വാഷിങ്ടണ്: ഭാരതത്തില് ഐഎസ് ഭീകരാക്രമണ സാധ്യതയുള്ളതിനാല് ഭാരതത്തിലുള്ള അമേരിക്കന് പൗരന്മാര് ജാഗ്രത പാലിക്കണമെന്ന് ദല്ഹിയിലെ യു.എസ് എംബസിയുടെ നിര്ദേശം. ഉത്സവകാലമായ നവംബറില് ഭീകര സംഘടനയായ ഐഎസ് ആക്രമണം നടത്താന് സാധ്യതയുണ്ടെന്നാണ് എംബസിയുടെ മുന്നറിയിപ്പ്.
വിദേശികള് സ്ഥിരമായി സന്ദര്ശിക്കുന്ന വിനോദസഞ്ചാര കേന്ദ്രങ്ങള്, വ്യാപാരകേന്ദ്രങ്ങള്, ആരാധനാലയങ്ങള് എന്നിവിടങ്ങളിലേക്കു പോകുമ്പോള് പ്രത്യേക ജാഗ്രത പാലിക്കണമെന്നും യുഎസ് എംബസി അറിയിച്ചു. ഇത്തരം സ്ഥലങ്ങളില് ആക്രമണ സാധ്യത കൂടുതലുണ്ടെന്നും എംബസി പുറത്തിറക്കിയ നിര്ദേശത്തില് വ്യക്തമാക്കുന്നു.
ഇന്ത്യന് മുജാഹിദീന്, ജെയ്ഷെ മുഹമ്മദ് , ലഷ്കര് ഇ തൊയിബ തുടങ്ങിയ ഭീകര സംഘടനകള് ഭാരതത്തില് സജീവമാകുന്നുണ്ടെന്നും മുന്നറിയിപ്പില് പറയുന്നു. 2016ല് അമേരിക്കന് ആഭ്യന്തര വകുപ്പ് ആഗോളതലത്തില് പൗരന്മാര്ക്ക് നല്കിയിരിക്കുന്ന സുരക്ഷാ നിര്ദ്ദേശങ്ങളുടെ ഭാഗമായാണ് നടപടിയെന്ന് എംബസി അറിയിച്ചു.
