നല്കി.
