നമ്മുടെ രാജ്യത്തിന്റെ അസ്തിത്വം സംരക്ഷിക്കാനുള്ള മഹത്തായ പ്രവര്ത്തനമാണ് പ്രധാനമന്ത്രിയെന്ന നിലയില് നരേന്ദ്രമോദി ചെയ്യുന്നത്. അതിനായി അദ്ദേഹം അഹോരാത്രം ജോലി ചെയ്യുന്നു. മോദിയുടെ പ്രവര്ത്തനം ഓരോ ഭാരതീയനും മാതൃകയാക്കിയാല് നമ്മുടെ രാജ്യം അത്യുന്നതിയിലെത്തുമെന്ന കാര്യത്തില് സംശയമില്ല. മോദി വീണ്ടും കേരളത്തിലെത്തുമ്പോള് എല്ലാ മലയാളികളും ഒത്തൊരുമിച്ച് സ്വീകരിക്കേണ്ടതിന്റെ ആവശ്യകതയും അതാണ്.
വിദ്യാഭ്യാസ മേഖലയിലും തൊഴില് രംഗത്തും തുടങ്ങി സാങ്കേതിക വിദ്യയുടെ വളര്ച്ചയില്വരെ നമ്മുടെ രാജ്യത്തെ സ്വയംപര്യാപ്തതയിലെത്തിക്കാനുള്ള യജ്ഞമാണ് നരേന്ദ്ര മോദി നടത്തുന്നത്. ആ യജ്ഞത്തില് നമുക്കൊരോരുത്തര്ക്കും പങ്കുചേരേണ്ടതുണ്ട്. കറകളഞ്ഞ ജനാധിപത്യവാദിക്കുമാത്രമേ മെയ്ക്ക് ഇന് ഇന്ത്യ എന്ന മുദ്രാവാക്യം സാധ്യമാവുകയുള്ളൂ. ഭരണത്തിലേറി ഉടന് അദ്ദേഹം തന്റെ നയം നമുക്കുമുന്നില് വച്ചു. അതെല്ലാം സാധ്യമാകുമോ എന്ന് സംശയിച്ചവരെ അദ്ഭുതപ്പെടുത്തുന്ന വേഗതയില് മോദി പ്രവര്ത്തിച്ചു കാണിച്ചു. വിദേശകാര്യ നയത്തില് അതുവരെ നാം കണ്ടിട്ടില്ലാത്ത ശൈലി കാഴ്ചവച്ചു. ആക്ഷേപിച്ചവര്ക്കുമുന്നില് വിജയത്തിന്റെ പതാക പാറിച്ചു. മറ്റ് രാജ്യങ്ങള് ഭാരതത്തിന്റെ സൗഹൃദത്തിനായി വരിനിന്നു. നമ്മുടെ സുരക്ഷയ്ക്കു ഭീഷണിയാകുന്നവരെ ആഗോളതലത്തില് തുറന്നുകാട്ടി.
വിദേശ രാജ്യങ്ങള്ക്ക് അദ്ദേഹം നല്ല സുഹൃത്തായും അതിനുപരി മികച്ച രാഷ്ട്രതന്ത്രജ്ഞനായും പുനര്ജ്ജനിച്ചു. തന്റെ രാജ്യത്തിന്റെ വ്യാപാരാഭിവൃദ്ധി, കൂടുതല് ബന്ധങ്ങള്, ധനം, രാജ്യപുരോഗതി, ജനപിന്തുണ, ധനനിക്ഷേപ കരാറുകള് എന്നിവയുടെ വഴികള് അദ്ദേഹം സുഗമമായി വെട്ടിത്തെളിയിച്ചെടുത്തു. ഭരണത്തിന്റെ നിലനില്പ്പ് ഉത്തമ സൗഹൃദ ബന്ധങ്ങളിലൂടെയും ധനനിക്ഷേപങ്ങളിലൂടെയും ധനവര്ദ്ധനവിലൂടെയും പരമാവധി മനുഷ്യ-രാജ്യസ്നേഹങ്ങളിലൂടെയും മാത്രമേ നിലനിര്ത്താനും ഊര്ജ്ജിതപ്പെടുത്താനും സാധിക്കുകയുള്ളൂ എന്ന് മോദിക്കറിയാം.
എല്ലാമേഖലകളിലും സമഗ്രമായ പുരോഗതി ലക്ഷ്യംവയ്ക്കുന്ന പ്രധാനമന്ത്രിയാണ് നമുക്കുള്ളത്. അദ്ദേഹത്തിലൂടെ രാജ്യം പുരോഗതിയിലേക്ക് കുതിക്കുകയാണെന്നതില് സംശയമില്ല. അധികാരത്തിലേറി ഇതുവരെ അഴിമതിയാരോപണങ്ങളൊന്നും കേന്ദ്രസര്ക്കാരിനെതിരായി ഉണ്ടായിട്ടില്ല. രാജ്യത്ത് വികസനമുണ്ടാകണമെന്നും അതിലൂടെ തൊഴില് സാഹചര്യങ്ങള് വര്ദ്ധിക്കണമെന്നുമാണ് മോദിയുടെ ആഗ്രഹം. തൊഴില്തേടി ഭാരതീയരായ യുവാക്കള് വിദേശത്തേക്കുപോകുന്നത് അവസാനിപ്പിച്ച് എല്ലാവര്ക്കും ഇവിടെതന്നെ തൊഴില് നല്കാനുള്ള പദ്ധതിയാണ് അദ്ദേഹം ലക്ഷ്യംവയ്ക്കുന്നത്.
രാജ്യത്തിന്റെ സാമ്പത്തിക മേഖലയെ ഭീഷണിയില്നിന്നു മുക്തമാക്കാനും അദ്ദേഹത്തിന്റെ നയങ്ങള് സഹായിച്ചു. രാഷ്ട്രീയ അഭിപ്രായ വ്യത്യാസങ്ങള് മാറ്റിനിര്ത്തി മോദിയെ സ്വീകരിക്കേണ്ടതിന്റെ പ്രാധാന്യം വര്ദ്ധിക്കുന്നത് ഇക്കാരണത്താലാണ്.
