കരുനാഗപ്പള്ളി: ആരോഗ്യവകുപ്പും അധികൃതരും വ്യാജമുട്ട ഇല്ലെന്ന് ആവര്ത്തിക്കുമ്പോഴും കരുനാഗപ്പള്ളിയില് ഇത് വ്യാപകമെന്ന് പരാതി. എന്നാല് ഇക്കാര്യം പരിശോധിക്കാനോ ഇത് വിതരണം ചെയ്യുന്നവര്ക്കെതിരെ നടപടി എടുക്കുവാനോ അധികൃതര് തയ്യാറാകുന്നില്ല എന്ന ആക്ഷേപമാണ് ശക്തമാകുന്നത്.
കഴിഞ്ഞ ദിവസം തൊടിയൂര് മന്ദിരം മുക്കില് സ്റ്റേഷനറി കട നടത്തുന്ന സിറാജുദീന്റെ കടയില് മുട്ട വിതരണം ചെയ്യുന്ന ശൂരനാട് സ്വദേശിയില് നിന്നും രണ്ട് ട്രേ മുട്ട എടുത്തിരുന്നു. ഈ മുട്ടയുടെ ആകൃതിയില് വ്യത്യാസം തോന്നിയതിന്റെ പേരില് പരിശോധിച്ചപ്പോഴാണ് വ്യാജമുട്ടയാണെന്ന് മനസിലായത്. ട്രേയില്ത്തന്നെ മാറ്റി മാറ്റി വെച്ചപ്പോള് മുട്ടയുടെ ആകൃതി മാറുന്നതായി ബോധ്യപ്പെട്ടു.
മുട്ട പൊട്ടിച്ചുനോക്കിയപ്പോള് വെള്ള പാടയ്ക്ക് പകരം പ്ലാസ്റ്റിക്ക് പോലത്തെ ആവരണമാണ് ഉള്ളത്. മുട്ടയുടെ മണവും ഇല്ലായിരുന്നു. മാത്രവുമല്ല എണ്ണ മാതിരി ഒരു ദ്രവമാണ് ഇതില് നിറച്ചിരിക്കുന്നതെന്നും സിറാജുദ്ദീന് പറയുന്നു. ആരോഗ്യവകുപ്പിനും, പോലീസിനും പരാതി നല്കിയിരിയ്ക്കുകയാണ് സിറാജുദീന്.
