കൊച്ചി: നെടുമ്പാശേരി മാര് അത്തനേഷ്യസ് ഹയര് സെക്കന്ഡറി സ്കൂളിന്റെ ഉടമസ്ഥാവകാശത്തെ ചൊല്ലി യാക്കോബായ ഓര്ത്തഡോക്സ് വിഭാഗങ്ങള് തമ്മില് സംഘര്ഷം. സ്കൂളിന്റെ കനകജൂബിലിയാഘോഷത്തിന് യാക്കോബായ സഭാംഗങ്ങള് പ്രതിഷേധവുമായെത്തിയതാണ് സംഘര്ഷത്തിന് ഇടയാക്കിയത്. സംഘര്ഷത്തെത്തുടര്ന്ന് റൂറല് എസ്പി ഉണ്ണിരാജന്റെ നേതൃത്വത്തില് വന് പോലീസ് സംഘം സ്ഥലത്തെത്തി. പ്രതിഷേധ യോഗത്തില് സഭയിലെ വൈദികരും പള്ളി ഭാരവാഹികളും ഭക്തസംഘടനാ പ്രതിനിധികളും കൗണ്സില് അംഗങ്ങളും പങ്കെടുത്തു.
ഓര്ത്തഡോക്സ് സഭയുടെ കീഴിലാണ് നിലവില് സ്കൂള് പ്രവര്ത്തിക്കുന്നത്. എന്നാല് സ്കൂളിന്റെ പൂര്ണ അവകാശം തങ്ങള്ക്കാണെന്നും അനധികൃതമായി കൈവശം വച്ചിരിക്കുന്ന സ്കൂള് വിട്ടു നല്കണമെന്നുമാണ് യാക്കോബായ സഭയുടെ ആവശ്യം. ചൊവ്വാഴ്ച നെടുമ്പാശ്ശേരിയില് ചേര്ന്ന യാക്കോബായ സഭ ഉന്നതാധികാര സമിതിയാണ് ഈ ആവശ്യം ഉന്നയിച്ചത്.
ഓര്ത്തഡോക്സ് വിഭാഗം നെടുമ്പാശ്ശേരി സ്കൂളില് സ്ഥാപകനായ വയലിപ്പറമ്പില് ഗീവര്ഗീസ് മാര് ഗ്രിഗോറിയോസ് മെത്രാപ്പോലീത്തായുടെ ചരമ സുവര്ണ ജൂബിലി ആഘോഷിക്കാന് തീരുമാനിച്ചതാണ് ഇപ്പോള് തര്ക്കത്തിനും പ്രതിഷേധ യോഗത്തിനും വഴിവച്ചത്. നെടുമ്പാശ്ശേരിയില് ഇത്തരമൊരു ചടങ്ങ് ഓര്ത്തഡോക്സ് സഭ സംഘടിപ്പിക്കുന്നത് യാക്കോബായ സഭയോടുള്ള വെല്ലുവിളിയാണെന്ന് ശ്രേഷ്ഠ കാതോലിക്ക ബസേലിയോസ് തോമസ് പ്രഥമന് ബാവ പറഞ്ഞു. ഓര്ത്തഡോക്സ് വിഭാഗം ഏകപക്ഷീയമായി സ്കൂളില് നടത്തുന്ന സഭാപരമായ പരിപാടികള് ഒഴിവാക്കണമെന്ന് ആവശ്യപ്പെട്ട് സഭ സര്ക്കാറിനും അധികാരികള്ക്കും പരാതിയും നല്കിയിട്ടുണ്ട്.
