മധ്യതിരുവിതാംകൂറിലെ ജലാശയങ്ങളില് മണ്ടുളി എന്നൊരിനം നീര്ക്കോലിയുണ്ട്. കാഴ്ച്ചയില് മണ്ടന് ലുക്കായതിനാല് ‘പൊട്ടന് മണ്ടുളി’ എന്നാണ് ഇഷ്ടന്റെ പരക്കെയുള്ള പേര്. പണ്ടത്തെ വീട്ടമ്മമാര് ആറ്റുതീരത്തിരുന്ന് മീന് വെട്ടുമ്പോള് മണ്ടുളി ഒന്നുമറിയാത്തപോലെ തൊട്ടടുത്ത് വെള്ളത്തില് തല പൊന്തിച്ചുകിടക്കും. മീനിന്റെ അവശിഷ്ടങ്ങള്ക്കുവേണ്ടി മറ്റു നീര്ക്കോലികള് ശല്യം ചെയ്യുമ്പോള് വീട്ടമ്മമാരുടെ ശ്രദ്ധ തിരിയുന്ന തക്കത്തിന് നമ്മുടെ മണ്ടുളിയാശാന് ആറ്റുപടവില് കഴുകി മുറിച്ചുവച്ചിരിക്കുന്ന മീന്കഷ്ണങ്ങളില് മുഴുത്ത ഒരെണ്ണം വായിലാക്കി കടക്കുകയും ചെയ്യും.
കമ്മ്യൂണിസ്റ്റ് സഖാക്കന്മാരുടെ അതിബുദ്ധിയും പുങ്കത്തരവും കാണുമ്പോള് മണ്ടുളിയെ ഓര്ത്തുപോവുക സ്വാഭാവികം. കുമ്മനം രാജശേഖരനും സുഗതകുമാരി ടീച്ചറുമടക്കം എത്രയോ മനുഷ്യരുടെ എത്രയോ നാളത്തെ പ്രയത്നം കൊണ്ടാണ് ആറന്മുളയില് കെജിഎസ്സിനു കൂച്ചുവിലങ്ങിടാന് കഴിഞ്ഞത്. ഇതിനുവേണ്ടി കുമ്മനം സുപ്രീംകോടതിയില് നിയമയുദ്ധം നടത്തുമ്പോള് ഇന്നത്തെ ആറന്മുള എംഎല്എ വീണാ ജോര്ജ് അധികസമയവും റിപ്പോര്ട്ടര് ചാനലിന്റെ എയര് കണ്ടീഷന് മുറിയിലിരുന്ന് വാര്ത്ത വായിച്ചും ശമ്പളമെണ്ണിയും രസിക്കുകയായിരുന്നു; ബാക്കിനേരത്ത് അനുസരണയുള്ള സഭാപുത്രിയായി കുര്ബാന കൂടുന്ന തിരക്കിലും. പിണറായി വിജയനാണെങ്കില് ലാവ്ലിന് കേസ് ഓര്ത്ത് ഉറക്കം നഷ്ടപ്പെട്ട അവസ്ഥയില്. വി.എസ്.സുനില്കുമാറാവട്ടെ ഡെയ്ലി കാക്കത്തൊള്ളായിരം ചാനല്ചര്ച്ചകളിലൂടെ നേരംകൊല്ലുന്ന തിരക്കിലും.
കുമ്മനം കേസ് നടത്തിയും, ജനങ്ങളെ അണിനിരത്തിയും, ബിജെപി സര്ക്കാരില് സ്വാധീനം ചെലുത്തിയും കാര്യം നേടിയെടുത്തപ്പോള് ദാണ്ടെടാ, വിത്തെറിയാനും വിതയ്ക്കാതെ കൊയ്യാനും ഒരു തൃശൂര്ക്കാരനും കണ്ണൂര്ക്കാരനുംകൂടി പുത്തന് ചേടത്തിസഖാവിനെയും കൂട്ടി വന്നിരിക്കുന്നു. തൊലിക്കട്ടി സമ്മതിച്ചിരിക്കുന്നു, സഖാക്കന്മാരേ!
ഒരെണ്ണംകൂടി: ഇന്നാട്ടിലെ ലക്ഷോപലക്ഷം ഹിന്ദുക്കളുടെ കഠിനാദ്ധ്വാനവും വിയര്പ്പുംകൊണ്ടാണ് ശബരിമലക്ഷേത്രം ഇന്നത്തെ നിലയിലായതും ഓരോ മണ്ഡലകാലവും മംഗളമായി കഴഞ്ഞുപോകുന്നതും. കമ്മ്യൂണിസ്റ്റുകാരന് വന്നപ്പം ദാ, പുതിയ നിയമം വരുന്നത്രേ, പ്രവാസികള് അയ്യപ്പനെ കാണുന്നതിന് ഇരുപത്തഞ്ച് ഡോളര് കൊടുക്കണമെന്ന്! ജീവിതകാലം മുഴുവന് കാറല് മാര്ക്സിനുവേണ്ടി കാറിയും, ന്യൂനപക്ഷങ്ങള്ക്കുവേണ്ടി മുക്രയിട്ടും നടന്ന പരപീഡകരുടെ കൈയില്ത്തന്നെ അവസാനം അമ്പലഭരണം ചെന്നെത്തിയല്ലോ ദൈവമേ!
