1000, 500 രൂപാ നോട്ടുകള് പിന്വലിച്ച് പുതിയ നോട്ടുകള് ഇറക്കാനുള്ള കേന്ദ്രസര്ക്കാര് തീരുമാനത്തോട് മുന് മന്ത്രി കെ. ബാബു പ്രതികരിച്ചില്ല. കുറച്ചുകൂടി സമയം നല്കിയിരുന്നെങ്കില് ബുദ്ധിമുട്ട് ഒഴിവാക്കാമായിരുന്നെന്ന് മുന് മന്ത്രിമാരായ അടൂര് പ്രകാശും സി.എന്. ബാലകൃഷ്ണനും പ്രതികരിച്ചു.
നോട്ടുകള് പിന്വലിച്ച് പുതിയവ ഇറക്കാനുള്ള കേന്ദ്രസര്ക്കാര് തീരുമാനത്തെക്കുറിച്ച് കെപിസിസി നേതൃത്വം പ്രതികരിച്ചു കഴിഞ്ഞു. ഇനി തന്റെ അഭിപ്രായത്തിന് പ്രസക്തിയില്ലെന്നായിരുന്നു കെ. ബാബുവിന്റെ പ്രതികരണം.
മുന്നറിയിപ്പില്ലാതെ പെട്ടെന്നുള്ള പ്രഖ്യാപനമായതിനാല് സാധാരണ ജനങ്ങള്ക്ക് ബുദ്ധിമുട്ട് സൃഷ്ടിച്ചെന്നായിരുന്നു മുന് റവന്യൂമന്ത്രി അടൂര് പ്രകാശ് പറഞ്ഞത്. കൂലിപ്പണിയെടുക്കുന്നവര് പോലും 1000, 500 നോട്ടുകള് നല്കിയിട്ട് സ്വീകരിക്കുന്നില്ല. ബാങ്കുകളില് നിന്നാകട്ടെ ചെറിയനോട്ടുകള് ലഭിക്കാനും പ്രയാസം നേരിടുന്നു. കേന്ദ്രസര്ക്കാര് കുറച്ചുകൂടി അവധാനത പ്രകടിപ്പിച്ച് അവസരം ഒരുക്കേണ്ടതായിരുന്നു. ലഘുഭക്ഷണത്തിനു പോലും പണമില്ലാതെ പലരും ബുദ്ധിമുട്ടി.
കള്ളപ്പണം പിടിച്ചെടുക്കാന് മുമ്പ് സര്ക്കാര് അവസരം നല്കിയിരുന്നതാണ്. നോട്ടുകള് പിന്വലിക്കുമ്പോള് കള്ളപ്പണം കൈവശമുള്ളവര് ഒരുപക്ഷേ ബാങ്കുകളില് നിക്ഷേപിച്ചേക്കാം. അങ്ങനെയാണെങ്കില് അത് വരവുവച്ച് തുടര്നടപടി സ്വീകരിക്കാവുന്നതേയുള്ളൂ. കുറഞ്ഞത് ഒരാഴ്ചയോ പത്തുദിവസത്തെയോ സാവകാശം സര്ക്കാരിന് നല്കാമായിരുന്നെന്നും അടൂര് പ്രകാശ് പറഞ്ഞു.
നോട്ടുകള് മാറ്റിവാങ്ങുന്നതില് സാധാരണ ജനങ്ങളുടെ ബുദ്ധിമുട്ട് ഒഴിവാക്കാനായി സഹകരണബാങ്കുകളെ കൂടി റിസര്വ് ബാങ്കിന് ഉള്പ്പെടുത്താമായിരുന്നെന്ന് മുന് സഹകരണമന്ത്രി സി.എന്. ബാലകൃഷ്ണന് പറഞ്ഞു. കാര്ഷിക സഹകരണബാങ്കുകള്, റിസര്വ് ബാങ്ക് അംഗീകാരമുള്ള ദേശസാത്കൃതമല്ലാത്ത മറ്റു ബാങ്കുകള് എന്നിവയെക്കൂടി ഉള്പ്പെടുത്താമായിരുന്നു. ആദായനികുതി അടയ്ക്കുന്ന ഇത്തരം ബാങ്കുകളെ ഉള്പ്പെടുത്തിയാല് കള്ളപ്പണം വെളുപ്പിക്കുന്നത് തടയാനാകുമായിരുന്നെന്നും ബാലകൃഷ്ണന് പറഞ്ഞു.
