ആലുവ: ദേശം പുറയാര് റെയില്വേ പാളത്തില് കല്ല് കഷണങ്ങള് കയറ്റിവെയ്ക്കുന്നതിനിടെ നാട്ടുകാര് പിടികൂടി റെയില്വേ പോലീസിന് കൈമാറിയ ഇതര സംസ്ഥാനക്കാരായ രണ്ട് പേര് ട്രെയിനിന് നേരെ കല്ലെറിഞ്ഞ കേസിലും പ്രതികളാണെന്ന് സംശയം. ഇതേതുടര്ന്ന് ആലുവ റെയില്വെ പ്രൊട്ടക്ഷന് ഫോഴ്സ് കസ്റ്റഡിയിലെടുത്ത പ്രതികളെ തൃശൂര് റെയില്വെ പോലീസിന് കൈമാറി. ഇന്നലെ ഉച്ചയോടെയാണ് തിരുവനന്തപുരം ഹൈദ്രാബാദ് ശബരി എക്സ്പ്രസിന് നേരെയാണ് ചാലക്കുടി കൊരട്ടിയില് വച്ച് കല്ലേറ് നടന്നത്.
വൈകിട്ടാണ് പുറയാറില് റെയില്വേ പാളത്തില് കല്ല് കഷണങ്ങള് കയറ്റിവെച്ചത്. കല്ല് കയറ്റി പാളത്തില് വെച്ചതിനെ തുടര്ന്ന് പിടിയിലായവരെ ആര്പിഎഫ് ആലുവ റെയില്വേ സ്റ്റേഷനിലെത്തിച്ച് ചോദ്യം ചെയ്തപ്പോഴാണ് ഉച്ചക്ക് ട്രെയിനിന് നേരെ കല്ലേറ് നടത്തിയതും ഇവരാണെന്ന് വ്യക്തമായത്.
കല്ലേറ് നടത്തിയത് തൃശൂര് സ്റ്റേഷന്റെ പരിധിയില്പ്പെടുന്നതിനാലാണ് ഇവരെ കൈമാറിയത്. ആക്രിക്കച്ചവടക്കാരായ പ്രതികള് മദ്യലഹരിയിലാണ് ഇത്തരം പ്രവര്ത്തികള് ചെയ്തതെന്നാണ് സംശയിക്കുന്നത്.
