സെല്ഫി’ പാറക്കെട്ടുകള്
വിഴിഞ്ഞം: കോവളം തീരം മുതല് അടിമലത്തുറ വരെയുള്ള തീരപ്രദേശത്തിന് സമീപമുള്ള പാറക്കെട്ടുകള് അറിയപ്പെടുന്നതു ‘സെല്ഫി’ പാറക്കെട്ടുകള് എന്നാണ്. കടലിന്റെ തിരകള് പാറക്കെട്ടുകളില് അടിച്ച് പതഞ്ഞൊഴുകുന്ന വെള്ളം തീര്ക്കുന്നത് നയന മനോഹരമായ കാഴ്ചകള് തന്നെയാണ്. അതു കൊണ്ട് തന്നെ ഈ പാറക്കെട്ടുകള് സെല്ഫി പ്രേമികളെ ആകര്ഷിക്കുന്നതും സ്വാഭാവികം മാത്രം. എന്നാല് ഈ പാറക്കെട്ടുകള് ഒളിപ്പിച്ചു വച്ചിരിക്കുന്ന ചതിക്കുഴികളില് പെട്ട് അപഹരിക്കപ്പെട്ട ജീവനുകള് ഒട്ടനവധിയാണ്.
ഞായറാഴ്ച ഒഴിവുദിനം ആഘോഷിക്കാനെത്തിയ രണ്ട് അന്യസംസ്ഥാന തൊഴിലാളികളാണ് ഈ സെല്ഫി പ്രേമത്തിന്റെ അവസാന ഇരകള്. കരയില് നിന്ന സുഹൃത്തുക്കളുടെ വാക്കുകള്ക്ക് ചെവി കൊടുക്കാതെ പാറക്കെട്ടുകളില് നിന്ന് സെല്ഫി എടുക്കവേയാണ് അപ്രതീക്ഷിതമായി എത്തിയ തിര രണ്ട്പേരേയും കൊണ്ട് ഉള്വലിഞ്ഞത്.
ഏകദേശം നാല് മാസം മുന്പ് കേരളത്തില് ജോലിക്കെത്തിയതായിരുന്നു പശ്ചിമ ബംഗാള് സ്വദേശികളായ ഈ സുഹൃത്തുക്കള്. തൃശൂര്, കൊട്ടാരക്കര ഭാഗങ്ങളില് ജോലി ചെയ്തു വരുന്നതിനിടെ ഏകദേശം പതിനഞ്ച് ദിവസം മുന്പാണ് ഇവര് തിരുവനന്തപുരത്ത് എത്തിയത്. കോട്ടുകാല് പഞ്ചായത്തില് പുതിയതായി നിര്മ്മിക്കുന്ന സിവില് സ്റ്റേഷന് നിര്മ്മാണ പ്രക്രിയയിലെ തൊഴിലാളികളായിരുന്നു ഇവര്. കടല് കാണാനെത്തിയ ഇവര് ഉച്ചയോടെ ആഴിമല ക്ഷേത്രത്തിന് സമീപത്തുള്ള പാറക്കെട്ടുകളില് നിന്ന് സെല്ഫി എടുക്കവേ ആഞ്ഞടിച്ച തിരമാലയില് പെട്ട് കടലിലേക്ക് വീഴുകയായിരുന്നു. ഒരാള്ക്ക് പാറക്കെട്ടുകളില് പിടിത്തം കിട്ടിയെങ്കിലും കൂടെയുണ്ടായിരുന്ന രണ്ട് പേരെ കടലെടുക്കുകയായിരുന്നു.
ഈ പാറക്കെട്ടുകള്ക്ക് മുകളില് നിന്നും വീണ് ഒട്ടനവധി ജീവനുകള് നഷ്ടമായിട്ടുണ്ട്. അപകടത്തില് പെട്ടവരില് ഏറെയും യുവാക്കളും യുവതികളുമാണ്. അമിതമായ സെല്ഫി പ്രേമവും അശ്രദ്ധയും കൂടി ചേരുമ്പോഴാണ് അപകടങ്ങള് തുടര്ക്കഥയാകുന്നത്.
പാറക്കെട്ടുകളില് നിന്ന് ഫോട്ടോ എടുക്കുന്ന സമയത്താണ് ഏറെയും അപകടങ്ങള് നടക്കുന്നത്.
നിരന്തരം തിരമാലകള് അടിച്ചു കയറുന്നതിനാല് ഉണ്ടാകുന്ന പായലുകള് കാരണം കാല് വഴുതി കടലിലേക്ക് വീണാണ് അപകടങ്ങളിലേറെയും. ഈ പ്രദേശങ്ങളില് ആവശ്യമായ സുരക്ഷാ സംവിധാനമോ ബോര്ഡുകളോ നിലവിലില്ല. അപകടം ഉണ്ടായാല് രക്ഷിക്കാന് ആവശ്യമായ ലൈഫ് ഗാര്ഡുകളുടെ സേവനവും പരിമിതമാണ്. ഓരോ അപകടങ്ങളുണ്ടാകുമ്പോഴും എത്തുന്ന അധികാരികള് അടുത്ത അപകടം ഉണ്ടാകുമ്പോഴാണ് വീണ്ടും സുരക്ഷയെക്കുറിച്ച് ചര്ച്ച ചെയ്യുന്നത്.
