തലശ്ശേരി: കണ്ണൂര്ജില്ല കുട്ടികളുടെ പീഡന മേഖലയായി മാറിയെന്നും പാനൂര് ഈ മേഖലയിലെ ഏറ്റവും പ്രധാന കേന്ദ്രമായെന്നും എംഎസിടി ജഡ്ജ്.കെ.ബൈജുനാഥ്. കുട്ടികള്ക്കുള്ള നിയമ പരിരക്ഷ ഉറപ്പാക്കുന്നതിന് ദേശീയ തലത്തില് ആരംഭിക്കുന്ന നിയമസഹായ ശില്പശാലയുടെ സംസ്ഥാനതല ഉദ്ഘാടനം പാനൂരില് 22 ന് നടക്കുമെന്നും ലീഗല് സര്വ്വീസ് സൊസൈറ്റി ഹാളില് വിളിച്ചു ചേര്ത്ത വാര്ത്താ സമ്മേളനത്തില് അദ്ദേഹം പറഞ്ഞു. നമ്മുടെ സമൂഹത്തില് നിന്ന് നല്ല സന്ദേശങ്ങളൊന്നും കുട്ടികള്ക്ക് നിലവില് ലഭിക്കുന്നില്ല. കുട്ടികളുടെ അവകാശങ്ങള് ഒന്നൊന്നായി മുതിര്ന്നവര് ശൈശവത്തില് തന്നെ കവര്ച്ച ചെയ്യുകയാണ്. സ്കൂളില് പഠനത്തിന് കുട്ടികളെ ചേര്ക്കും മുന്പു തന്നെ വിവിധ തരത്തിലുള്ള എല്കെജികളില് രക്ഷിതാക്കള് പറഞ്ഞയക്കുക വഴി നൈസര്ഗികമായ കളി ചിരികള് കുടുസ്സുമുറികളില് ഒതുക്കപ്പെട്ടുന്നു. കുട്ടികള് നിസ്സംഗരാവാന് ഇതും പ്രധാന ഘടകമാണ്.
പോലീസ്, എന്ജിഒകള്, സാമൂഹ്യ പ്രവര്ത്തകര് ഇവര് വഴിയുള്ള ബോധവത്കരണത്തിനേ ഈ അവസ്ഥയെ മാറ്റാനാവൂ. ഇതിനായാണ് പാനൂരില് ശില്പശാല സംഘടിപ്പിക്കുന്നത്. കുട്ടികളില് ബോധവത്കരണം കൃത്യമായി നടത്തുന്നില്ലെങ്കില് വന് ദുരന്തമാണ് വരാനിരിക്കുന്നത്. ലൈംഗിക ചൂഷണം, ബാലവേല, ഭിക്ഷാടനം, മയക്കുമരുന്ന് ഉപയോഗം തുടങ്ങിയവയെല്ലാം കുട്ടികളില് പ്രയോഗിക്കുക വഴി തകരുന്ന പൊതു സമൂഹത്തിന്റെ ചിഹ്നങ്ങളായി മാറുകയാണെന്നും അദ്ദേഹം പറഞ്ഞു.
ജില്ലാ ജഡ്ജ് വി.ജി.അനില്കുമാര്, സബ്ബ് ജഡ്ജ് എം.പി.ജയരാജ് ബാര് അസോസിയേഷന് പ്രസിഡണ്ട് അഡ്വ. ബിനോയ് തോമസ്, ബിജുരാജന് പാറമ്മല് എന്നിവര് വാര്ത്താ സമ്മേളനത്തില് പങ്കെടുത്തു.
